U Niamieččynie 21-hadovy biełarus, pieravoziačy nielehałaŭ, pyrsnuŭ piercam u tvar palicejskaha. Zatrymlivali z pahoniaj

U Bavaryi zatrymali 21-hadovaha biełarusa, jaki vioz u aŭtamabili troch siryjcaŭ-nielehałaŭ. Pra heta paviedamlaje sajt «Biełaruś i śviet» sa spasyłkaj na palicyju.

Incydent adbyŭsia ŭ aŭtorak na trasie B2 niedaloka ad nasielenaha punkta Mitenvald na miažy Niamieččyny z Aŭstryjaj. Kali aŭtamabil z polskimi numarami padjechaŭ da miesca kantrolu, kiroŭca nie źniziŭ chutkaść, praihnaravaŭ sihnały supracoŭnika spynicca i praskočyŭ mima. Jak paźniej raspavioŭ adzin ź siryjcaŭ, mašyna ździejśniła manieŭr uchileńnia, z-za čaho jaje zaniesła, tak što pasažyry spałochalisia za svajo žyćcio.

Tut ža pačaŭsia pieraśled. Ubačyŭšy chutkuju reakcyju pravaachoŭnikaŭ, kiroŭca adrazu zrazumieŭ, što płan prarvacca i źjechać nie spracavaŭ. Prykładna praz paŭkiłamietra jon rezka nacisnuŭ na tormaz, vyskačyŭ z mašyny i kinuŭsia ŭ les.

Adzin z palicejskich pieršym dahnaŭ našaha ziemlaka, ale toj raspyliŭ jamu ŭ vočy haz ź piarcovaha bałončyka. Uciačy ad pahoni mužčynu nie ŭdałosia. Jaho dahnali inšyja vartavyja paradku i nadzieli kajdanki.

Tym časam ich kalehi zanialisia pasažyrami, jakija, vidavočna, byli ašałomlenyja i zastalisia ŭ mašynie. Siryjcaŭ asobna ad kiroŭcy dastavili ŭ pastarunak Harmiš-Partenkirchiena. Pavodle atrymanych źviestak, za nielehalnaje padarožža ź Siryi ŭ Niamieččynu im daviałosia zapłacić blizu 15 tysiač jeŭra na čałavieka. Usie troje mužčyn va ŭzroście 18, 23 i 28 hadoŭ padali prašeńni ab pradastaŭleńni prytułku. Ich adpravili ŭ centr pieršasnaha pryjomu biežancaŭ i pierasialencaŭ u Miunchienie.

Paciarpiełaha ad piarcovaha hazu vartavoha paradku na mašynie chutkaj dapamohi dastavili ŭ kliniku Harmiš-Partenkirchiena dla dalejšaha lačeńnia vačej. Jon časova niazdolny da słužby, ale surjoznych nastupstvaŭ dla zdaroŭja nie prahnazujecca.

U dačynieńni da našaha suajčyńnika, jaki maje polskuju vizu, inśpiekcyjaj horada Rozienchajm viadziecca rasśledavańnie. Jaho padazrajuć u niezakonnym uvozie zamiežnikaŭ, supracivie pravaachoŭnikam i pryčynieńni cialesnych paškodžańniaŭ. U sieradu dniom mužčyna paŭstaŭ pierad akruhovym sudom Miunchiena.

Sudździa zadavoliŭ chadajnictva prakurora i rasparadziŭsia papiarednie źmiaścić biełarusa pad vartu. Jaho dastavili ŭ papraŭčuju ŭstanovu Miunchien-Štadelchajm.

• 2
• 0
• 4
• 10
• 2
• 1
• 2
• 0