Mužčynu ŭ Hiermanii ŭdałosia vylečycca ad VIČ. Heta ŭžo piaty vypadak u historyi
20 lutaha było apublikavana paviedamleńnie ab novym vypadku poŭnaha vylečvańnia ad VIČ. Pieramahčy chvarobu ŭdałosia paśla transpłantacyi pacyjentu stvałavych kletak, piša Thinktanks.by.
«Dziusieldorfski pacyjent» staŭ piatym u śviecie čałaviekam, jaki całkam vylečyŭsia ad VIČ dziakujučy pierasadcy stvałavych kletak i trecim — kali ličyć tolki vypadki pierasadki kaściavoha mozhu. Pra hetaje dasiahnieńnie paviedamiŭ navukovy artykuł, apublikavany ŭ časopisie Nature Medicine.
Mužčynu, čyjo imia nie nazyvajecca z etyčnych mierkavańniaŭ, 53 hady. VIČ-infiekcyja była dyjahnastavanaja ŭ jaho ŭ 2008 hodzie, a nieŭzabavie vyjaviłasia jašče i lejkiemija. U 2013-m pacyjentu dziela hetaha byŭ pierasadžany kaściavy mozh ad donara z mutacyjaj u hienie CCR5.
I voś užo praz amal 10 hadoŭ paśla apieracyi ŭ arhaniźmie hetaha čałavieka nie vyjaŭlena značnych śladoŭ virusa, niahledziačy na toje, što paddośledny ŭžo bolš za čatyry hady nie prymaje antyvirusnych preparataŭ.
Pieršy vypadak vyzdaraŭleńnia ad VIČ adbyŭsia ŭ 2009 hodzie z «bierlinskim pacyjentam». Paźniej jon raskryŭ svajo imia — Cimaci Rej Braŭn — i navat zasnavaŭ fond dla vyvučeńnia VIČ.
Braŭnu taksama «pašancavała» padchapić nie tolki VIČ-infiekcyju, ale i zachvareć na lejkiemiju. Lačeńnie ad apošniaj patrabuje pierasadki kaściavoha mozhu ź jaho stvałavymi kletkami. Ź ich u arhaniźmie pradukujucca novyja kletki kryvi zamiest zakranutych rakam.
Sapraŭdnym šancavańniem było toje, što lačyć Braŭna ŭziaŭsia lekar, jaki viedaŭ pra mutacyi, što sustrakajucca ŭ 1% pradstaŭnikoŭ jeŭrapieoidnaj rasy. VIČ vykarystoŭvaje dla praniknieńnia ŭ čałaviečuju kletku białok CCR5, i mutacyja ŭ adpaviednym hienie robić białok nieprydatnym dla stykoŭki ź virusam.
Jašče bolšaj udačaj stała toje, što siarod patencyjnych donaraŭ, jakija padychodzili Braŭnu pa ŭsich šmatlikich pakazčykach, znajšoŭsia nośbit hetaj mutacyi. Pacyjentu pierasadzili kaściavy mozh. U stvałavych kletkach donarskaha mozhu nie było hienaŭ virusa, novyja limfacyty nie paddavalisia zaražeńniu, a staryja zaražanyja limfacyty pastupova razburylisia. Łancužok pieradačy infiekcyi ŭ arhaniźmie pierapyniŭsia. Praź niekalki hadoŭ paśla apieracyi pacyjenta prydzirliva abśledavali i nie znajšli ŭ jaho nijakich prykmiet VIČ.
Praŭda, asablivaha aptymizmu hetyja dasiahnieńni miedycyny nie dajuć. Pierasadka kaściavoha mozhu — nadta niebiaśpiečnaja apieracyja, i robiać jaje tolki tady, kali biez hetaha nie abyścisia. Lejkiemija — jakraz taki vypadak. Tak što transpłantacyja naŭrad ci kali-niebudź stanie masavym mietadam lačeńnia VIČ. I navat tym, kamu patrebna takoje ŭmiašańnie, naŭrad ci chopić donaraŭ z redkaj mutacyjaj.
Kamientary