Paŭła Mažejku pakinuli pad vartaj jašče na miesiac. Jamu nie pieradajuć vitaminy
Papiaredni termin utrymańnia pad vartaj hrodzienskaha žurnalista i hramadskaha dziejača Paŭła Mažejki skončyŭsia 31 studzienia. Jaho nie vyzvalili, termin zatrymańnia praciahnuli jašče na miesiac. Pajšoŭ šosty miesiac, jak žurnalist znachodzicca za kratami.
Jak stała viadoma słužbie manitorynhu Biełaruskaj asacyjacyi žurnalistaŭ, z kanca śniežnia ŭ SIZA hrodzienskaj turmy, dzie ŭtrymlivajuć Paŭła, pierastali prymać vitaminy i leki ad rodnych viaźniaŭ. Heta rasparadžeńnie tyčycca ŭsich źniavolenych.
Raniej Paŭłu abmiežavali pasyłki i banderoli — ich vaha ŭličvajecca ŭ ahulnuju štomiesiačnuju vahu pieradač u 30 kiłahramaŭ. Choć viadoma, što astatnich viaźniaŭ SIZA takija abmiežavańni nie tyčacca.
Taksama Paŭłu błakujuć listavańnie: jamu pieradajuć listy tolki ad siamji, jaho listy taksama dachodziać tolki rodnym. Ad inšych ludziej žurnalistu čas ad času dachodziać paštoŭki. Pavieł vielmi ŭdziačny ŭsim, chto dasyłaje hrašovyja pieravody.
Viadomy hrodzienski žurnalist i hramadski dziejač Pavieł Mažejka byŭ zatrymany i aryštavany 30 žniŭnia 2022 hoda ŭ Hrodnie. Za što — dakładna nieviadoma, advakat znachodzicca pad padpiskaj ab nierazhałošvańni. 20 vieraśnia pravaabarončyja arhanizacyi Biełarusi pryznali Paŭła palityčnym viaźniem. U abaronu žurnalista z patrabavańniem jaho vyzvaleńnia vystupiła taksama Jeŭrapiejskaja fiederacyja žurnalistaŭ.
U siecivie źjaviłasia staronka, pryśviečanaja Paŭłu Mažejku. Sajt raspaviadaje, chto taki Pavieł, čamu jon — čałaviek-lehienda, i jak jaho možna padtrymać.
Pavieł Mažejka — viadomy žurnalist, mieniedžar kultury, stvaralnik likvidavanaj uładami kultavaj hrodzienskaj prastory «Centr haradskoha žyćcia», kaardynatar vydavieckaj inicyjatyvy «Haradzienskaja biblijateka», jakaja śpiecyjalizavałasia na vydańni knih aŭtaraŭ z Hrodna i pra Hrodna.
U sakaviku 2021 hoda Paŭła Mažejku zatrymali razam z mastakom Alesiem Puškinym, jaki vystaviŭ u «Centry haradskoha žyćcia» partret dziejača antysavieckaha ruchu časoŭ Druhoj suśvietnaj vajny. U dačynieńni da Paŭła raspačali kryminalnuju spravu «za naŭmysnyja dziejańni, skiravanyja na reabilitacyju i apraŭdańnie nacyzmu». Ale paśla 72 hadzin zatrymańnia Paŭła vyzvalili z farmuloŭkaj «źnikli padstavy dla zatrymańnia». U kancy 2021 hoda kryminalnuju spravu suprać jaho spynili. Paśla hetaha Pavieł moh źjechać ź Biełarusi, adnak jon zastavaŭsia ŭ krainie.
Padtrymać žurnalista možna, dasłaŭšy paštoŭku albo hrašovy pieralik pa adrasie: 230023, h. Hrodna, turma №1, SIZA, vuł. Kirava, 1, Mažejku Paŭłu Ivanaviču.
Kamientary