Kamu z łukašystaŭ daryli «kuvałdu «Vahniera» i chto jaje pijaryŭ
U śpisie ŭładalnikaŭ vahnieraŭskaha simvała — jaki taksama staŭ simvałam biezzakońnia, biesčałaviečnaści i vajennych złačynstvaŭ — Łukašenka, Hajdukievič, Azaronak i navat kasmanaŭt Navicki. «Vahnieraŭskaja kuvałda» ekspanujecca ŭ muziejach i jaje pakazvajuć dzieciam.
Kuvałdaj vahnieraŭcy publična i biez suda karajuć tych, chto pierad imi praviniŭsia.
Paśla taho, jak u 2022 hodzie najomniki joju demanstratyŭna zabili svajho byłoha sasłužyŭca za toje, što jon trapiŭ va ŭkrainski pałon, rasijskaja i prarasijskaja prapahanda stvaryła z hetaha instrumienta «palityčny miem».
«Vahnieraŭskija» kuvałdy ŭ Rasii dorać palitykam i hramadskim dziejačam.
Zaviadzionku daryć kuvałdy pieraniali i łukašysty. Jany nie zhadvali, što taki prezient «vahnieraŭski», ale ahulny pasył nie pakidaŭ sumnievu, chto pačynalnik «mody».
«Ekskluziŭnuju i ciažkuju» kuvałdu padaryli kiraŭniku Libieralna-demakratyčnaj partyi, byłomu siłaviku Alehu Hajdukieviču.
Videa z uručeńniem kuvałdy było apublikavana ŭ jaho telehram-kanale 23 červienia. Tady jašče nie było viadoma, što vahnieraŭcy abviaścili pachod na Maskvu.
Kuvałdu Hajdukieviču padaryŭ adnapartyjec z nahody pierarehistracyi partyi.
Hajdukievič skazaŭ, što kuvałdaj «budzie žorstka adstojvać intaresy krainy».
Kuvałdu padaryli i Łukašenku.
Hety instrumient u futlary ad skrypki staŭ ekspanatam u Pałacy Niezaležnaści. Na kuvałdzie čytajecca daroŭny nadpis, jaki pačynajecca słovami «Aleksandru Hrihoŕjeviču…».
Niezvyčajny ekspanat pakazali vychavancam vajskova-patryjatyčnaha centra śpiecpadrychtoŭki «Skif» z Rečycy i abłasnoha vajskova-patryjatyčnaha kłuba «Dobleść».
Prapahandyst Ryhor Azaronak taksama maje kuvałdu.
Azaronku jaje ŭ krasaviku na subotniku padaryŭ sam Łukašenka sa słovami, «kab viedali».
A voś, sapraŭdnaja «kuvałda ad «Vahniera» dastałasia kasmanaŭtu ź Biełarusi Alehu Navickamu.
Jaje ŭručyli jamu na śviatkavańni Dnia Rasii ŭ mikrarajonie Zorny ŭ rasijskim Ivanavie.
«Alehu Viktaraviču my ŭručajem kuvałdu vahnieraŭskuju. My tak žartujem, tak. Naturalna, my za ŭsio dobraje», — zajaviŭ viadoŭca na scenie.
Z «kuvałdy ad zasnavalnika brenda» zrabili ekspanat muzieja ŭ himnazii ŭ Rečycy.
Hetym pachvaliŭsia prarasijski aktyvist Uładzimir Habraŭ, jaki viadomy ŭ rajcentry jak kiraŭnik vajskova-patryjatyčnaha centra śpiecyjalnaj padrychtoŭki dapryzyŭnaj moładzi «Skif». Jon zajaŭlaje, što na rukajatcy raśpisaŭsia adzin z zasnavalnikaŭ PVK «Vahnier» pa mianušcy Bies.
Taki pazyŭny mieŭ vahnieraviec Mikałaj Budźko, biełarus z Mahiloŭščyny. Jon byŭ udzielnikam vajny ŭ Siryi. U 2017 hodzie jon zahadaŭ zabić kuvałdaj miascovaha žychara, jakoha pierad hetym katavali, zdymajučy ekziekucyju na videa, paźniej raźmieščanaje ŭ internecie. Jano šakavała śviet.
U Rasii ž kuvałda stała «simvałam pomsty». Jaje vysyłajuć u jeŭrapiejskija struktury, kidajuć na terytoryi dypłamatyčnych pradstaŭnictvaŭ, adpraŭlajuć na front z humanitarnaj dapamohaj, prynosiać na pachavańni.
Paŭstańnie vahnieraŭcaŭ, kali jano budzie zadušana, pastavić kryž i na ich simvolicy, u tym liku na abahaŭlonaj da hetaha ŭ Rasii kuvałdzie. Pra jaje pastarajucca zabycca. Vidać, i łukašystam daviadziecca adpravić kuvałdy na mietałałom i bolš nie vychvalacca.
«Naša Niva» — bastyjon biełaruščyny
PADTRYMAĆHladzicie taksama:
Valeryj Sachaščyk zaklikaŭ «abjadnać siły i ŭratavać radzimu»
«Kryvavaja vajna viarnułasia ŭ Rasiju bumieranham» — prezident Litvy
Kamientary