U Minsku pradajecca čornaja i čyrvonaja kukuruza. Pryčym vyraščana jana ŭ Biełarusi
Na pryłaŭku staličnaha hipiermarkieta znajšli navinku — kukuruzu čornuju i čyrvonuju. Jość jašče i roznakalarovy varyjant. I ŭsia heta pryhažość — ajčynnaj vytvorčaści.
Ale kaštuje jana ŭ piać razoŭ daražej za zvyčajnuju. Karespandent «Minsk-Navinaŭ» paraŭnała ceny i razabrałasia, što heta za cud pryrody.
Za niezvyčajnuju, ale, pa sutnaści, zvykłuju raślinu prosiać 12,99 rubla za kiłahram (da źnižki — 17,5 rubla).
U inšym hipiermarkiecie pišuć «Pieruanskaja» za 16,99 rubla/kh. Dla paraŭnańnia: zvyčajnaja, žoŭtaja, kaštuje 2-3 rubli.
Abodva niestandartnyja varyjanty vyraščany ŭ Biełarusi. Vyvieŭ niezvyčajny hatunak u 2019-m zahadčyk łabaratoryi, kiraŭnik abjadnańnia pa intaresach «Hienietyka i sielekcyja» Respublikanskaha centra ekałohii i krajaznaŭstva Ivan Ruskich.
Natchniŭsia bijołah hatunkam Glass Gem (raspaŭsiudžany ŭ ZŠA). Jaho ziarniatki padobnyja da roznakalarovych prazrystych ledziašoŭ. Zdavałasia b, kupi nasieńnie i vyraści. Ale kapryznaja raślina naadrez admaŭlałasia asimilavacca. Biełarus źbiraŭ nasieńnie pa ŭsim śviecie, pierasyłali navat mieksikanski siniavata-čorny hatunak. Na pracu pajšło siem hadoŭ. I narešcie jon atrymaŭ unikalnuju pryhažość Made in Belarus.
Ułasna, ciapier vyraścić takuju ž niezvyčajnuju kukuruzu moža luby. U prodažy jość nasieńnie pad nazvami «Hrafici» i «Kanfieci».
Darečy, adzin biełaruski błohier chvaliŭsia hod tamu ŭdałaj sprobaj.
Kazaŭ, vymachała raślina pad try mietry ŭ vyšyniu. Choć spačatku ziarniatki ŭ katachach byli absalutna nie charakternaha małočnaha adcieńnia. Ale saśpieli całkam i pakazali siabie va ŭsioj pryhažości.
A ciapier pra hałoŭnaje: ci možna jeści? Na etykietcy zajaŭlena «Cukrovaja», ale na vyhlad ziarniatki zdajucca ćviordymi. Tyja, chto kaštavaŭ, kazali, što jeści možna.
Pavodle acenak śpiecyjalistaŭ, jašče i karysna. I. Ruskich padkreślivaŭ: čornuju afarboŭku nadaje antacyjan (antyaksidant).
Jość jašče adzin cikavy hatunak — «Suničnaja palana». Vyhladaje jak vielizarnaja pieraśpiełaja jahada. Ale vytvorca sumlenna paznačaje: pryjemnaja na smak u małočnaj śpiełaści.
Kamientary