U Rahačovie 28 kastryčnika zatrymali ŭdzielnikaŭ hurta Tor Band razam z žonkami. Paźniej muzykaŭ Jaŭhiena Burło, Dźmitryja Hałavača i Andreja Jaremčyka niekalki razoŭ zapar sudzili pavodle administracyjnych pratakołaŭ, a niadaŭna pieraviali ŭ homielski SIZA ŭ miežach kryminalnaj spravy, paviedamlajuć pravaabaroncy.
Pravaabaroncam stała viadoma, što adzin z pratakołaŭ pavodle art. 19.11 KaAP na Hałavača byŭ składzieny za toje, što jon napisaŭ «ekstremisckuju» pieśniu «Rodnaja ziamla» i vykłaŭ jaje ŭ interniet.
Tak, pavodle pratakoła, Hałavač, «vykarystoŭvajučy hitaru z futarałam i remieniem, vyrabiŭ i z taho ž času zachoŭvaŭ z metaj raspaŭsiudžvańnia ŭ supołcy «Tor band» va ŭkantakcie, jakaja naležyć jamu, aŭdyjomateryjał «Rodnaja ziamla» [napisany ŭ 2020 hodzie] muzyčnaha kalektyvu Tor band, jaki adnosicca da infarmacyjnaj pradukcyi, uklučanaj u respublikanski śpis ekstremisckich materyjałaŭ».
Na sudzie Dźmitryj vinu nie pryznaŭ, ad dačy tłumačeńniaŭ admoviŭsia.
Sudździa adznačyła, što praz toje, što «Hałavač źjaŭlaŭsia aktyŭnym udzielnikam hurta, jamu było dakładna viadoma pra ŭklučeńnie pieśni ŭ «śpis ekstremisckich materyjałaŭ»». Adnak na momant suda Dźmitryj užo miesiac znachodziŭsia za kratami, a infarmacyja pra pryznańnie ekstremisckimi staronak u sacsietkach i piesień hurta Tor Band u respublikanskim śpisie źjaviłasia tolki na pačatku listapada z paznakaj pra toje, što ich pryznali jašče nibyta 29 žniŭnia. Vynik suda — 15 sutak.
Mierkavana, heta nie pierš sud za «napisańnie pieśni», bo hitara Hałavača ŭžo była kanfiskavanaja pavodle pastanovy suda ad 14 listapada pa art. 19.11 KaAP.
Akramia hetaha, Jaŭhiena Burło 15 listapada asudzili za toje, što jon «sumiesna ź inšymi muzykami ŭ poli z vykarystańniem barabanaŭ, draŭlanych barabannych pałačak, a taksama mietaličnych stojek i talerak udzielničaŭ u vyrabie videamateryjałaŭ dla klipa «Žyvie», jaki pryznany ekstremisckim».
Taksama jamu staviŭsia ŭ vinu ŭdzieł u jašče adnym klipie hurta. Pavodle materyjałaŭ spravy, padčas pieratrusu muzyčnyja instrumienty kanfiskavali. Sudździa Iryna Zyl pryznała Jaŭhiena vinavatym pavodle art. 19.11 KaAP i aryštavała jaho na 15 sutak.
16 studzienia hurt Tor band byŭ pryznany «ekstremisckim farmavańniem».
Restaŭracyi ŭ Biełarusi zastałosia na try dni. Hałoŭnamu pradpryjemstvu krainy faktyčna padpisali śmiarotny prysud1
Kamientary