Biełaruskaha dyryžora Adeskaj opiery zvolnili za hrupavoje fota z mužam Niatrebki
8 krasavika ŭ Nacyjanalnaj opiery horada Baku ihrali «Bahiemu» Džakoma Pučyni. Dyryžyravać zaprasili hałoŭnaha dyryžora Adeskaj opiery, hramadzianina Biełarusi Viačasłava Čarnuchu-Voliča, jaki maje daŭniaje supracoŭnictva z Azierbajdžanam i nieadnarazova vystupaŭ tam pa zaprašeńni dyrekcyi miascovaj opiery. Paśla zdareńnia byli apublikavany fota i videa, na jakich adeski dyryžor paziruje pobač z novym kiraŭnikom Bakinskaj opiery — tenaram Jusifam Ejvazavym i mužam opiernaj śpiavački Hanny Niatrebka, jakaja znachodzicca pad sankcyjami va Ukrainie. Urešcie heta fota vylezła biełarusu bokam, piša «Ukrainskaja praŭda».
7 krasavika Jusif Ejvazaŭ uznačaliŭ opieru Baku, i vykanańnie «Bahiemy» faktyčna stała «pryvitańniem» novaha kiraŭnika na pasadzie. Sumiesnyja fota hałoŭnaha dyryžora Adeskaj opiery i Jusifa Ejvazava (nie ŭdvoch, a ŭ cełaj hrupie) vyklikali abureńnie ŭkrainskaj kulturnaj supolnaści. Niahledziačy navat na toje, što
hałoŭny dyryžor Adeskaj opiery i kiraŭnictva teatra ŭ kamientary «Ukrainskaj praŭdzie» zajavili, što adbyłosia nieparazumieńnie, tak jak Viačasłaŭ Čarnucha-Volič nie viedaŭ zahadzia, što Jusif Ejvazaŭ uznačalić Azierbajdžanski akademičny teatr opiery i baleta. Zaprašała jaho na hetuju pastanoŭku raniejšaje kiraŭnictva teatra.
Najpierš «Ukrainskaja praŭda» źviazałasia z kiraŭnicaj Adeskaj nacyjanalnaj opiery Nadziejaj Babič, jakaja paviedamiła, što nie viedała zahadzia ab nieadnaznačnaj situacyi, a ab pryznačeńni Jusifa Ejvazava pračytała ŭ navinach.
«Viačasłaŭ Čarnucha-Volič pajechaŭ nie na zaprašeńnie Ejvazava, jakoha pryznačyli ŭsiaho za dzień da vystupu. Nakolki ja viedaju, našaha dyryžora zaprašaŭ papiaredni kiraŭnik. Jon užo byŭ zajaŭleny ŭ vystupie. Tak što heta nie ŭzajemaźviazanyja fakty», — kaža Nadzieja Babič.
Taksama dyrektarka opiery zajaviła, što teatr nie budzie padtrymlivać supracoŭnictva z Bakinskaj opieraj ciapier, kali jaje kiraŭnikom staŭ Jusif Ejvazaŭ. Akramia taho, Babič dadała, što nie padtrymlivaje ŭdzieł u padziei dyryžora Viačasłava Čarnuchi-Voliča.
«Jon vierniecca — budziem mieć razmovy. Takich padziej nie pavinna być, źviazanych z našym teatram. Pazicyja teatra takaja: liču, što my pavinny pierapynić hetyja suviazi z opieraj u Baku paśla pryznačeńnia Jusifa Ejvazava. Uvohule kateharyčna nie», — zajaviła Nadzieja Babič.
Ź Viačasłavam Čarnucham-Voličam vydańnie pahutaryła ŭ telehramie, bo jon pa-raniejšamu znachodziŭsia za miažoj. Dyryžor havaryŭ na biełaruskaj movie. Jon patłumačyŭ svaju pazicyju tak, što ŭžo nie moh admovicca ad papiaredniaj damoŭlenaści z byłym kiraŭnictvam teatra i nie mieŭ takoj infarmacyi, što novy kiraŭnik Bakinskaj opiery Jusif Ejvazaŭ padtrymlivaje vajnu va Ukrainie.
«Kali havorka idzie pra žonku Jusifa Ejvazava, to ŭ nas syn za baćku i muž za žonku nie adkazvaje. Jość prezumpcyja. Ja nie bačyŭ publičnych zajaŭ novaha kiraŭnika Bakinskaj opiery ab jaho padtrymcy vajny va Ukrainie. Zatoje ŭ pačatku poŭnamaštabnaha ŭvarvańnia jon napisaŭ u sacsietkach, što asudžaje lubuju vajnu i maje va Ukrainie mnohich siabroŭ», — zajaviŭ Viačasłaŭ Čarnucha-Volič.
Adnosna supracoŭnictva z Bakinskaj opieraj, to dyryžor zajaviŭ, što śviadoma admaŭlaŭsia ŭdzielničać u padziejach, dzie hrali muzyku ruskich kampazitaraŭ.
«Z Bakinskim teatram ja supracoŭničaju bolš za 10 hadoŭ. Było vielmi važna supracoŭničać, kali pačałasia vajna i kali były dyrektar teatra prapanoŭvaŭ padtrymlivać Ukrainu. Hod tamu zrabili vystup našaha barytona Bahdana Pančanki — u mianie byli «Karmen» i «Bahiema».
Hety ž dyrektar zaprasiŭ mianie na «Bahiemu», jakuju hrali 8 krasavika. Ja jamu tady skazaŭ, što nie budu hrać ruski repiertuar i supracoŭničać z rasijskimi artystami — jon usio ŭličyŭ. Ź pieršaha dnia vajny ja zastavaŭsia va Ukrainie i pracavaŭ, kab pra Ukrainu viedali, na našu pieramohu», — raskazaŭ Viačasłaŭ Čarnucha-Volič.
Dyryžor zajaviŭ, što ab pryznačeńni novaha kiraŭnika daviedaŭsia ŭžo ŭ Baku. «Kali prylacieŭ u Baku — paviedamili, što ŭčora dyrektar pakinuŭ teatr, i novy dyrektar źjaviŭsia ŭ toj dzień, na jaki byŭ pryznačany śpiektakl.
Sa spadarom Ejvazavym asabista ja nie znajomy, ubačylisia, kali jon vyjšaŭ na scenu. Nijakich stasunkaŭ ź im nie maju», — zajaviŭ hałoŭny dyryžor Adeskaj opiery.
Akramia taho, Viačasłaŭ Čarnucha-Volič adznačyŭ, što
z pačatku poŭnamaštabnaj vajny pravioŭ šerah kancertaŭ pa ŭsim śviecie, kab pryciahnuć uvahu da vajny va Ukrainie. I paprasiŭ dadać, što byŭ vymušany pakinuć Biełaruś u 2020 hodzie i byŭ zvolnieny z pasady hałoŭnaha dyryžora biełaruskaj opiery praz adkryty supraciŭ režymu Łukašenki.
Hałoŭny režysior Adeskaj opiery Aksana Taranienka ŭ kamientary «Ukrainskaj praŭdzie» padkreśliła, što daŭno nie mieła znosin z hałoŭnym dyryžoram, adnak sumiesnyja fota ź Jusifam Ejvazavym — heta reputacyjnaja ryzyka dla Adeskaj opiery.
«Zrazumieła, što damoŭlenaść była sa starym dyrektaram — jašče da taho, jak Ejvazaŭ staŭ na pasadu. Ale sumiesnyja fota i videa padstaŭlajuć Opieru i jaje kiraŭnictva. Kali Viačasłaŭ Čarnucha-Volič sumlenna vyjhraŭ konkurs — usio było tady narmalna, sumlenna pracavaŭ. Što ź im ciapier adbyvajecca — nie viedaju.
Mahčyma, jon prosta nie źviazvaje svaju budučyniu z Ukrainaj, bo jon usio ž nie ŭkrainiec. Tvorčamu čałavieku zaŭsiody chočacca być intehravanym u niejkuju prastoru. My zaraz sprabujem być intehravanymi ŭ jeŭrapiejskuju», — zajaviła Aksana Taranienka.
Taksama pra vystup dyryžora ŭ Baku vykazaŭsia staršynia prafsajuza Adeskaha nacyjanalnaha akademičnaha teatra opiery i baleta Vital Sivahłaz. Adnosna fotazdymkaŭ hałoŭnaha dyryžora ŭ Bakinskaj opiery Vital Sivahłaz ličyć, što heta niedapuščalna, uličvajučy status dyryžora i teatra.
«Ja taksama byŭ ździŭleny, kali ŭbačyŭ hetyja fatahrafii. Niadaŭna byŭ pryznačany dyrektaram, ale kali b ja daviedaŭsia, to admianiŭ by hety vystup. Ciapier heta niedapuščalna, kali naša kraina ŭ stanie vajny z Rasijaj. Tym bolš heta hałoŭny dyryžor Nacyjanalnaha teatra.
Zaraz kałabaracyi nie pavinna być ni ŭ jakim razie, ale da taho ž — my pieršyja teatry krainy, jakich nie tak šmat. I pavinny kiravacca zakonami, być na varcie hetych padziej, pakazvać prykład — nie dapuskać takich situacyj», — skazaŭ Sivahłaz.
Taksama jon nahadaŭ, što papiaredni hałoŭny dyryžor Alaksandr Samaiłe, jaki byŭ hramadzianinam Małdovy, pakinuŭ teatr mienavita praz toje, što abraŭ nie Ukrainu, a Maskvu.
Skončyłasia heta ŭsio tym tym, što Viačasłava Čarnuchu-Voliča z Adeskaha teatra zvolnili. Pra heta paviedamiła dyrektarka teatra Nadzieja Babič. Na sajcie Adeskaj opiery ŭžo prybrali infarmacyju ab zvolnienym hałoŭnym dyryžoru i vydalili staronku, pryśviečanuju Čarnuchu.
U Adesie afišy Adeskaj opiery sa śpiektaklami, u jakich pavinien byŭ udzielničać były hałoŭny dyryžor, zdymajuć. «My asabista ŭsio zdymajem — jon ciapier nie hałoŭny dyryžor i naohuł nie dyryžor našaha teatra», — prakamientavała Babič.
Skandał z-za Niatrebki: hrupa Pussy Riot admoviłasia vystupać na fiestyvali ŭ Hiermanii zamiest artystaŭ z Ukrainy
Uładzimir Zialenski ŭvioŭ sankcyi suprać viadomych rasijskich artystaŭ i prapahandystaŭ. Siarod ich — Kirkoraŭ, Praśniakoŭ, Vinakur, Niatrebka
Ministr kultury Ukrainy: Admaŭlacca ad supracoŭnictva z «dobrymi ruskimi» — jak minimum niedalnabačna
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary