«Davodzim da rassłableńnia. Adzin raz — 100 rubloŭ. Dva razy — 200». Kuprejčyk raskazaŭ pra prastytucyju ŭ Minsku
Były siłavik, a ciapier supracoŭnik «Biełpoła» Maćviej Kuprejčyk u intervju kanału «Tok» raskazaŭ, jakuju infarmacyju prynosiła ahientka «Łambada», kolki prastytutak supracoŭničaje ź siłavymi strukturami i dzie najbolšaja kancentracyja prastytutak u Biełarusi.
Ahientka «Łambada»
Maćviej Kuprejčyk pracavaŭ u adździele pa narkakantroli i supraćdziejańni handlu ludźmi minskaj haradskoj milicyi. Mienavita z hetym adździełam supracoŭničała Alena Kuźmina, ci ahientka «Łambada». Pry jaje ŭdziele ŭ mai 2020 hoda była arhanizavanaja pravakacyja suprać Siarhieja Cichanoŭskaha.
Pa słovach byłoha siłavika, Kuźmina była dastatkova staroj infarmatarkaj, jakaja pastaŭlała siłavikam infarmacyju hadoŭ 20.
«Jana prynosiła dastatkova dobruju infarmacyju pra sutenioraŭ (chto biare hrošy z pradstaŭnic jaje prafiesii za «padhon» klijentaŭ). Byli niepasredna jaje klijenty, jakija narkotyki prymali ci raskazvali roznyja rečy, što jany, naprykład, handlujuć narkotykami», — raskazvaje Kuprejčyk i zaŭvažaje, što ŭ zvyčajnaj situacyi jon by pra heta nie raskazvaŭ, ale ŭčynak, jaki ździejśniła Kuźmina, dla jaho nie maje nijakich tłumačeńniaŭ i apraŭdańniaŭ. Tamu jon ličyć, što «pra jaje možna ŭsio raskazvać».
Pa słovach Maćvieja, u studzieni 2020-ha hoda ahientku «Łambadu» «śpisali». Heta tłumačycca tym, što «jana žančyna dastatkova va ŭzroście. Pierastała prynosić infarmacyju, a prynosiła ŭsialakuju łuchtu, jakaja ŭ bolšaści vypadkaŭ nie paćviardžałasia. Tamu ź joj było vyrašana spynić pracu».
Adnosna taho, ci atrymlivała «Łambada» za svaju infarmacyju hrošy, były siłavik raspaviadaje: «Było pa-roznamu. Jość sakretnyja narmatyŭnyja akty, jak płacić ahientury. Ale jana nie była płatnym ahientam». A infarmacyju jana davała dziela taho, kab jaje nie zatrymlivali:
«Jana prynosić apieratyŭniku dobruju infarmacyju, dziakujučy jakoj jon moža prypynić raspaŭsiudžańnie narkotykaŭ. A ŭ jaje administracyjny skład 17.5 (na toj momant heta było zaniaćcie prastytucyjaj). Zrazumieła, što lepš jaje adzin raz nie zatrymać, i jana tabie pryniasie narmalnuju infarmacyju, pa jakoj ty papracuješ i pasadziš sapraŭdnaha złačyncu ŭ turmu».
Kuprejčyk śćviardžaje, što ź milicyjaj supracoŭničaje kala 80 pracentaŭ minskich prastytutak. «Heta takija ludzi, jakija pracujuć, jak raniej u nas havaryli, na ŭsie raźviedki śvietu. Heta značyć, što adna dama lohkich pavodzin moža adnačasova pracavać i na KDB, i na MUS, i na HUUS, i być «davieranaj asobaj» (typu jak ahient, tolki ranhu trochi nižejšaha) u zvyčajnaha opiera samaha zaniapałaha rajončyka».
Były siłavik zhadvaje, što supracoŭniki sami ździŭlalisia, kali časam vyśviatlałasia, chto na kaho pracuje.
Čamu papularny zaniatak prastytucyjaj
Kuprejčyk raskazvaje, što ŭ kožnym načnym kłubie «siadzić minimum 20—25 takich dziaŭčat». U časy jaho pracy najbolšaj papularnaściu ŭ «takich dam» karystalisia Next club, Rich Sat, Bar:DOT.
Na dumku Kuprejčyka, žančyny iduć u prastytucyju pa roznych pryčynach:
«Ciapier nastaŭ taki čas, što ŭ suviazi z raźvićciom raznastajnych sajtaŭ typu OnlyFans, možna, ničoha nie robiačy, tolki vystaŭlajučy svaje aholenyja zdymki, zarabić hrošaj. Dla hetaha nie treba vałodać niejkimi zvyšmahčymaściami. Jość šmat prykładaŭ, kali dziaŭčaty, dy i mužčyny, jakija majuć vyšejšuju adukacyju, plujuć na ŭsio i iduć tudy.
Tolki jany trochi nie razumiejuć momantu. Kali ty pajšoŭ u takuju prafiesiju, jana časovaja. Tabie stanie 30—35 hadoŭ, a pryhažość — heta paniaćcie adnosnaje. Jaje lohka zhubić. Pastareješ, znojdziecca niechta maładziejšy. Jany nie razumiejuć, što kali dla ich skončycca heta prafiesija, na ich budzie stajać klajmo. I navat, kali jany majuć dypłom pa psichałohii ci jurysprudencyi, na ich buduć hladzieć zusim pa-inšamu.
Zrazumieła, što jość tyja, chto zarablaje na hetym narmalnyja hrošy i potym pieratvaraje ich u niejki biznes. Ale heta adzinki. Bolšaść mimalotna atrymlivaje niejkija vialikija hrošy i nie dumaje pra svaju budučyniu. Naprykład, tvajo dzicio vypadkova znojdzie niejki rolik u internecie. I jak ty jamu heta patłumačyš?»
Dzie šukać sutenioraŭ
Maćviej Kuprejčyk zhadvaje, što jamu davodziłasia zatrymlivać i sutenioraŭ. Pry hetym jon adznačaje, što «takoha paniaćcia «sutenior», jakoje my viedajem z amierykanskich filmaŭ (napałovu hanhstary, z puškaj za pazuchaj), heta nie pra Minsk i nie pra Biełaruś uvohule».
Były siłavik śćviardžaje, što suteniory — «zvyčajnyja ludzi. Čaściej za ŭsio, heta taksisty. Naprykład, jany viazuć klijenta i toj kaža: «Chacieŭ by pazabavicca z kim-niebudź. Moža, viedaješ dzie kaho?» Naturalna, jon nabiraje svajoj znajomaj i kaža: «Ty mnie 20 baksaŭ z klijenta, ja tabie jaho pryvožu. Kali nie, to ja pazvaniu inšaj, i jana pahodzicca». U nas, kali jon biare hrošy za takuju pasłuhu, aznačaje, što jon zajmajecca suteniorstvam».
Kuprejčyk zhadvaje vypadak, kali ŭ jaho była ahienturna-apieratyŭnaja sprava na achoŭnika kłuba Next Club: «Jaho zvali Siarhiej. Były amapaviec. Taki dubałom. Jon biŭ prastytutak. Adciskaŭ hrošy. Jamu mahli 20 dołaraŭ prynieści, a jon ličyŭ, što jamu vinnyja 50. I moh za heta źbić. Jaho zatrymali byłyja kalehi z AMAPu. Ja sam pravodziŭ zatrymańnie».
Maćviej zhadvaje, što kali jon sychodziŭ ź milicyi, suprać hetaha čałavieka była zaviedzienaja kryminalnaja sprava pa troch ci čatyroch paciarpiełych, jakimi byli «damy lohkich pavodzin». Ale paźniej Kuprejčyk pahladzieŭ pa bazach, jakija jość u «Biełpoła», i pabačyŭ, što «niejkim čynam jon admazaŭsia, chacia było na jaho ŭsio. Navat zapisy z kamieraŭ byli, jak jamu hrošy pieradavali».
Ci jość u Minsku bardeli
Kuprejčyk pryhadvaje, jak braŭ udzieł u zatrymańni supracoŭnicy tak zvanaha masažnaha sałona. Samaje cikavaje, na jaho pohlad, toje, što hety sałon znachodziŭsia praz try damy ad budynka śledčaha adździeła Leninskaha RUUS Minska.
Zhadvajučy vypadak z zatrymańniem supracoŭnicy «masažnaha sałona», były siłavik z uśmieškaj adznačaje:
«U ich heta nazyvajecca takimi zavualavanymi słovami — «davodzim da rassłableńnia. Adzin raz — 100 rubloŭ. Dva razy — 200». Heta była prykolnaja rabota z tym, jak jany sprabujuć (apraŭdacca — NN): «Ja ž nie skazała, što heta intymnyja pasłuhi. Heta ž rassłableńnie». I heta było viesieła».
«Roznyja byli momanty — i prykolnyja, i składanyja», — adznačaje były siłavik.
Hladzicie całkam:
U Biełaruskaj pravasłaŭnaj carkvie abnavili ceńnik? Voś jakija buduć rekamiendavanyja taryfy7
Kamientary