Da šaści z pałovaj hadoŭ kałonii prysudzili byłoha staršyniu Chocimskaha rajvykankama
Były staršynia Chocimskaha rajvykankama atrymaŭ 6 hadoŭ kałonii ŭzmocnienaha režymu i štraf u pamiery 300 bazavych vieličyń (11,1 tysiačy rubloŭ). Jaho pryznali vinavatym u pieravyšeńni ŭłady i zamachu na atrymańnie chabaru.
Pavodle abvinavačańnia, čynoŭnik niekalki hadoŭ ździajśniaŭ złačynstvy suprać intaresaŭ słužby.
«U pryvatnaści, u krasaviku 2020 hoda jon daŭ niezakonnyja ŭkazańni kiraŭniku sielskahaspadarčaha pradpryjemstva, jaki ŭ siłu zajmanaj pasady znachodziŭsia ŭ zaležnym ad jaho stanoviščy, ab zaklučeńni damovy na nabyćcio karmoŭ dla bujnoj rahataj žyvioły biez praviadzieńnia pracedury zakupki pa vidavočna zavyšanych cenach.
Akramia taho, za spryjalnaje vyrašeńnie nazvanaha pytańnia abvinavačany patrabavaŭ ad pradstaŭnika kamiercyjnaj arhanizacyi ŭznaharodžańnie ŭ vyhladzie 5% ad sumy ŭhody», — paviedamlaje prakuratura Mahiloŭskaj vobłaści.
Dziejańni staršyni rajvykankama pryčynili škodu ŭ asabliva bujnym pamiery ahrarnamu pradpryjemstvu, a taksama istotnuju škodu dziaržaŭnym i hramadskim intaresam, zajaŭlaje prakuratura.
Padčas sudovaha pasiadžeńnia abvinavačany pryznaŭ siabie vinavatym u pieravyšeńni ŭłady, adnak admaŭlaŭ fakt zamachu na atrymańnie chabaru.
Z sakavika 2020 hoda da sakavika 2023-ha pasadu staršyni Chocimskaha rajvykankama zajmaŭ Michaił Kuksiankoŭ.
Michaiłu Kuksiankovu 43 hady, sam jon rodam sa Škłova. Na pasadu staršyni Chocimskaha rajvykankama jaho pryznačyli 18 sakavika 2020 hoda, a da hetaha Kuksiankoŭ pracavaŭ u Škłoŭskim rajvykankamie, byŭ načalnikam upraŭleńnia pa sielskaj haspadarcy i charčavańni, namieśnikam staršyni, a taksama pieršym namieśnikam staršyni. Z 2015 hoda i da pracy ŭ Škłoŭskim rajvykankamie jon pracavaŭ dyrektaram Babrujskaha handlovaha centra Mahiloŭskaha abłspažyŭsajuza.
«Jana nie ŭ turmie, a na śpiecdačy KDB!» Kanśpirołahi nakinulisia na Kaleśnikavu12
Kamientary