Sieryjał Netflix «Caryca Kleapatra» vyklikaŭ abureńnie ŭ Jehipcie. I voś čamu
Dakumientalna-mastacki sieryjał Netflix pra Kleapatru ź ciemnaskuraj aktrysaj u hałoŭnaj roli vyklikaŭ škvał abureńnia ŭ Jehipcie i abvinavačvańni ŭ adras aŭtaraŭ filma ŭ sprobie pierapisać historyju krainy, źviazaŭšy jaje vytoki ź ciemnaskurymi afrykancami.
Udzielniki kinaprajekta adstojvajuć svajo rašeńnie ab vybary aktrysy na hałoŭnuju rolu, śćviardžajučy, što histaryčnaha kansiensusu ab karaniach Kleapatry niama, piša Bi-bi-si.
Paśla taho jak na minułym tydni ŭ Jehipcie vyjšaŭ trejler sieryjała, jaki pretenduje na histaryčnuju dakładnaść, šmat chto ŭ krainie abrynuŭsia na jaho z krytykaj, a advakat Machmud Al-Siemary navat nakiravaŭ aficyjnuju zajavu ŭ prakuraturu z patrabavańniem zabłakavać u Jehipcie dostup da Netflix.
Al-Siemary abvinavaciŭ kampaniju ŭ parušeńni zakonaŭ ab ŚMI i prasoŭvańni idej afracentryzmu, «uklučajučy słohany i nadpisy, nakiravanyja na skažeńnie i źniščeńnie jehipieckaj identyčnaści».
Svoj hołas suprać sieryjała padaŭ taksama znakamity archieołah, były kiraŭnik Ministerstva staražytnaściaŭ Jehipta Zachi Chavas. U intervju haziecie «Al-Masry al-Jom» jon nazvaŭ zdahadku ab tym, što Kleapatra mahła być ciemnaskuraj, niapraŭdaj.
«Kleapatra była hračankaj pa pachodžańni, heta značyć, jaje skura była śvietłaj, a nie ciomnaj», — skazaŭ Chavas, dadaŭšy što adzinymi ciemnaskurymi kiraŭnikami Jehipta byli kušyckija cary 25-j dynastyi 747-656 hadoŭ da našaj ery.
«Netflix sprabuje pasiejać błytaninu i zamiašańnie, raspaŭsiudžvajučy iłžyvyja źviestki, jakija źbivajuć z pantałyku, ab tym, što la vytokaŭ jehipieckaj cyvilizacyi stajali ciemnaskuryja ludzi», — zajaviŭ archieołah, zaklikaŭšy hramadskaść krainy vykazać pratest mižnarodnaj stryminhavaj płatformy.
Čatyrochsieryjny paŭdakumientalny film pra Kleapatru vyjdzie ŭ mai. Znakamituju carycu, jakaja kiravała Jehiptam z 51 pa 30 hh.da n. e., u im hraje brytanskaja aktrysa Adel Džejms.
U trejlery, jaki vyjšaŭ 12 krasavika, zhadvajecca, što Kleapatra naležała da hrečaskaj dynastyi Ptalemiejaŭ. Ale potym inšy historyk kaža: «Ja pamiataju, jak maja babula mnie skazała: mnie ŭsio roŭna, što tabie raspaviadajuć u škole. Kleapatra była ciemnaskuraj».
Raniej pradziusar filma Džada Pinkiet Śmit, raspaviadajučy ab prajekcie, zajaŭlała, što chacieła raspavieści historyju Kleapatry, tamu što «nie tak užo časta my bačym ci čujem historyi pra ciemnaskurych caryc».
Paśla vychadu trejlera i aburanaj reakcyi na jaho aktrysa Adel Džejms napisała ŭ siabie ŭ tvitary: «Kali vam nie padabajecca padbor akcioraŭ, nie hladzicie sieryjał», supravadziŭšy zapis zdymkam ekrana z abraźlivymi kamientaryjami, jakija pryjšli joj.
Kleapatra
Kleapatra naradziłasia ŭ jehipieckim horadzie Aleksandryja ŭ 69 h. da n. e., jana stała apošniaj carycaj hrekamoŭnaj dynastyi, zasnavanaj pałkavodcam Alaksandra Makiedonskaha Ptalemiejem I.
Jana źmianiła na tronie svajho baćku Ptalemieja XII u 51 h.da n. e i praviła da svajoj śmierci ŭ 30 h. da n. e. U apošnija hady jaje praŭleńnia Jehipiet byŭ zavajavany Rymam, a sama Kleapatra skončyła žyćcio samahubstvam, kab nie patrapić u pałon.
Kim była maci Kleapatry, dakładna nie viadoma: pavodle adnoj teoryi, jana była niezakonnanarodžanaj dačkoj Ptalemieja ad adnoj ź jaho nałožnic, jakaja, u svaju čarhu, tearetyčna, mahła być jak jehipciankaj, tak i ciemnaskuraj uradženkaj inšaj častki Afryki.
Jeva Hryn i Viensan Kasiel źziajuć u novym sieryjale pra śpiecahientaŭ
Nad filmam pra Barbi pracuje Hreta Hiervih, viadomaja svaimi pracami ŭ niezaležnym kino
«Hościa z budučyni» dla novaha pakaleńnia. Vyjšaŭ pieršy trejler filma «Sto hadoŭ tamu napierad»
Kamientary
a chiba nie?
majkł džeksan na karcinkach taksama da ciomnaskuraha nie nadta padobny...