Pamiatajecie amierykanca, jaki paprasiŭ prytułku paśla šturmu Kapitolija? Jon vykładaje anhlijskuju ŭ Breście
Na sajcie Fiederalnaha biuro rasśledavańniaŭ Evan Ńjuman znachodicca ŭ śpisie złačyncaŭ z paznakaj most wanted. Taksama adznačajecca, što jaho «varta ličyć uzbrojenym i niebiaśpiečnym». Ale heta nie pieraškadžaje Ńjumanu vykładać dzieciam anhlijskuju movu ŭ bresckaj pryvatnaj škole zamiežnych moŭ, piša «Novy čas».
U studzieni 2021 hoda hramadzianin Złučanych Štataŭ Amieryki Evan Ńjuman udzielničaŭ u šturmie Kapitolija, padčas čaho ŭdaryŭ palicejskaha i vykarystaŭ mietaličnuju barykadu, kab źbivać inšych aficeraŭ. Trapiŭšy ŭ śpis samych niebiaśpiečnych złačyncaŭ na radzimie, jon paprasiŭ palityčnaha prytułku ŭ Biełarusi.
Biełaruskija ŭłady paśpiašalisia adrazu ž zrabić ceły śpiecyjalny repartaž u prapahandysckaj prahramie «Hałoŭny efir», dzie pasprabavali padać hetuju historyju jak cudoŭnaje vyratavańnie paciarpiełaha amierykanca ŭ samaj demakratyčnaj krainie śvietu — Biełarusi. Repartaž vyjšaŭ z hučnaj nazvaj «Hudbaj, Amieryka».
«Jany (supracoŭniki FBR) dadali moj fotazdymak u śpis złačyncaŭ, jakich treba znajści jak maha chutčej, z prośbaj ab dapamozie hramadstva, kab identyfikavać mianie. Ja viedaŭ, što mianie adrazu apaznajuć, tamu adrazu ž źjechaŭ», — pryznavaŭsia Evan Ńjuman u intervju karespandentu «Hałoŭnaha efiru».
«Mianie abvinavačvajuć pavodle šaści spraŭ, i ja dumaju, što ŭsie jany źjaŭlajucca kryminalnymi złačynstvami. Kryminalnyja złačynstvy — heta vielmi surjoznaje abvinavačańnie, jano aznačaje, što vy ŭčynili kamuści albo čamuści škodu», — dadavaŭ Ńjuman.
U sakaviku 2021 hoda Evan Ńjuman palacieŭ sa Złučanych Štataŭ u Italiju — hetuju pajezdku jon aformiŭ jak kamandziroŭku, tak paraiŭ zrabić advakat. Z padarožža Ńjuman nie viarnuŭsia. 13 sakavika jon dabraŭsia da ŭkrainskaha Žytomira, dzie nieŭzabavie, jak pryznajecca sam, akazaŭsia pad nahladam SBU.
«Ja nie navažvaŭsia paprasić prytułku, pakul SBU nie pačała pieraśledavać mianie va Ukrainie. Heta žudasna, heta palityčny pieraśled!» — zajaviŭ Ńjuman u prapahandysckim efiry.
«U Amierycy siońnia niama viaršynstva zakona! Heta šlach u minułaje, u niejkaje siaredniaviečča», — zajaviŭ Evan Ńjuman u Biełarusi, dzie za kratami znachodzicca bolš za paŭtary tysiačy palityčnych źniavolenych.
«Ja viedaŭ, što Biełaruś supraciŭlajecca Zachadu, da taho ž vaša kraina była bližej, čym Rasija. Dla mianie heta byŭ najlepšy šanc», — abhruntavaŭ amierykaniec svoj pryjezd u Biełaruś.
Toje, što Evan Ńjuman uładkoŭvaje žyćcio ŭ Breście, — daŭno nie sakret. Navat intervju dla «Hałoŭnaha efiru» było źniata na bresckich vulicach.
U Breście Ńjuman šukaŭ pracu i ŭ vyniku ŭładkavaŭsia ŭ pryvatnuju škołu zamiežnych moŭ International Language House.
Pa subotach čałaviek sa śpisa złačyncaŭ FBR źbiraje vakoł siabie bresckich dziaciej i čamuści ich navučaje.
International Language House pazicyjanuje Evana Ńjumana jak «nośbita movy» i šyroka rekłamuje mahčymaść zaniatkaŭ ź im na aficyjnych staronkach u Instagram i Facebook. Praŭda, imia «nośbita movy» ŭ takich anonsach čamuści nie paznačajuć. Zatoje pradstaŭniki pryvatnaj škoły publikujuć šmat jahonych fota, na jakich lohka paznać znakamitaha piersanaža biełaruskaj prapahandy.
Žurnalisty patelefanavali ŭ International Language House pa numary, paznačanym na sajcie škoły, kab spytać, chto ž vykładaje dzieciam anhlijskuju movu. Administratar nazvała jaho Styvienam i skazała, što proźvišča, na žal, nie viedaje. Tym nie mienš udakładniła, što tajamničy Styvien raniej žyŭ u Kalifornii — jak i Evan Ńjuman. A zaraz žyvie ŭ Biełarusi, «tamu što jamu tut padabajecca». Krynica «Novaha Času» paviedamlaje, što ŭ Breście Evan Ńjuman nazyvaje siabie novym znajomym mienavita Styvienam.
Baćki, što adpraŭlajuć svaich dziaciej na zaniatki z nośbitam movy, mahčyma, nie hladziać biełaruskaje telebačańnie, kali nie paznali ŭ «vykładčyku» čałavieka, što abvinavačvajecca pavodle 14 epizodaŭ, mnohija ź jakich kvalifikavanyja jak kryminalnyja złačynstvy, znachodzicca ŭ vyšuku FBI z paznakaj «moža być uzbrojenym i niebiaśpiečnym» i žyvie ŭ Biełarusi tolki tamu, što ŭ śviecie nadzvyčaj mała krain, jakija b zhadzilisia dać jamu prytułak.
Škoła zamiežnych moŭ International Language House pracuje ŭ Breście z 2002 hoda. Na aficyjnym sajcie paznačana, što ILH — adzinaja škoła ŭ Bresckim rehijonie, jakaja atrymała akredytacyju Brytanskaj Nacyjanalnaj Asacyjacyi English UK.
English UK — heta asacyjacyja akredytavanych centraŭ anhlijskaj movy ŭ Vialikabrytanii, što supracoŭničaje z British Council. Cikava, ci viedajuć zamiežnyja partniory bresckaj škoły, kaho jana pryciahvaje da supracoŭnictva ŭ jakaści «nośbita movy»?
Łukašenka: Chto tam u Rasii viakaje na šmatviektarnaść Biełarusi i vyzvaleńnie palitviaźniaŭ?10
Kamientary