Cichanoŭskaja ŭ Sienacie ZŠA: Treba harantavać, što ŭ paślavajennych damoŭlenaściach nie budzie miesca asablivym intaresam Rasii ŭ Biełarusi
Śviatłana Cichanoŭskaja vystupiła na słuchańniach pa biełaruskim pytańni ŭ amierykanskim Sienacie, padčas jakich pastaviła pytańnie ab tym, jakim musić być miesca Biełarusi ŭ paślavajennym śviecie, i zaklikała amierykanskija ŭłady hetamu spryjać.
U svajoj pramovie Śviatłana Cichanoŭskaja koratka apisała niaradasnuju situacyju ŭ siońniašniaj Biełarusi, padkreśliŭšy:
«Režym abychodzicca z palitviaźniami jak z zakładnikami, vykarystoŭvajučy ich, kab siejać strach unutry krainy i handlavacca za mižnarodnaje pryznańnie. Režym padtrymlivaje vysoki ŭzrovień teroru, mianiajučy palityčnuju sistemu, ideałohiju i zakanadaŭstva na nieastalinizm. U Biełarusi samo paniaćcie salidarnaści pa-za zakonam, režym sprabuje razarvać usie haryzantalnyja suviazi ŭ hramadstvie».
U suviazi z tym, što adbyvajecca,
«ciapier my pavinny vyrašyć dźvie najskładaniejšyja zadačy: vyzvalić Biełaruś ad tyranii i zachavać jaje niezaležnaść». I «nam nieabchodnaja dapamoha śvietu, kab pieramahčy ŭ hetaj bitvie».
Z 2020 hoda my nazirajem biesprecedentny patok padtrymki i salidarnaści, kanstatavała Cichanoŭskaja. A ciapier «my pavinny pieratvaryć hetuju enierhiju ŭ mižnarodnuju stratehiju dla niezaležnaj i suvierennaj Biełarusi».
Cichanoŭskaja śćviardžaje:
«Nadyšoŭ čas dla žorstkaha adkazu na varožyja, kałanizatarskija dziejańni Rasii suprać Biełarusi. Ja zaklikaju śviet padtrymać naša patrabavańnie ab poŭnym vyvadzie rasijskich vojskaŭ ź Biełarusi i poŭnym spynieńni ich udziełu ŭ vajnie. My nie možam adkładvać pytańnie Biełarusi da zakančeńnia vajny.
Jak my bačym, demakratyčnaja Biełaruś rezka skaraciła b šlach da pieramohi Ukrainy. Bolš za toje, my bačym, što dasiahnieńnie ŭstojlivaha miru mahčymaje ŭ vyniku kompleksnaha padychodu da stabilizacyi ŭ rehijonie. Taki padychod pavinien uklučać płan Maršała dla Ukrainy, Małdovy i Biełarusi, pakolki rehijanalnaja biaśpieka i stabilnaść mahčymyja tolki tady, kali ŭsie hetyja krainy buduć volnyja ad kantrolu Maskvy.
Nam taksama treba harantavać, što ŭ paślavajennych damoŭlenaściach nie budzie miesca asablivym intaresam Rasii ŭ Biełarusi. Takija ŭhody zakładuć asnovu dla novaj niestabilnaści. U dyskusii pra mir pavinny ŭdzielničać i biełaruskija demakratyčnyja siły, jakija vałodajuć lehitymnaściu i dumajuć pra nacyjanalnyja intaresy».
Zaklikaŭšy ZŠA i jaje krainy-adnadumcy praciahvać padtrymlivać Ukrainu, u tym liku samaj pieradavoj vajennaj technikaj, Cichanoŭskaja padkreśliła:
«Vajna dała zrazumieć biełarusam, što adnosiny z varožaj Rasijaj musiać źmianicca. Abjadnany pierachodny kabiniet raspracavaŭ padychod da pierahladu adnosinaŭ z Rasijaj, jaki ŭklučaje ŭ siabie vychad z vajennaha sajuza z Rasijaj i Damovy ab Sajuznaj dziaržavie.
Zamiest hetaha my pačali pracavać nad jeŭrapiejskaj pierśpiektyvaj dla Biełarusi, što budzie ŭklučać dałučeńnie da rehijanalnych inicyjatyvaŭ i šyrokaha partniorstva z susiednimi dziaržavami. Ja zaklikaju Kanhres ZŠA padtrymać hetuju stratehičnuju źmienu dla Biełarusi».
Ciapier, na dumku Cichanoŭskaj, nadyšoŭ zručny momant dla abnaŭleńnia amierykanskaha Zakona ab demakratyi ŭ Biełarusi z ulikam roli Łukašenki ŭ vajnie i prapanovaj adpaviednaj palityki dla ŭrada ZŠA. Jana zaklikała ZŠA
«całkam admovicca ad pryznańnia Łukašenki i jaho režymu jak padkantrolnych zamiežnym siłam na škodu samoj dziaržaŭnaści Biełarusi. Hety praces pavinien supravadžacca ŭsio bolšym pryznańniem demakratyčnych siłaŭ».
A «Łukašenka zasłuhoŭvaje taho, kab siadzieć pobač z Pucinym pierad trybunałam za ździejśnienyja złačynstvy».
Pry kancy pramovy Śviatłana Cichanoŭskaja zrabiła akcent na nieabchodnaści
«nie prosta trymać Biełaruś u paradku dnia, ale zrabić hetuju ŭvahu praktyčnaj, zasiarodzić mižnarodnyja namahańni na tym, kab adabrać prastoru i resursy ŭ režymu. Supracoŭnictva z ZŠA ŭ hetaj śfiery akazałasia dziejsnym, i jaho možna jašče bolš naraścić, asabliva kali havorka idzie pra AAN i Radu biaśpieki».
Čytajcie taksama:
Rada Jeŭropy ŭpieršyniu ŭ historyi pačynaje supracoŭnictva z uradam u vyhnańni. Čaho čakać?
Cichanoŭskaja ŭźniała pytańnie jadziernaj zbroi ŭ Biełarusi na sustrečy z Salivanam
Dva dyktatary, jakija zahulalisia ŭ vajnu, zrabili ź Biełarusi cel dla ŭdaru — Cichanoŭskaja
Jak skłaŭsia los chłopca ź viadomaha žyćcieśćviardžalnaha fota studenckaha maršu-2020?4
Kamientary