Cimanoŭskaja raspaviała pra nahodu dla honaru, adkaz u sacsietkach Azaronku, prafiesijnaje i asabistaje

— Vam dazvolili vystupać za zbornuju Polščy. Jakimi byli pieršyja pačućci paśla hetaj naviny? Ci nie było tuhi pa tym, što Biełaruś kančatkova zastałasia ŭ minułym?

— Pa-pieršaje, ja nie liču, što Biełaruś zastałasia dla mianie ŭ minułym (jana była, jość i budzie) — u minułym zastałasia biełaruskaja zbornaja. Pa-druhoje, adbyłosia heta nie ciapier, a dva hady tamu, mienavita tamu nijakich sumnych dumak nie było.

A kali kazać pra pieršyja ŭražańni, to ja nie adrazu pavieryła ŭ hetuju navinu. Mnie patelefanavaŭ trenier i paviedamiŭ, što ja jedu na zbory, tamu što ź mianie źniali karancin, i, mahčyma, ja zmahu ŭdzielničać u čempijanacie śvietu pa lohkaj atletycy, jaki adbudziecca ŭ kancy žniŭnia ŭ Budapiešcie. Ja adkazała: «Kali ty žartuješ, to heta nie śmiešna. Davaj lepš surjozna abmiarkujem najbližejšyja płany i toje, da jakich spabornictvaŭ ja mahu rychtavacca». Ale trenier padkreśliŭ, što nie žartuje.

Potym mnie ŭžo patelefanavali z polskaj Fiederacyi lohkaj atletyki, kab pavinšavać z tym, što ciapier ja aficyjnaja ŭdzielnica zbornaj Polščy. Skazali, što jany pasprabujuć zrabić usio mahčymaje dla taho, kab ja zmahła pajechać na čempijanat śvietu. Voś tady ŭ mianie krychu zatreślisia ruki, tamu što navina była sapraŭdy vielmi niečakanaj. Bo ŭvieś hod ja treniravałasia biez dumak ab tym, što zmahu ŭdzielničać u čempijanacie śvietu sioleta. Ja ž viedała, što ja na karancinie i heta ŭ pryncypie niemahčyma — a tut u adzin momant usio rezka źmianiłasia.

Kaniešnie, ja nie mahu pakul u poŭnaj miery radavacca hetaj navinie, tamu što niama harantyj taho, što ja patraplu na čempijanat śvietu. Ale ja ščaślivaja ŭžo tamu, što ŭ nastupnym siezonie ja 100% budu vystupać na mižnarodnym uzroŭni — bolš niama nijakich pieraškod.

— Azaronak vielmi apieratyŭna adreahavaŭ na navinu (Kryścina ŭ adkaz u sacsietkach napisała, što zabaraniaje prapahandystu pisać pra siabie. — «NN»). Nakolki vas uvohule chvalujuć takija paviedamleńni? Ci navučylisia vy za apošnija hady davać rady chejtu?

Pavialičyć

— Mianie naohuł nie chvalujuć paviedamleńni Azaronka — ja zaŭsiody ź ich śmiajusia. Mnie padajecca, što heta padabajecca majoj aŭdytoryi ŭ sacyjalnych sietkach — jana vielmi dobra na heta reahuje. My z padpisčycami možam časam parazmaŭlać na hetuju temu, pažartavać z takich ludziej, jak Azaronak. Vykładvaju ja skrynšoty tolki dla taho, kab pakazać, jakija jość nieadekvatnyja žychary Biełarusi i što jany sabie dazvalajuć. A jašče — dać im adkaz, bo ja nie z tych ludziej, chto maŭčyć.

Z chejtam ja navučyłasia spraŭlacca — na heta patrabavałasia šmat času i dapamoha psichołaha. Ale ciapier mianie vielmi składana niečym začapić.

— Tearetyčna, kali vy pajedziecie na Alimpijadu, to možacie sustrecca tam sa znajomymi ź Biełarusi. Vas nie pałochajuć takija dumki?

— A čamu jany paviny mianie pałochać? Niachaj bajacca pradstaŭnicy biełaruskaha spryntu sustrecca sa mnoj na biehavoj darožcy, tamu što jany ŭbačać tolki maju śpinu.

Pavialičyć

— U Instagram vy pisali, što ŭ piać hadoŭ amal što stracili słych…

— Tak, kali ja była maleńkaja, to zachvareła, u mianie padniałasia tempieratura pad 40. Mama z tatam vyklikali chutkuju. Doktar niapravilna raźličyła daziroŭku lekaŭ, i praz heta ŭ mianie źjaviłasia pabočnaja reakcyja: pačalisia prablemy sa słycham. Baćki zrazumieli, što niešta nie tak, kali ja ŭklučała vielmi hučna televizar i pry hetym usio roŭna drenna čuła.

Potym padčas abśledavańnia vyśvietliłasia, što na adnym vuchu ŭ mianie słych zachavaŭsia na 30%, na druhim — na 70%. Z taho momantu ja kožny hod pa niekalki razoŭ lažała ŭ špitali. Usiaho mnie zrabili piać apieracyj — niekatoryja ź ich rabili moj stan tolki horšym. I tolki kali mnie było 13 hadoŭ, my zmahli znajści lekara, jaki zdoleŭ pravilna vyznačyć pryčynu prablemy. I voś paśla taho, jak jon praapieryravaŭ mianie, słych niedzie praz paŭhoda viarnuŭsia.

Praz hod my z baćkami chacieli znoŭ patrapić da jaho na pryjom, ale akazałasia, što lekar raptoŭna pamier. Liču cudam toje, što jon paśpieŭ vyratavać moj słych. Mnie vielmi pašancavała. Ja ŭdziačnaja hetamu prafiesijanału, bo, kali b nie jon, vialiki sport byŭ by dakładna dla mianie zakryty.

I voś dziakujučy tamu, što ja znoŭ pačała dobra čuć, ja pačała chadzić na ŭroki fizkultury razam z adnakłaśnikami. Adnojčy mnie prapanavali abo paŭdzielničać u spartyŭnych spabornictvach, abo pajści na kantrolnuju pa matematycy z kłasam. A matematyku ja zaŭsiody nie lubiła. Na spabornictvach ja vystupiła lepš za ŭsich. Pieršy start mnie nastolki spadabaŭsia, što potym ja ŭžo nie zmahła žyć biez sportu.

— Što dapamahaje vam nie zdavacca?

— Ja z samaha dziacinstva staŭlu pierad saboj mety. I pakul jany nie buduć dasiahnutyja, ja nie dazvalaju sabie apuskać ruki. U mianie jość natatnik, dzie ja pišu płany na miesiac, na hod, na piać hadoŭ. I voś pakul ja nie pastaŭlu ptušačku nasuprać kožnaha punkta, ja nie supakojvajusia. Dumaju, što heta vielmi dyscyplinuje mianie.

— Vy raspaviadali padpisčykam u sacyjalnych sietkach, što za dva hady ŭ Polščy trojčy razychodzilisia z mužam, ale ŭ vyniku pamirylisia ŭ Paryžy na vaš dzień naradžeńnia. Jakoje vyprabavańnie dla adnosin stała samym składanym i što ŭ kančatkovym vyniku dapamahło vam zachavać šlub?

— Usio, što ja chacieła raskazać pra našy adnosiny, ja raskazała ŭ storyz. Bolš nijakaj infarmacyjaj ja nie chaču dzialicca. Tak, my try razy rasstavalisia i ŭ vyniku pamirylisia — ciapier u nas usio dobra. My pieražyli samyja składanyja momanty. Mahčyma, prablemy byli praz naš raptoŭny pierajezd, praz toje, što my aboje zhubili ŭsio, što ŭ nas było. Niejki čas ja była ŭ depresii, i heta nie vielmi dobra adbivałasia na našych adnosinach. Hałoŭnaje, što my zmahli znajści ahulnuju movu.

Posmotrieť etu publikaciju v Instagram

Publikacija ot Kristina | Pro sport i lubov k siebie (@kristi_timanovskaya)

Ciapier muž mnie vielmi mocna dapamahaje, jon mianie treniruje, jeździć sa mnoj na spabornictvy. Jon maja hałoŭnaja padtrymka i apora. Heta čałaviek, dziakujučy jakomu ja ciapier pakazvaju takija vyniki. My adśviatkavali hadavinu viasiella, u nas šmat sumiesnych płanaŭ. Adzinaje, dziaciej u najbližejšych płanach pakul niama — my adkłali hetaje pytańnie na potym.

— Kali b u vas była mahčymaść viarnucca na niekalki hadoŭ tamu i niešta źmianić tady ŭ svaim žyćci, vy b heta zrabili ci pakinuli b usio, jak jość?

— Pakinuła b usio, jak jość.

— Jakim svaim dasiahnieńniem vy bolš za ŭsio hanaryciesia?

— Napeŭna, tym, što ja pieražyła mocnuju depresiju, z-za jakoj byli zryvy, źviazanyja z bulimijaj, ale ja ŭziała siabie ŭ ruki i praktyčna pačała žyć z nula. I mnie ŭdałosia vyjści na vyšejšy ŭzrovień, čym da depresii.

• 38
• 0
• 6
• 5
• 3
• 7
• 12
• 0