Finski kancern Olvi choča pradać «Lidskaje piva», a nie moža

U svajoj hadavoj spravazdačy finski vytvorca piva i napojaŭ Olvi adznačyŭ, što, niahledziačy na papraŭki ŭ zakanadaŭstva, kampanija pa-raniejšamu nie maje dazvołu na prodaž akcyj svajoj daččynaj kampanii ŭ Biełarusi, pišuć «Biełarusy i rynak».

«Niahledziačy na papraŭki, uniesienyja ŭ zakanadaŭstva, jakoje zabaraniaje prodaž kampanij z zamiežnym udziełam u Biełarusi, zabarona na prodaž akcyj daččynaj kampanii Olvi zastajecca ŭ sile, i zaraz u Olvi niama dazvołu na prodaž akcyj», — havorycca ŭ spravazdačy hrupy za studzień-śniežań minułaha hoda.

U 2022 hodzie Olvi na fonie pačatku vajennych dziejańniaŭ va Ukrainie abviaściła pra spynieńnie ekspartu piva i napojaŭ na rasijski rynak i namierach pradać svoj biełaruski aktyŭ — «Lidskaje piva». Uletku taho ž hoda «Lidskaje piva» było ŭklučana ŭradam Biełarusi ŭ pieralik zamiežnych aktyvaŭ, abmiežavanych da prodažu.

Bolš za toje, u druhim kvartale 2023 hoda paśla śpiecyjalnaj pravierki Kamiteta dziaržaŭnaha kantrolu na «Lidskaje piva» byŭ nakładzieny štraf 12,2 młn jeŭra.

Finy jaho zapłacili i abviaścili, što zdymajuć z paradku dnia pieramovy ab mahčymym prodažy biźniesu ŭ Biełarusi. Jak adznačana ŭ spravazdačy, «Biełaruskaja daččynaja kampanija Olvi pracuje za košt ułasnaha finansavańnia». Za košt jaje dachodaŭ u 2023 hodzie byli ažyćcioŭleny «zamiaščalnyja inviestycyi, nieabchodnyja dla bieśpierapynnaści vytvorčaści». Ich suma skłała 2 młn jeŭra.

U siaredzinie kastryčnika 2023 hoda Alaksandram Łukašenkam byŭ padpisany ŭkaz, jaki źmianiŭ umovy adčužeńnia ŭłasnaści dla kampanij z kapitałam ź niedružalubnych krain. U pryvatnaści, u adpaviednaści ź im pry prodažy biźniesu ŭłaśnika abaviazali pieraličvać u kaznu 25% ad abjomu ŭhody. Ale, jak vynikaje sa spravazdačy Olvi, dla asobnych inviestaraŭ, jakija žadajuć pradać biznes, ukaz nie admianiaje nieabchodnaść vyklučeńnia z «čornaha śpisu». Jakoha moža i nie zdarycca.

I tamu Olvi vymušanaja praciahvać pracu ŭ Biełarusi ŭ «značnaj niavyznačanaści». Jakaja, u svaju čarhu, abumoŭlena» pasłableńniem abmiennaha kursu, niepradkazalnaściu apieracyjnaha asiarodździa i miascovaha zakanadaŭstva, handlovymi sankcyjami i funkcyjanavańniem finansavych apieracyj z krainami Zachadu».

Pa vynikach minułaha hoda pry roście prodažaŭ piva (+8,7% da 2022 hoda) u fizičnych abjomach, u hrašovym vyražeńni biełaruski biźnies Olvi ŭpieršyniu za mnohija hady asieŭ na 2,1% — da 135,3 młn jeŭra.

U cełym ža prodažy hrupy vyraśli na 8% i skłali 630,6 młn jeŭra. Prybytak pavialičyŭsia navat na 411,2% — da 38,5 młn jeŭra.

• 1
• 0
• 5
• 6
• 1
• 1
• 3
• 0