U Trampa zastałasia tolki adna supiernica pierad vybarami-2024. Chto takaja Niki Chejli?

Niki Chejli (Nikki Haley) na fonie Donalda Trampa, svajho kankurenta pa Respublikanskaj partyi ŭ zmahańni za mandat na prezidenckich vybarach, vyhladaje jaho dačkoj. Kali Trampu 77 hadoŭ, to Chejli niekalki dzion tamu (20 studzienia) adśviatkavała svoj 52-hi dzień narodzinaŭ.

Kali Tramp — amierykaniec u druhim pakaleńni (jaho dziadula z babulaj z boku baćki byli niamieckimi emihrantami), to Chejli naradziłasia ŭ ZŠA ŭ siamji emihrantaŭ-sikchaŭ ź indyjskaha štatu Piendžab. Jaje imia pry naradžeńni Nimrata Randchava.

Jaje baćka mieŭ stypiendyju na navučańnie ad Univiersitetu Brytanskaj Kałumbii (Kanada), a paśla atrymańnia stupieni doktara navuk razam ź siamjoj pierajechaŭ u Paŭdniovuju Karalinu. Tam jon vykładaŭ bijałohiju ŭ kaledžy. Maci Chejli paśla siami hadoŭ vykładańnia ŭ dziaržaŭnaj škole adkryła bucik žanočaha adzieńnia. Na toj čas Niki było čatyry hady.

Jak bačym, Chejli, u adroźnieńni ad Trampa, nie moža pachvalicca ni vialikaj biznes-impieryjaj, ni ŭdziełam u telešou i kino. Ale jaje baćkam, jakija hadavali piaciora dziaciej, chapiła hrošaj, kab addać dačku ŭ pryvatnuju siaredniuju škołu.

Pavialičyć

Paśla jaje zakančeńnia Niki atrymała stupień bakałaŭra ŭ śfiery buchhałtarskaha ŭliku i finansaŭ u dziaržaŭnym Klemsanskim univiersitecie — druhim pa kolkaści studentaŭ univiersitecie štata Paŭdniovaja Karalina. U śpisie najlepšych univiersitetaŭ ZŠA za 2023 hod ad Forbes jon znachodziŭsia na 113-m miescy.

Ź siamiejnaha biźniesu ŭ palityku

Pačynajučy z 12 hadoŭ Niki dapamahała maci vieści buchhałteryju ŭ kramie. Paśla zakančeńnia univiersitetu jana niekatory čas papracavała ŭ kampanii pa pierapracoŭcy adkidaŭ, a zatym dałučyłasia da siamiejnaha biźniesu, jaki z mahazina pieratvaryŭsia ŭ firmu, jakaja vypuskaje vysakajakasnaje adzieńnie.

U 1996 hodzie Chejli vyjšła zamuž, a ŭ chutkim časie zaniałasia hramadskaj dziejnaściu. Ciapier jaje muž — aficer Nacyjanalnaj hvardyi Paŭdniovaj Karaliny. U ich dvoje dziaciej.

U 1998 hodzie Niki Chejli była pryznačana ŭ radu dyrektaraŭ Handlovaj pałaty adnoj z akruh štata Paŭdniovaja Karalina. A ŭ 2004 hodzie stała prezidentam Nacyjanalnaj asacyjacyi žančyn-pradprymalnic. U tym ža hodzie jana bałatavałasia ad Respublikanskaj partyi ŭ Pałatu pradstaŭnikoŭ štata Paŭdniovaja Karalina, i ŭ 32 hady stała pieršaj amierykankaj indyjskaha pachodžańnia, jakaja zaniała hetuju pasadu ŭ štacie.

Chiejli prabyła ŭ pałacie pradstaŭnikoŭ try terminy, a ŭ 2010 hodzie była abranaja hubiernataram Paŭdniovaj Karaliny. U 2014 hodzie jaje pieraabrali na druhi termin.

U 2016 hodzi Niki Chejli była ŭklučana časopisam Time ŭ śpis 100 samych upłyvovych ludziej śvietu. A ŭ 2017 hodzie jana padała ŭ adstaŭku, kab stać pradstaŭnikom ZŠA pry AAN. 31 studzienia 2018 hoda Chejli syšła z hetaj pasady.

Palityčnyja pohlady

Niki Chiejli ličycca kansiervataram. Jana vystupaje za ŭzmacnieńnie emihracyjnaha zakanadaŭstva, suprać hiej-šlubaŭ i abortaŭ.

Pad čas svajho hubiernatarstva jana padtrymała zakon, jaki patrabuje ad pracadaŭcaŭ dakazvać, što znoŭ naniatyja rabotniki zjaŭlajucca zakonnymi rezidentami Złučanych Štataŭ, a taksama patrabuje, kab usie mihranty zaŭsiody mieli pry sabie dakumient, jaki paćviardžaje, što jany zakonna znachodziacca ŭ Złučanych Štatach.

Taksama na jaje rachunku jak hubiernatara pryniaćcie ŭ Paŭdniovaj Karalinie zakonu ab zabaronie abortaŭ paśla 20 tydniaŭ, jaki raspaŭsiudžvajecca na achviaraŭ zhvałtavańniaŭ i incestu, adnak dazvalaje miedycynskaje ŭmiašalnictva ŭ vypadku pahrozy žyćciu maci.

Chiejli vystupaje za abnaŭleńnie Respublikanskaj partyi i vykazvajecca suprać prafsajuzaŭ. Jana taksama ličyć, što srodki, jakija vydzialajucca na dziaržaŭnuju adukacyju, mohuć być vykarystany bolš efiektyŭna. U 2012 hodzie Chejli realizavała płan, pa jakim zarobak nastaŭnika vyznačacca nie tolki stažam i kvalifikacyjaj, ale i pradukcyjnaściu pracy. Ich kvalifikacyjny rejtynh ciapier zaležyć ad acenak i spravazdač kiraŭnikoŭ, vučniaŭ i baćkoŭ.

Pavialičyć

U časie znachodžańnia na pasadzie pastajannaha pradstaŭnika ZŠA pry AAN Niki Chejli vystupała za zachavańnie sankcyj suprać Rasii da toj pary, pakul Krym nie vierniecca ŭ skład Ukrainy. Jana zajaŭlała, što Vašynhtonu treba nie daviarać Rasii, a surjozna adnosicca da pahrozy ź jaje boku.

Prezidenckaja kampanija

Paśla sychodu z pasady ŭ AAN u mai 2019 hoda Niki Chejli ŭvajšła ŭ skład rady dyrektaraŭ kampanii Boeing.

U lutym 2023 hoda Chejli aficyjna vyłučyła svaju kandydaturu dla ŭdziełu ŭ prezidenckich vybarach ad Respublikanskaj partyi.

U červieni 2023 hoda Nikki Chejli raskrytykavała svaich supiernikaŭ na respublikanskich prajmieryz Donalda Trampa i hubiernatara štata Fłaryda Rona Desancisa za ich admovu prama adkazvać na pytańnie ab tym, ci chočuć jany pieramohi Ukrainy ŭ vajnie z Rasijaj.

Chejli zajaviła, što nielha nazyvać rasijskuju ahresiju «terytaryjalnaj sprečkaj» abo zaklikać da niejtralitetu Złučanych Štataŭ u hetym pytańni. «Pieramoha Ukrainy — u intaresach našaj nacyjanalnaj biaśpieki», — dadała jana. 

Ab vajnie Izraila i CHAMAS Chejli zajaviła: «Ja b skazała Izrailu: my pavinny zrabić usio, što vam treba, kab nie prosta viarnuć svaju krainu, a źniščyć terarystaŭ».

Na prajmieryz Respublikanskaj partyi ŭ štacie Ajova Niki Chejli atrymała 19,1% hałasoŭ, zaniaŭšy treciaje miesca. Na druhim byŭ Ron Desancis (21,2%) hałasoŭ.

Učora stała viadoma, što Desancis źniaŭ svaju kandydaturu i vykazaŭsia ŭ padtrymku Donalda Trampa. Heta adbyłosia za dva dni da prajmieryz Respublikanskaj partyi ŭ druhim štacie ZŠA — Ńju-Hempšyry. Takim čynam ciapier z Donaldam Trampam za mandat ad respublikancaŭ budzie zmahacca tolki Niki Chejli.

Na sustrečy z svaimi prychilnikami ŭ Ńju-Hempšyry 21 studzienia Tramp nazvaŭ Chejli prabajdenaŭskim kandydatam i abvinavaciŭ jaje ŭ imknieńni raspalić vajnu.

U toj ža čas Chejli ŭ intervju telekanału CBS zajaviła, što psichičnaje zdaroŭje Bajdena za apošnija hady pahoršyłasia.

Čytajcie jašče:

Tramp vyjhraŭ kokusy ŭ Ajovie

Hałoŭny supiernik Trampa siarod respublikancaŭ źniaŭsia z vybaraŭ na jaho karyść

Ci zmoža Niki Chejli vybić Trampa? Debatuje jana pryŭkrasna

• 33
• 0
• 2
• 5
• 5
• 4
• 8
• 0