Čamu tak šmat dobraachvotnikaŭ užo zahinuła na vajnie? Mierkavańnie Sachaščyka
Učora stała viadoma pra hibiel vajara Paŭła Horbača. Heta 36-ja śmierć biełaruskaha dobraachvotnika ad pačatku poŭnamaštabnaj vajny va Ukrainie. Pra kolkaść biełarusaŭ, jakija vajavali va Ukrainie, i pryčyny stolkich achviaraŭ siarod biełaruskich dobraachvotnikaŭ «ministr abarony» ŭ Abjadnanym pierachodnym kabiniecie Valer Sachaščyk raniej razvažaŭ u intervju prajektu «Tok».
Pra biełaruskich dobraachvotnikaŭ
Valeryj Sachaščyk adznačyŭ, što dakładnuju statystyku kolkaści biełarusaŭ, jakija z pačatku vajny brali ŭdzieł u vajennych dziejańniach na baku Ukrainy, ciažka dać, bo jana nie viadziecca. Da taho ž ludzi chavajuć svaje imiony. I jany majuć na heta padstavy, bo ŭ Biełarusi pieraśledujuć ich rodnych.
«Ja dumaju, što nie mienš za tysiaču prajšło praz vajnu. Mahčyma, što i bolej», — ličyć Sachaščyk.
Valeryj nazyvaje vajaroŭ sapraŭdnymi hierojami, hienafondam i budučym našaj nacyi. Razam z hetym jon źviartaje ŭvahu na inšy aśpiekt:
«Kab być da kanca sumlennym, nieabchodna skazać, što vajna kalečyć usich. I ŭsie ludzi, jakija tam znachodziacca, asabliva tyja, što znachodziacca praciahły čas, asabliva jak Vaŭkałak, jaki šmat razoŭ byŭ paranieny i ŭžo paŭtara hoda znachodzicca ŭ voś hetych ciažkich abstavinach. Ja, naprykład, nie ŭpeŭnieny, što čałaviek całkam zmoža adnavić svaju psichiku».
Adkazvajučy na pytańnie, čamu biełaruskija aficery nie jeduć masava dobraachvotnikami vajavać za Ukrainu, Sachaščyk źviarnuŭ uvahu na šerah abstavin:
«Šmat ludziej pryvieźli siemji ci majuć siemji, jakija treba karmić. Nie kožny moža kinuć pracu i pajechać. Niejki areoł ramantyzmu, jaki, mahčyma, byŭ u pieršyja tydni vajny, asabliva dziakujučy paśpiachovym dziejańniam partyzanaŭ, kali kałony pa 60 kiłamietraŭ rasijskaj techniki stajali, i ich z najbližejšaha lesu, z uźlesku rasstrelvali z «Džavielinaŭ», i suadnosiny strat byli siem da adnaho na karyść ukraincaŭ… Heta była adna vajna.
Potym vajna pierakačavała ŭ step. Dzie pole bitvy roŭnaje, jak stoł, dzie nikudy nie schavaješsia, dzie nad taboju lotajuć rasijskija drony, karektujuć i pa tabie prylatajuć snarady i miny.
Ramantyki ŭ hetym mała. Heta nasamreč žachliva i strašna. Šmat ludziej zahinuła, samych vydatnych našych chłopcaŭ-biełarusaŭ. Niechta atrymaŭ ciažkija ranieńni. Niechta prosta vyharaŭ ad praciahłaha znachodžańnia ŭ stanie žachu, kryvi, biaskoncych śmierciaŭ i ranieńniaŭ vakoł. Ludzi zjechali. Heta vielmi składana. Dać hetamu acenku moža tolki čałaviek, jaki sam praz heta prajšoŭ. Heta niemahčyma zrazumieć pa knihach i filmach».
Čamu tak šmat dobraachvotnikaŭ užo zahinuła na vajnie
Adkaz na pytańnie pra pryčyny vialikaj kolkaści zahinułych biełarusaŭ u vajnie dla Valeryja Sachaščyka vielmi składany, bo jon vielmi baicca zakranuć čyjości samalubstva. Valeryj nazyvaje nastupnyja pryčyny:
«Pieršaja, jakaja najbolš vyznačalnaja, heta žachlivaja vajna, na jakoj hinuć tysiačy ŭkraincaŭ. Chiba što biełarusy panieśli straty suraźmierna ad svajoj kolkaści tym stratam, što niasuć ukraincy.
Razam z tym ja b pravodziŭ pracu nad pamyłkami, zapisvaŭ by dośvied. Na žal, jość vypadki, kali ludzi hinuli z-za nie zusim razumnych rašeńniaŭ kamandavańnia, z-za niedastatkovaha navučańnia. My pavinny pryznać, što takija vypadki, na žal, byli».
Hladzicie całkam:
Taćciana Zareckaja bolš nie estonskaja startapierka. Ciapier jana sprabuje stać pasiarednicaj inviestaraŭ u Saudaŭskaj Aravii6
Kamientary
Uviditie, ovno jeŝio vspłyviot!...
«Šmat ludziej pryvieźli siemji ci majuć siemji, jakija treba karmić. Nie kožny moža kinuć pracu i pajechać."
dyk ci jość biełaruskija aficery ŭ pryncypie? i ŭ pryncypie aficery? bo tyja, što zastalisia ŭ Biełarusi, jany nie biełaruskija, a russkoje oficaŕje, a tyja, što źjechali - u ich sieḿji...i-i