Pucin hanarycca, što ekanomika Rasii stała pieršaj u Jeŭropie. Ale ci tak heta?
Na sustrečy z dalokaŭschodnimi pradprymalnikami Uładzimir Pucin zajaviŭ, što, choć Rasiju i «dušać» z usich bakoŭ, jaje ekanomika stała pieršaj pa abjomie ŭ Jeŭropie. Hetyja zajavy rastyražavała i biełaruskaja prapahanda. Ale ci jość čym hanarycca nasamreč?
Pa jakim pakazčyku Rasija na pieršym miescy ŭ Jeŭropie
Apisvajučy ekanamičnyja dasiahnieńni, prezident RF spasyłajecca na taki pakazčyk, jak VUP pa parytecie pakupnoj zdolnaści (PPZ). VUP pa PPS prostymi słovami — heta vymiareńnie VUP roznych krain z karekciroŭkaj na košt žyćcia ŭ roznych dziaržavach. Rabić heta nieabchodna dla mižnarodnaha paraŭnańnia, bo ŭ roznych krainach adzin i toj ža nabor tavaraŭ i pasłuh budzie kaštavać pa-roznamu, navat kali ličyć u adnoj i toj ža valucie.
Pa słovach Pucina, pa hetym pakazčyku Rasija apiaredziła Hiermaniju i zaniała piataje miesca ŭ śviecie — paśla Kitaja, ZŠA, Indyi i Japonii. Heta sapraŭdy tak, kali prytrymlivacca danych World Economics.
Pa danych MVF, u 2022-2023 hh. dola VUP Hiermanii ŭ suśvietnym VUP, raźličanaja pa PPZ, usio ž była bolšaj. Ale ŭ lubym vypadku ahučanyja Pucinym ličby naŭrad ci padstava dla honaru.
Paraŭnańnie chałodnaha ź ćviordym
Ekśpiertka BEROC Anastasija Łuzhina adznačaje, što pamier VUP pa PPZ — nie toj ekanamičny pakazčyk, jaki aptymalna padychodzić dla mižkrainavaha paraŭnańnia i śviedčyć pra pośpiechi ŭ ekanomicy.
«Kali ranžyravać krainy pa hetym pakazčyku, to na pieršym miescy znachodzicca Kitaj, na druhim ZŠA, a na trecim — Indyja».
Ekśpiertka kaža, što pravilniej paraŭnoŭvać ekanomiki roznych krain pa VUP pa PPZ na dušu nasielnictva.
«Usie krainy roznyja pamierami. U krainach, dzie bolš pražyvaje i pracuje ludziej, bolš resursaŭ dla vytvorčaści tavaraŭ i pasłuh. Niasłušna paraŭnoŭvać sukupny VUP pa PPZ, naprykład, Indyi i Bałharyi.
Pamiery ekanomiki Indyi i kolkaść zaniatych u nacyjanalnaj ekanomicy ludziej niepamierna bolšyja, čym u Bałharyi. Adnak heta nie aznačaje, što ekanomika Indyi bahaciejšaja. Tamu dla dakładniejšaha paraŭnańnia raźličvajecca VUP pa PPZ na dušu nasielnictva», — tłumačyć Łuzhina.
U pieraliku na dušu nasielnictva nie ŭsio tak radasna
Mienavita z pryčyny taho, što Rasija pa nasielnictvie samaja vialikaja kraina ŭ Jeŭropie (choć hieahrafična jaje bolšaja častka znachodzicca ŭ Azii), RF traplaje ŭ top krain śvietu i Jeŭropy pa PPZ.
Kali brać uzrovień VUP pa PPZ na dušu nasielnictva, to Rasija ŭ hetym rejtynhu budzie vyhladać užo nie tak vyhadna.
«Naprykład, u Kitai, jaki pa ŭzroŭni PPZ zajmaje pieršaje miesca, VUP pa PPZ na dušu nasielnictva składaje $23,3 tysiačy, u ZŠA — $80 tysiač, u Rasii — $35,3 tysiačy, a ŭ Indyi — $9,2 tysiačy, choć u ahulnym rejtynhu, na jaki spasyłajecca Pucin, Indyja znachodzicca na trecim miescy», — tłumačyć ekśpiert.
Tamu znachodžańnie Rasii na pazicyjach vyšejšych za bolšaść jeŭrapiejskich dziaržaŭ tłumačycca tym, što nasielnictva RF składaje kala 146,5 miljona čałaviek, u toj čas, jak u Hiermanii pražyvaje kala 84,4 miljona čałaviek, a ŭ Francyi — 68,7.
Robiačy padobnyja zajavy, prezident Rasii, a za im i biełaruskaja prapahanda, manipulujuć pakazčykami, uvodziačy ŭ zman ludziej.
Čytajcie taksama:
Biełaruś abahnała Rasiju pa ŭzroŭni siaredniaj piensii
«Za 7 hadoŭ zarobak vyras amal udvaja». Kolki zarablajuć biełaruskija kiroŭcy ŭ Jeŭropie
«Damokłaŭ Mieč». Kanał «Biełorusskij siłovik» nastolki prarasijski, što mnohija mierkavali, što heta rasijanie jaho viaduć. Nie, za im staić supierahient Łukašenki9
Kamientary