U Litvie nie pabudujuć nacyjanalny stadyjon. Bo inviestar prajhraŭ $18 miljonaŭ u kazino
Projhryš u kazino adnym z kiraŭnikoŭ inviestycyjnaha fondu pastaviŭ pad pahrozu budaŭnictva Nacyjanalnaha stadyjona ŭ Litvie, a taksama nanies straty piensijnym fondam niekalkich krain Bałtyi.
Jak piša Reuters, kampanii, jakija naležać BaltCap, najbujniejšamu upraŭlajučamu fondami pramych inviestycyj u krainach Bałtyi, padajuć u sud na byłoha supracoŭnika, jaki niezakonna prysvoiŭ 16,7 miljonaŭ jeŭra (kala 18 miljonaŭ dołaraŭ).
Abvinavačany — były prezident kampanii BaltCap Šarunas Ściepukonis (Šarūnas Stepukonis). Rastraty byli vyjaŭleny vosieńniu minułaha hoda ŭ chodzie rehularnaj pravierki. U listapadzie kampanija razarvała kantrakt ź Ściepukonisam. Paźniej litoŭskaja prakuratura paviedamiła, što pačałosia kryminalnaje rasśledavańnie pa fakcie niezakonnaha prysvajeńnia aktyvaŭ. Rasśledavańnie pravodzić Jeŭrapiejskaja prakuratura (EPPO).
U abvinavačvańni havorycca ab tym, što Ściepukonis niezakonnym šlacham zavałodaŭ hrašyma z rachunkaŭ troch kampanij, kiraŭnikom jakich jon źjaŭlaŭsia, i raźmiaściŭ hetyja srodki na rachunkach litoŭskich i estonskich apierataraŭ kazino.
Fond BaltCap zarehistravany ŭ Estonii ŭ 2017 hodzie. U jaho inviestavali Jeŭrapiejski bank rekanstrukcyi i raźvićcia i Jeŭrapiejski inviestycyjny bank. Apošni zjaŭlajecca kredytnym padraździaleńniem ES, heta tłumačyć, čamu spravaj zajmajecca Jeŭrapiejskaja prakuratura, a nie prakuratura kankretnaj krainy.
Fond BaltCap inviestavaŭ u raznastajnyja prajekty ŭ Litvie, Łatvii. Dziejańni Ściepukonisa pryviali da taho, što estonski piensijny fond Swedbank vymušany byŭ śpisać piatuju častku svaich inviestycyj — 2 miljona jeŭra. Paviedamlajecca ab tym, što straty panieśli i litoŭskija piensijnyja fondy.
Nastupstvy dla Nacyjanalnaha stadyjona Litvy
Adna z kampanij, jakaja ŭvachodzić u BaltCap, zjaŭlajecca kancesijanieram budaŭnictva nacyjanalnaha stadyjona Litvy ŭ Vilni.
Budaŭnictva stadyjona — adzin ź litoŭskich daŭhabudaŭ. Jaho historyja pačałasia jašče za savieckim časam. Jak piša lrt.lt, pieršy raz raboty pačalisia ŭ 1987 hoda, ale byli spynieny praz šeść hadoŭ. U 2008 hodzie ŭ prajekt inviestavali 33 miljony jeŭra. Ale i na hety raz raboty byli spynieny.
Niezavieršany budynak stadyjona byŭ źniesieny ŭ 2022 hodzie. U mai 2023 hoda pačałosia budaŭnictva pa novym prajekcie. U śniežni stała viadoma, što pracy na stadyjonie prypynienyja. Kampanija viadzie pieramovy z uładami horadu ab indeksacyi cen i paralelna namahajecca viarnuć hrošy, jakija prajhraŭ Ściepukonis.
Jak piša Reuters, pradstaŭniki kampanij, jakija naležać BaltCap, padali ŭ sud na dva kazino z patrabavańniem kampiensavać straty. Jany ličyć, što praduhledžany zakonam sistemy abarony i papiaredžańnia suprać admyvańnia hrošaj i patałahičnych schilnaściej da azartnych hulniaŭ u hetych kazino nie pracujuć.
Čytajcie jašče:
U Homieli brat skraŭ u siastry 12 tysiač jeŭra i patraciŭ na prastytutak i kazino
Biełarus vyjhraŭ u pokier bolš za 7 miljonaŭ dalaraŭ
Minčuk za sutki skraŭ 39 tysiač rubloŭ i ŭsio prajhraŭ u kazino
Ci stała praściej zapisacca na polskuju vizu paśla ŭviadzieńnia fotavieryfikacyi? Dośvied čytačoŭ5
Kamientary