Nichto nie razumieje, čamu hałoŭnaja praciŭnica Donalda Trampa zastajecca ŭ honcy. Miž tym jaje zadumy mohuć być samyja śmiełyja.
Niki Chejli sastupaje Donaldu Trampu. Heta stała vidavočna paśla prajmeryz — tak nazyvajuć pieradvybary ŭ ZŠA — u štatach Ajova i Ńju-Hiempšyr.
Palityčnyja analityki daŭno viedajuć, što raskłady palityčnych pieravah u ZŠA takija: chto pieramahaje na prajmeryz u kansiervatyŭnaj Ajovie i libieralnym Ńju-Hiempšyry adnačasova, toj pieramoža i ŭ krainie ŭ cełym. I tam, i tam Tramp nabraŭ bolš za pałovu hałasoŭ, pryčym adnaznačna. I dalej jon pieramoh u Paŭdniovaj Karalinie, nabraŭ tam 60 pracentaŭ hałasoŭ, a Chejli — tolki 40. Jano to nie vialiki razryŭ, ale ž Paŭdniovaja Karalina — radzima Chejli, dzie jana była hubiernatarkaj. Kali Tramp pieramoh jaje navat na jaje poli, to što havaryć pra astatnija štaty, dzie jon karystajecca padtrymkaj navat 70 pracentaŭ vybarcaŭ? Tym nie mienš, Chejli zastajecca ŭ honcy. Jana sabrała svaje 25 % hałasoŭ u Mičyhanie, a ciapier navat pieramahła ŭ staličnaj akruzie Kałumbija: Tramp niezdarma choča navieści ŭ Vašynhtonie šorhatu.
U amierykanskaj palityčnaj tradycyi kandydaty, jakija nie majuć šancaŭ, zvyčajna zdymajucca z honki. Kab nie marnavać hrošy na kampaniju i nie padryvać adzinstva partyi. Ale Chejli nie zdymajecca.
Što heta moža aznačać?
Mahčyma, jana takim čynam napracoŭvaje sabie bazu dla startu na nastupnych vybarach. Ale płan moža być i jašče bolš ambitny.
Chejli abapirajecca na tych, kaho možna nazvać «tradycyjnymi respublikancami», «prychilnikami tradycyjnych respublikanskich kaštoŭnaściej». Jana praciahvaje liniju Rejhana, Bušaŭ, Makiejna i Romni — usie apošnija, darečy, byli rezka krytyčnyja adnosna Trampa.
U toj ža čas Chejli taksama zastajecca adzinym maładym tvaram kampanii. Bajdenu 81 hod, Trampu 77, i hety paŭtor honki-2020 mnohich razdražniaje, heta vypadak, kali zmahacca buduć dva kandydaty, jakija abodva majuć niehatyŭnyja rejtynhi, choć i ćviordaje jadro prychilnikaŭ taksama.
U toj ža čas za Chejli masava hałasujuć nie tolki pamiarkoŭnyja respublikancy, ale i biespartyjnyja i navat častka demakrataŭ.
Ci nie maje Chejli namieru ŭvarvacca ŭ hety dvuboj u jakaści niezaležnaha kandydata? Ad časoŭ Džordža Vašynhtona ŭ historyi ZŠA nie było vypadkaŭ, kab kandydat nie ad dźviuch vialikich partyj pieramahaŭ. Maksimumam stali 19% Rosa Piero ŭ 1992 hodzie. Ale ŭsio niekali zdarajecca pieršy raz.
A navat kali hetaja dačka vychadcaŭ ź Indyi nie pieramoža, ci nie jana ŭ vypadku svajho ŭdziełu vyznačyć vynik vybaraŭ?
Ułady zapuścili fłešmob: rabotniki i vajskoŭcy prosiać Łukašenku bałatavacca VIDEA20
Kamientary