Źmieny, jakija pieražyvuć nie ŭsie, a adčujuć mnohija. Što ŭłady rychtujuć dla IP

Dobraachvotna-prymusovaja transfarmacyja ŭ jurydyčnuju asobu

Užo z 1 lipienia IP bolš nie buduć mieć mahčymaści zajmacca arhanizacyjaj kancertaŭ i inšych vidoviščnych mierapryjemstvaŭ. Kab praciahnuć dziejnaść, im daviadziecca adkryć jurydyčnuju asobu. 

Dla ich padrychtavali niekatoryja lhoty. Naprykład, jany zmohuć zarehistravać jurydyčnuju asobu biez apłaty dziaržpošliny (1 bazavaja). Kudy bolš značnym pasłableńniem možna nazvać skasavańnie abaviazku zdymać ofis. Dla rehistracyi dastatkova budzie paznačyć adras zasnavalnika.

Kali z nastupnaha miesiaca źmieny zakranuć tolki nievialikuju dolu IP, jakija zajmalisia arhanizacyjaj kancertaŭ i inšych mierapryjemstvaŭ, to ŭžo z 2025 hoda ź niemahčymaściu pracavać jak IP sutyknucca kudy bolš šyrokija koły.

Reč u tym, što parłamient chutka prymie praŭki ŭ zakanadaŭstva, jakija skarociać śpis vidaŭ dziejnaści, jakimi mohuć zajmacca IP. Ich poŭny pieralik dahetul nie pakazali hramadskaści.

Častku pieraliku dniami apublikavaŭ «Sputnik». Voś niekatoryja vidy dziejnaści, jakija pakinuć za IP:

• skupka kaštoŭnych mietałaŭ i kaštoŭnych kamianioŭ u hramadzian u vyrabach i łomie;
• vytvorčaść chlebabułačnych vyrabaŭ i mučnych kandytarskich vyrabaŭ niepraciahłaha zachoŭvańnia;
• vytvorčaść hatovych tekstylnych vyrabaŭ, akramia adzieńnia;
• drukavańnie inšaj palihrafičnaj pradukcyi, nie ŭklučanaj u inšyja hrupoŭki;
• dziejnaść pa padrychtoŭcy materyjałaŭ da druku i raspaŭsiudžvańni;
• vytvorčaść inšych humovych vyrabaŭ, płastmasavych vyrabaŭ;
• farmavańnie i apracoŭka listavoha škła;
• rezka, apracoŭka i azdableńnie kamienia;
• vytvorčaść mebli;
• vytvorčaść juvielirnych vyrabaŭ, bižuteryi;
• techničnaje absłuhoŭvańnie i ramont aŭtamabilaŭ, matacykłaŭ;
• roźničny handal;
• dziejnaść hruzavoha aŭtamabilnaha transpartu i pasłuhi pa pierajeździe;
• pasłuhi pa hramadskim charčavańni;
• kampjutarnaje prahramavańnie, kansultacyjnyja i inšyja spadarožnyja pasłuhi.

Na ciapierašni momant vybar vidaŭ dziejnaści dla IP nie istotna roźnicca ad jurydyčnych asob.

Samazaniataść vyratuje nie ŭsich

Tyja indyvidualnyja pradprymalniki, čyje vidy dziejnaści nie patrapiać u zaćvierdžany śpis, da 2025 hoda buduć vymušanyja adkryć jurydyčnuju asobu, ci spynić dziejnaść, ci, naprykład, adyści ŭ cień.

Taksama častka IP zmoža pierajści ŭ samazaniatyja. Dla samazaniatych praduhledžany padatak na prafiesijny dachod u pamiery 10% ad vyručki — pry ŭmovie, što vyručka budzie da 60 000 rubloŭ u hod. Kali vyručka budzie bolšaj za 60 tysiač, to daviadziecca płacić padatak 20% ad vyručki. Ale pierajści ŭ hety status zmohuć nie ŭsie. Naprykład, stać samazaniatymi nie zmohuć tyja, chto maje najomnych supracoŭnikaŭ.

Skaračeńnie vidaŭ dziejnaści, jakimi možna budzie zajmacca ŭ statusie IP, zastajecca nie adzinaj niepryjemnaj navinoj dla biełaruskich pradprymalnikaŭ. Z 2024 hoda ŭłady čarhovy raz płanujuć padniać staŭku padachodnaha padatku. Z nastupnaha hoda pamier padatku vyraście z 20% da 25%.

Pavialičyć

Udar pa IP, jak u 2008 hodzie

Situacyja, u jakuju ŭłady chočuć pastavić IP z 2025 hoda, čymści nahadvaje kaniec nulavych, kali z 1 studzienia 2008 hoda im zabaranili brać na pracu ludziej nie ź liku blizkich svajakoŭ. Tady źmieny prymusili častku IP spynić dziejnaść abo adkryvać jurydyčnyja asobu. Mnohija znachodzili paratunak u tym, što pa mahčymaści najmali supracoŭnikaŭ nieaficyjna i vypłačvali im zarpłaty ŭ kanviertach. Taja zabarona praisnavała da siaredziny 2014 hoda, kali IP u Biełarusi znoŭ dazvolili brać na pracu ludziej u niezaležnaści ad stupieni rodnasnych suviaziaŭ.

Ciapierašniuju «turbotu» ab pradprymalnikach ułady tłumačać vielmi prosta: u pieršuju čarhu jany chočuć pavialičyć abjomy padatkavych adličeńniaŭ. 

Praz pavieličeńnie padatkovaj nahruzki letaś udałosia sabrać našmat bolš padatkaŭ. Tak, naprykład, za pieršaje paŭhodździe minułaha hoda biudžet atrymaŭ u 2,6 razu bolš hrošaj u vyhladzie padatkaŭ ad IP. 

Zaŭvažna, što pavieličeńnie adbyvałasia na fonie skaračeńnia ahulnaj kolkaści IP. Za minuły hod ich stała mieniej na 10 tysiač. Pa stanie na 1 studzienia 2023 hoda ŭ Biełarusi naličvałasia 263 tysiačy IP suprać 273 tysiač hodam raniej. Skaraciłasia i dola IP u roźničnym tavarazvarocie — z 6,8% da 5,9%.

Kali ŭłady pačali ŭskładniać žyćcio pradprymalnikam?

1 studzienia 2022 hoda byŭ pierahledžany śpis vidaŭ dziejnaści, pa jakich možna było vykarystoŭvać sproščanuju sistemu padatkaabkładańnia (SSP). Bolšaść IP jašče tady zhubili takuju mahčymaść. Dla inšych staŭki pry vykarystańni SSP vyraśli z 5% da 6%.

Pačynajučy z 2023 hoda IP całkam zabaranili pracavać pa SSP. Taksama z 2023 hoda pavialičylisia staŭki pry vykarystańni ahulnaj sistemy padatkaabkładańnia. Sam padatak pavialičyli z 16% da 20%.

Pavialičyć

Aproč hetaha, u 2022 i 2023 hadach pavialičvali staŭki adzinaha padatku. Pa niekatorych vidach dziejnaści rost składaŭ 2-4 razy. Razam z pavieličeńniem stavak adzinaha padatku išło skaračeńnie śpisaŭ vidaŭ dziejnaści, dzie dazvalałasia jaho vykarystańnie.

Paralelna z hetym z 2023 hoda šerah katehoryj IP pazbavili pravoŭ na lhoty pry adličeńniach u FSAN. Heta 35% ad minimalnaha zarobku (na ciapierašni momant 194 rubli ŭ miesiac). Raniej IP, jakija paralelna z pradprymalnickaj dziejnaściu pracavali pa pracoŭnaj damovie, rabili adličeńni ŭ FSAN dobraachvotna.

Taki padychod dazvalaŭ paźbiehnuć dvajnoha abkładańnia. Ad hetaha hoda śpis takich asobaŭ značna zvuziŭsia. Nie płacić u FSAN, naprykład, majuć prava piensijaniery.

Pavialičyć

Da čaho mohuć pryvieści hetyja źmieny?

Ahučanyja novaŭviadzieńni ŭ najbližejšyja hady musiać pryvieści da pavieličeńnia pastupleńniaŭ hrošaj u biudžet. Heta budzie adbyvacca jak za košt padniatych padatkovych taryfaŭ, tak i za košt skasavańnia lhot pa linii FSAN.

Ale tut treba razumieć, što prynamsi častku dadatkovych vydatkaŭ, jakija kładucca na plečy IP, u vyniku zapłaciać spažyŭcy, bo pry istotna pavialičanych vydatkach pradprymalniki nie zmohuć utrymlivać ceny na svaje tavary i pasłuhi na raniejšym uzroŭni.

Aproč hetaha, my budziem nazirać dalejšaje skaračeńnie ahulnaj kolkaści IP. 

Čytajcie taksama: 

Jak padatkaviki vyjaŭlajuć tych, chto žyvie nie pa srodkach? Raskazvaje supracoŭnik inśpiekcyi

• 4
• 0
• 3
• 8
• 3
• 2
• 37
• 0