«My nie Amazon». Brytanski ministr abarony prosić Ukrainu być bolš udziačnaj za akazanuju dapamohu
Ministr abarony Vialikabrytanii Ben Uoles zaklikaŭ Ukrainu vykazvać bolš padziaki partnioram za akazanuju vajskovuju padtrymku zamiest taho, kab pastajanna stavić patrabavańni pa razbłakavańni novych vidaŭ uzbrajeńniaŭ. Pra heta jon skazaŭ padčas razmovy z žurnalistami na palach Vilenskaha samitu NATA ŭ sieradu, jak piša «Jeŭrapiejskaja praŭda».
Havoračy pra toje, ci nie paŭpłyvaje na bajavy duch ukrainskich vajskoŭcaŭ admova Aljansu nazvać kankretnyja časavyja miežy pryniaćcia Ukrainy, kiraŭnik brytanskaha Minabarony zajaviŭ, što nie vieryć u heta, paśla čaho skazaŭ, što Kijeŭ zaŭsiody prosić bolšaha.
«Tut jość nievialikaja pieraściaroha: ci padabajecca nam heta abo nie, ludzi chočuć bačyć padziaku. Maja parada ŭkraincam: časam vy pierakonvajecie krainy admovicca ad ułasnych zapasaŭ [zbroi], i tak, heta — vysakarodnaja vajna, i my bačym, što vy vajujecie nie tolki za siabie, ale i za našy svabody», — skazaŭ Uoles.
«Ale časam vam davodzicca pierakonvać zakanadaŭcaŭ u Kanhresie ZŠA, vam davodzicca pierakonvać palitykaŭ u inšych krainach, jakija sumniavajucca, što vy viedajecie, što heta taho varta, što jano taho varta i što jany niešta za heta atrymajuć», — dadaŭ jon.
Ministr paśla hetaha ŭspomniŭ, što časam čuje «burčańnie» ad amierykanskich zakanadaŭcaŭ adnosna padtrymki Ukrainy: maŭlaŭ, «my padali 83 miljardy dalaraŭ ci kolki tam; viedajecie, my nie Amazon».
Jon raskazaŭ pra svoj vizit u červieni minułaha hoda.
«Ja skazaŭ ukraincam u minułym hodzie, kali jechaŭ 11 hadzin u [Kijeŭ] i atrymaŭ pieralik [zbroi], ja skazaŭ, što ja nie Amazon», — dadaŭ jon.
Raniej stała viadoma, što ŭrad Vialikabrytanii padrychtavaŭ pakiet abjomam amal 65 miljonaŭ dalaraŭ na ramont ukrainskaj techniki, a taksama na stvareńnie Centra reabilitacyi dla vajskoŭcaŭ.
U Minsku raźbirajuć Histaryčnuju majsterniu, jakaja zachoŭvała pamiać pra Chałakost2
Kamientary