Rakieta Taurus — niamiecka-šviedski anałah brytanska-francuzskich Storm Shadow. Adnak jana maje šerah adroźnieńniaŭ.
Rakiety Storm Shadow byli raspracavanyja ŭ 1990-ja hady francuzskaj kampanijaj Matra i brytanskaj British Aerospace. U francuzskaj armii hetaja rakieta maje nazvu Scalp. Pastaŭki rakiet ukrainskamu boku robić Vialikabrytanija z maja hetaha hoda, a rakiety Scalp ad Francyi pačali pastaŭlacca ŭ pačatku žniŭnia.
Rakiety Taurus byli taksama raspracavanyja ŭ 1990-ch sumiesnymi namahańniami niamieckaj kampanii Daimler-Benz Aerospace i šviedskaj Bofors. Ab pastaŭkach hetych rakiet Ukrainie tolki viaducca razmovy.
Abiedźvie rakiety adnosiacca da kłasa «pavietra — ziamla» i pryznačanyja dla paražeńnia nieruchomych celaŭ na vialikaj adlehłaści.
Jany padobnyja pamiž saboju pa vazie. Storm Shadow važyć 1300 kh, Taurus — 1360. Majuć adnolkavuju daŭžyniu (5,1 m), ale ŭ Taurus bolšy dyjamietr (1,08 m suprać 0,48 m).
Rakieta Storm Shadow maje dvuchstupiennuju bojehałoŭku typu Broach vahoj 450 kh. Pieršaja stupień — kumulatyŭny zarad, pryznačany dla prabivańnia brani, bietonu, ćviordaha hruntu. Druhaja častka — fuhasny zarad, jaki ŭzryvajecca ŭnutry celi.
U Taurus vykarystoŭvajecca anałahičnaja bojehałoŭka, ale typu Mephisto. Ahulnaja masa bojehałoŭki składaje 481 kh, ź jakich 45 kh prychodzicca na kumulatyŭny i 56 kh na fuhasny zarady.
Dalnaść palotu Taurus składaje zvyš 500 km (ale ekspartnyja viersii majuć dyjapazon palotu ad 300 da 400 km), u Storm Shadow — zvyš 560 km (adnak u rakiet, jakija pastaŭlenyja Ukrainie, — da 250 km).
Takim čynam, abiedźvie rakiety navat z abmiežavanym radyusam palotu mohuć nakryć usie akupavanyja terytoryi, u tym liku i paŭdniovy bierah Krymu.
Usie pracedury naviadzieńnia abiedźviuch rakiet vykonvajucca na ziamli praz vynosny pult. Samalotu advodzicca zadača prosta padniać rakietu ŭ pavietra i dastavić jaje bližej da celi. Paśla pusku rakieta samastojna dasiahaje celi.
Sistema naviadzieńnia ŭ rakiet taksama padobnaja. Jany vykarystoŭvajuć iniercyjnuju navihacyjnuju sistemu, GPS i sistemu navihacyi pa etałonie łandšaftu.
Ale rakieta Taurus maje bolš daskanałuju sistemu. Jana vykarystoŭvaje navihacyju na asnovie vyjavy. Dziakujučy vykarystańniu kambinavanych padsistem rakieta moža pralacieć vialikija adlehłaści bieź nieabchodnaści vykarystańnia GPS.
Rakietu ciažej źbić z maršrutu, jana moža iści pa składanaj trajektoryi, abychodziačy sistemy supraćpavietranaj abarony. Na padlocie Taurus aktyvizuje infračyrvonuju hałoŭku samanaviadzieńnia.
Rakiety Storm Shadow majucca na ŭzbrajeńni dziesiaci krain. Uzbrojenyja siły Ukrainy vykarystoŭvajuć hetuju rakietu z madernizavanymi starymi savieckimi samalotami Su-24.
Pytańnie intehracyi z hetymi samalotami rakiet Taurus pad pytańniem. Jany mahli b vykarystoŭvacca razam z samalotami F-16, jakija, pa samych śmiełych prahnozach, USU mohuć atrymać da kanca hetaha hoda.
Rakiety Taurus dahetul stajali na ŭzbrajeńni tolki troch krain: Hiermanii, Ispanii i Paŭdniovaj Karei.
Čytajcie jašče:
Ukraina atrymała francuzskija dalnabojnyja rakiety SCALP-EG
Rakiety Storm Shadow zmusiać Čarnamorski fłot pakinuć Sievastopal?
Kamientary