Były siłavik, zavočna asudžany pa spravie ab «padpale doma Hajdukieviča»: Nie viedaju, dzie toj dom znachodzicca
Dzianis Chamicevič — adzin z asudžanych pa spravie Hajdukieviča. Jon ciapier za miažoj, tamu atrymaŭ zavočny termin. U efiry jutub-kanała «Para!» jon raskazaŭ, što viedaje pra fihurantaŭ kryminalnaj spravy, jakim u sukupnaści prysudzili 250 hadoŭ.
Apošniaje miesca pracy Dzianisa Chamiceviča — načalnik achovy ŭčastka vytvorčaści «Minskaja pošta». Da hetaha jon słužyŭ u 8-m upraŭleńni Departamienta achovy MUS Biełarusi, jakoje zajmajecca achovaj dypłamatyčnych pradstaŭnictvaŭ i konsulskich ustanovaŭ zamiežnych dziaržavaŭ.
Dzianisu Chamiceviču zavočna prysudzili 16 hadoŭ pa spravie, źviazanaj z padpałam doma Hajdukieviča.
Sam jon nie bačyŭ doma deputata i nie viedaje, dzie jon znachodzicca. Ale, pa jaho słovach, kali b pierad im pastavili takuju zadaču, to «jana b była vykananaja i dom by zhareŭ».
Chamicevič miarkuje, što adzinaje, praz što na jaho mahli źviarnuć uvahu pravaachoŭnyja orhany, heta dvarovyja maršy, u jakich jon braŭ udzieł u 2020 hodzie. Jon śćviardžaje, što nikoli nie ŭdzielničaŭ ni ŭ jakich padpałach, i spravu ab padpale doma Hajdukieviča ličyć sfalsifikavanaj.
Chamicevič vykazaŭ mierkavańnie, što na ludziej, jakija byli abvinavačanyja pa spravie, siłaviki vyjšli praz adnaho čałavieka, ź jakim niekatoryja ź ich byli na suviazi. Ale proźvišča nie nazvaŭ.
«Hety čałaviek, na maju dumku, niedzie zrabiŭ hrubuju pamyłku, jakaja pryviała da ŭsiaho hetaha».
Źviestki pra ludziej, chutčej za ŭsio, atrymali praź incydent z kamandaj «Čornaj knihi Biełarusi», kali supracoŭnik HUBAZiKa Artur Hajko zmoh u jaje ŭvajści i praciahły čas supracoŭničać.
Na słovach Chamiceviča, usie 18 abvinavačanych pa spravie nijak nie byli pamiž saboju źviazanyja. Adzin z abvinavačanych — Dzianis Fiłončyk, jaki atrymaŭ 9 hadoŭ pazbaŭleńnia voli, — siabar Dzianisa Chamiceviča.
«Ź im my kala doma navodzili pryhažość. Dastatkova časta sustrakalisia. Tamu, mnie zdajecca, jaho i ŭziali ŭ raspracoŭku. Jon nijaki nie siłavik. U svoj čas u jaho byli pryvady ŭ milicyju», — adznačaje Chamicevič.
Dzianis kaža, što nie znajomy z siamjoj Vajciachovičaŭ z Barysava. Muž i žonka Vajciachovičy, a taksama syn i niaviestka atrymali ad 11 da 21 hoda.
Jon źviartaje ŭvahu, što hetych ludziej aryštavali jašče ŭ žniŭni 2021 hoda. A Dzianis Fiłončyk i Uładzimir Saviankoŭ byli zatrymanyja tolki 2 śniežnia 2021 hoda.
«Kali b hetyja ludzi byli pamiž saboju źviazanyja, to takija ludzi, jak Uładzimir Saviankoŭ, užo b nie znachodzilisia ŭ Biełarusi», — miarkuje Chamicevič.
Dzianis raskazaŭ, što Uładzimir Saviankoŭ raniej byŭ adnym z kamandziraŭ Minskaha abłasnoha AMAP i niekali prachodziŭ słužbu ŭ vajskovaj čaści 3214.
«Mnie zdajecca, što hety čałaviek z-za svajoj palityčnaj pazicyi razmaŭlaŭ sa svaimi byłymi tavaryšami pa słužbie. Mahčyma, niechta ź ich zrabiŭ danos na jaho»,
— miarkuje Chamicevič i adznačaje, što z Saviankovym jany razam byli ŭ adnoj spartyŭnaj arhanizacyi, dzie Dzianis byŭ sakratarom.
Pra historyju z padpałam doma Hajdukieviča Chamicevič viedaje, pa jaho słovach, tolki z navinaŭ.
«Hajdukievič zajaŭlaje, što ŭ jaho dzieci i jon nikomu nie prabačyć, źviartajučysia ŭ tym liku i da mianie, to chaču jamu pieradać, što my taksama ŭsio pamiatajem i vierniemsia dadomu ŭ kožnym razie»,
— zajaŭlaje Chamicevič.
Čytajcie jašče:
«Zmova siłavikoŭ»: chto tyja aficery, jakich sudziać razam z Prakopjevym
-
Valfovič pra «vajenna-palityčnaje stanovišča vakoł Biełarusi»: Situacyja nahniatajecca, tendencyi niesuciašalnyja
-
Łosik schudnieŭ, Pačobut «trymaje marku», Alaksandraŭ «vyjazdžaje» na pazityvie. Što z palitźniavolenymi žurnalistami z PK-1
-
Łukašenka: Biełarusy ničym nie adroźnivajucca ad ludziej, jakija naradzilisia ŭ Pskovie ci Leninhradzie
«Joj było vielmi drenna apošnim časam». Znajomyja pra Śviatłanu Krucikavu, jakaja skončyła žyćcio samahubstvam paśla cisku milicyi3
Kamientary
Dziakuj.