Lizavieta Kochman žyvie ŭ Polščy bolš za 10 hadoŭ. Tut jana skončyła dva ŭniviersitety, paźniej pracavała televiadučaj, mieniedžaram i vykładčykam. Šyroka viadomaj hramadskaści jana stała jak pamočnica «ministra abarony» ŭ Abjadnanym pierachodnym kabiniecie Valeryja Sachaščyka. Ale da ŭsiaho hetaha raz u hod Lizavieta stanovicca Śniahurkaj i vystupaje pierad dziećmi i darosłymi. Dziaŭčyna raskazała MOST, navošta joj heta, chto jaje klijenty i kolki možna zarabić u śviaty.
«Navat biez kaściuma ŭsie zavuć mianie Śniahurkaj»
U dziacinstvie Lizavieta maryła stać aktrysaj. Rodny horad — Lidu — biełaruska nazyvaje kuźniaj tvorčaści: tam šmat navučalnych ustanoŭ, dzie vykładajuć roznyja vidy mastactva.
Śniahurkaj Liza vyrašyła stać u 2020 hodzie, kali ŭžo žyła ŭ Varšavie. Tady dla hetaha jana zamoviła ź Minska śpiecyjalny kaścium. I jašče adzin — dla Dzieda Maroza. Dziaŭčyna kaža, što pačuvajecca vielmi arhanična ŭ vobrazie svajho kazačnaha piersanaža. U sacsietkach jana navat zapisała žartoŭnaje videa, dzie tłumačyć, čamu mienavita jaje možna ličyć sapraŭdnaj Śniahurkaj.
— Navat biez kaściuma ŭsio nazyvajuć mianie Śniahurkaj, — kaža jana ŭ im.
Kab znajści klijentaŭ, Lizavieta stvaryła asobnuju staronku ŭ instahramie. Dziaŭčyna ŭspaminaje, što ŭžo paśla pieršych vystupaŭ zrazumieła, što zaniałasia novaj spravaj nie darma: hetaje chobi padabałasia joj z kožnym dniom usio bolš.
— Heta takaja kazka, jakuju ty stvaraješ i častkaj jakoj sam stanovišsia. U hety čas ty adychodziš ad paŭsiadzionnaści, ad darosłych prablem i viartaješsia ŭ dziacinstva, — kaža jana.
Spačatku zakazy pastupali tolki na dziciačyja vystupleńni. Lizavieta pryjazdžała dadomu da klijentaŭ z 30-chvilinnaj prahramaj: Dzied Maroz i Śniahurka śpiavali pieśni ź dziećmi, vadzili karahody i ładzili konkursy. Paźniej duetu stali prapanoŭvać vystupać i dla darosłych: firmy i arhanizacyi zaprašajuć ich na karparatyvy, a bary i restarany prosiać vieści viečaryny ŭ navahodniuju noč. Samaje doŭhaje vystupleńnie Lizaviety doŭžyłasia kala piaci hadzin.
Na rodnuju movu niama popytu
Usie klijenty dziaŭčyny — emihranty z postsavieckaj prastory. Jak praviła, heta biełarusy, ukraincy ci kazachi. Adnojčy Lizavieta vystupała na dziciačym ranišniku ŭ pasolstvie Kazachstana.
A voś polskaja siamja zaprašała jaje tolki adzin raz, i toje, bo ŭ joj maci była rodam ź Biełarusi. Prahrama vystupleńniaŭ u Lizaviety składziena pa-rusku, chacia ŭ paŭsiadzionnym žyćci jana maje znosiny pa-biełarusku. Jana z sumam pryznaje, što na rodnuju movu pakul niama popytu.
— Pierad tym jak pryniać zamovu, ja vysyłaju klijentam ankietu. U joj jany pakazvajuć svaje pažadańni, u tym liku i movu. Zvyčajna, akramia ruskaj, nijakuju inšuju movu nie prosiać. Adzin raz tolki paprasili vystupić na polskaj, — sa škadavańniem kaža dziaŭčyna.
«Kazali, što heta pradukt ruskaha śvietu»
Navat u takoha stanoŭčaha piersanaža, jak Śniahuračka, znajšlisia chiejtery. Asabliva paśla ŭvarvańnia Rasii va Ukrainu. Šmat chto kazaŭ Lizaviecie, što Śniahurka — heta saviecki piersanaž, a značyć, pradukt «ruskaha śvietu». Jana z takimi abvinavačvańniami nie zhodna.
— Liču, što Śniahurka pavinna być pa-za palitykaj. Chacia b jaje možna nie ŭmiešvać u heta? — śmiajecca jana. — A naohuł, usio, što prydumana ŭ SSSR, aŭtamatyčna nie stanovicca ruskim. Tam žyło šmat narodaŭ, heta i ich spadčyna taksama, — ličyć dziaŭčyna.
Kolki zarablajuć Śniahurki
Niahledziačy na chiejt, u biełaruski pa-raniejšamu šmat ukrainskich klijentaŭ. Dzieci emihrantaŭ, kaža jana, zvyčajna vierać u Dzieda Maroza i Śniahurku, a nie ŭ Śviatoha Mikałaja ci Santa-Kłaŭsa.
Pracy ŭ Lizy z hadami stanovicca ŭsio bolš. Zakazy aktyŭna pastupajuć z pačatku śniežnia da navahodniaj nočy. 31-ha čysła ŭ jaje zvyčajna zapłanavana kala 30 vystupaŭ.
Kab vykanać usie zamovy, Liza pašyryła kamandu: jana najmaje jašče dźvie pary Dziadoŭ Marozaŭ i Śniahurak. Kožnaja ź ich vykonvaje kala dziasiatka zakazaŭ. I minimum adna ź ich pracuje ŭ navahodniuju noč viadučymi ŭ bary ci restaranie. Takija zamovy robić, naprykład, sietka baraŭ Beer Station, adkrytych biełarusami.
Za śniežań Liza zarablaje ŭ vobrazie Śniahurki kala 5 tys. złotych (kala 1200 dalaraŭ).
U astatniuju paru hoda ŭ jaje jość i inšaja praca. Raniej jana viała papularnuju anhłamoŭnuju prahramu na anłajn-telebačańni, a zaraz dziaŭčyna pracuje mieniedžaram u italjanskim restaranie, a jašče vykładaje tancy i fizkulturu ŭ biełaruskaj škole «Ja doma». Kaža, heta niadrenny dadatak da jaje zarpłaty.
Zrešty, dziaŭčyna zadumvajecca pra toje, kab zrabić śviaty svajoj asnoŭnaj pracaj i adkryć ułasnaje ivent-ahienctva. Kaža, chacieła b zarablać na lubimaj spravie kruhły hod.
-
Ci mohuć nie puścić u kramu za 5 chvilin da zakryćcia i da jakoha času pavinny pracavać kasirki
-
U BDU ŭ nastupnym hodzie adkryjuć čytyry novyja śpiecyjalnaści — jość i niezvyčajnaja
-
«Nastolki jamu było važnaje śviatło ŭ rodnym aknie». Jak dziaŭčyna kranalna dapamahaje biełarusam-emihrantam «viarnucca» dadomu
Usio zdaryłasia na Novy hod. Śmierć samaj publičnaj supracoŭnicy minskaha AMAPa dahetul pakidaje pytańni1
Kamientary
Kali budzie abjektyŭnaje aśviatleńnie ich dziejnaści padčas ich pracy? Chopić pijaryć prafanacyi!!! Skazała Cichanoŭskaja, što "chutka" budzie spravazdača finansavaja pa dziejnaści jaje struktur dva hady tamu, dyk dziaŭbicie jaje, pakul nia daść.