U biełaruskich lasach aktyvizavałasia niebiaśpiečnaje nasiakomaje. Dzie mienavita vodzicca i jakija nastupstvy
Uvosień u biełaruskich lasach aktyvizujecca nazojlivy parazit — alenievaja kryvasoska, taksama viadomaja jak łasinaja voš.
Asnoŭnymi haspadarami kryvasosak źjaŭlajucca aleni i łasi, ale znachodziać ich i ŭ poŭści lis, kabanoŭ, barsukoŭ, miadźviedziaŭ, sabak i navat na ptuškach.
Choć i pamyłkova, ale napadajuć i na ludziej: imknucca trapić na vałasy, začapicca za ich łapkami i pastaracca pražyć na novym nośbicie jak maha daŭžej. Dla hetaha jany navat skidvajuć kryły, paviedamlaje 1prof.by.
Sustrakajucca kryvasoski dniom, pieravažna ŭ ciopłyja, zacišnyja vosieńskija dni. Doždž i mocny viecier źnižajuć šaniec na ich natrapić. Atakujuć z dreŭ, jakija znachodziacca ŭ radyusie 50 mietraŭ, pry nizkich tempieraturach — z travy ŭ radyusie 15 mietraŭ. Laciać drenna, kryły im patrebnyja tolki dla taho, kab dabracca da achviary.
Łasinyja vošy pieranosiać barelii. Ale, jak raspaviała entamołah adździeła epidemijałohii Hrodzienskaha centra hihijeny i epidemijałohii Taćciana Hrankoŭskaja, vypadki zaražeńnia čałaviekam ad kryvasosak navucy pakul nieviadomyja.
Ukusy kryvasosak, u adroźnieńnie ad ukusaŭ błaščyc, balučyja. Na ich u čałavieka moža ŭźniknuć alerhičnaja reakcyja z pačyrvanieńniem skury, utvareńniem puchiroŭ i mocnym śvierbam. Ludziam, schilnym da alerhijaj, mohuć spatrebicca antyhistaminnyja preparaty.
Źbierahčysia ad ciesnaha znajomstva z parazitami moža ščylnaje adzieńnie, jakoje pryciskaje rukavy, a taksama štany, zapraŭlenyja ŭ čaraviki. U les z saboj abaviazkova treba brać hałaŭny ŭbor i akarycydnyja srodki.
Taksama ŭ centry hihijeny rajać paźbiahać miescaŭ, u jakich kryvasoski žyvuć čaściej za ŭsio. Naprykład, u barach i na vialikich adkrytych palanach im rabić niama čaho, — tam mienš šaniec zaskočyć na žyviołu. Zatoje takija šancy jość u ciažkaprachodnych miescach, zarosłych chmyźniakom.
Zrazumieła, pa viartańni ź lesu varta ŭvažliva ahledzieć svajo cieła i vopratku.
Jak mučyli Cila Švajhiera i centry haradoŭ, kab stvaryć karcinku dla sudzimaha za machlarstva prateže Dźmitryja Baskava15
Kamientary