U biełarusa, jaki nahavaryŭ usiakaha na Litvu, zabrali dazvoł na žycharstva
Paviedamlajecca, što raniej chłopiec vyklikaŭ svaimi vykazvańniami chvalu abureńnia ŭ Litvie.
Hramadzianin Biełarusi, jaki krytykavaŭ Litvu ŭ internecie i zajaŭlaŭ pra svaju niepavahu da litoŭcaŭ, byŭ pazbaŭleny dazvołu na žycharstva. Vyśvietliłasia, što mužčyna pracavaŭ u adnaho pracadaŭcy, niahledziačy na toje, što dekłaravaŭ miesca pracy ŭ inšaha, piša Delfi.lt.
Raniej jon vyklikaŭ svaimi vykazvańniami chvalu abureńnia ŭ Litvie. Jon zajaŭlaŭ, što z pryncypu nie vučyć litoŭskuju, što jamu nie padabajecca Litva, jaje ŭłada, zakony i ceny ŭ krainie.
Adnak paśla taho jak heta videa z kanała Youtube Mylimiausia Lietuva było nabyło šyrokuju ahałosku, jano było vydalenaje. Akazałasia, prybrać videa ŭ błohierki Julii paprasiŭ hieroj historyi. Jon paviedamiŭ, što ŭ jaho pačalisia prablemy.
Departamient mihracyi adznačyŭ, što asoba hetaha čałavieka jaho rabotnikam viadomaja, było pačata rasśledavańnie.
«Navošta mnie litoŭskaja? Ja litoŭskuju movu naohuł nie pavažaju. U mianie jość dazvoł na žycharstva, ale mova mnie nie patrebnaja», — skazaŭ małady čałaviek, jaki pražyvaje ŭ Litvie z 2019 hoda.
Intervju ź biełarusam zapisała Julija z Kazachstana, jakaja vyjšła zamuž za litoŭca i žyvie ŭ Alitusie. Jana nie tolki robić repartažy i ahlady, ale i zapisvaje intervju z roznymi žycharami Rasii, u jakich pytajecca, što jany dumajuć pra Litvu. U svaich videa jana ŭvieś čas akcentuje nieabchodnaść vyvučeńnia movy i znajomstva z kulturaj Litvy. Na adnym videa jana zapisała svaju hutarku ź biełarusam, jaki žyvie ŭ Litvie.
Hetaje intervju ździviła i samu Juliju. Palitykaŭ biełarus nazyvaŭ «durniami» kazaŭ, što ceny ŭ Litvie «kosmas», jon skardziŭsia, što tut niama dzie adpačyć.
Mihrant skardziŭsia taksama, što miascovyja choć i razumiejuć pa-rusku, ale ŭsio ž havorać ź im na litoŭskaj. Jon akcentavaŭ, što vitajecca z usimi pa-rusku, jon ličyć, što ludzi pavinny zrazumieć, što jon nie miascovy. Jon taksama zajaŭlaŭ, što nie pavažaje litoŭcaŭ.
1 sakavika videa, jakoje nabrała 40 000 prahladaŭ, było vydalenaje. Julija patłumačyła, što joj daviałosia heta zrabić, inakš videa vydaliŭ by sam Youtube. Jana padzialiłasia listom, jaki napisaŭ biełarus, jaki nazyvaŭ kiraŭnictva Litvy «durniami». «Dobry dzień. Na vašym kanale vy padzialilisia videa z maim udziełam. Ja toj małady čałaviek, ź jakim vy niadaŭna hutaryli. Ja nahavaryŭ šmat niepatrebnaha pra vašu movu i kulturu. Chaču prabačycca i paprasić vydalić videa. U mianie ciapier pačalisia prablemy. Vydalicie videa, ci ja budu vymušany źviarnucca sa skarhaj da kiraŭnictva Youtube», — pisaŭ biełarus.
«Pakul videa było, dumaju, maje hledačy pierasłali jaho roznym viedamstvam, mahčyma, i Departamientu mihracyi. Pryznajusia ščyra, ja nie čakała, što heta videa buduć abmiarkoŭvać u navinach», — skazała błohierka, zaŭvažyŭšy, što źmiestam svaich materyjałaŭ jana nikoha nie choča abrazić ci pakryŭdzić. Vidavočna, prablemy biełarusa źviazanyja z rasśledavańniem Departamienta mihracyi.
29 lutaha pradstaŭnik DM Rokas Pukinskas skazaŭ partału Delfi, što ŭ dačynieńni da hetaha čałavieka raspačataje rasśledavańnie. Na pytańnie, čamu jon nie vučyć movu — ci nie tamu, što nie źbirajecca tut zatrymlivacca, jon skazaŭ, što maje namier viarnucca ŭ Biełaruś, bo tam spakojna. Na zaŭvahu, što i ŭ Litvie spakojna, małady čałaviek zajaviŭ, što žyćcio ŭ Litvie jamu naohuł nie padabajecca.
Bajpoł nazvaŭ imiony mahčymych zabojcaŭ Andreja Zielcara. I zajaviŭ, što siłavika «Nirvanu» zastreliŭ svoj ža6
Kamientary