Vykazvaŭsia ŭ bok rasijskich vajskoŭcaŭ. Što viadoma pra novyja palityčnyja spravy ŭ Homieli
Na praŭładnych telehram-kanałach źjavilisia publikacyi pra dva novyja zatrymańni pa palityčna matyvavanych spravach, źviartaje ŭvahu «Fłahštok».
![](http://d3kcf2pe5t7rrb.cloudfront.net/img/w840d4webp1/photos/z_2022_09/photo_2022-09-19_16-06-40-6iccw.jpg.webp)
Žychara Homiela Alaksandra Pracharenku žorstka zatrymaŭ AMAP. Jak vynikaje z apublikavanaj infarmacyi, mužčynu vinavaciać pavodle dvuch kryminalnych artykułaŭ: 130 (raspalvańnie varožaści) i 391 (abraza sudździ). U pakajannym videa Alaksandr skazaŭ, što niecenzurna vykazvaŭsia ŭ bok rasijskich vajskoŭcaŭ.
Heta siłaviki rasceńvajuć jak raspalvańnie varožaści, i ŭ toj ža čas zajmajucca hetym sami. Alaksandra, jaki pradstaviŭsia inžynieram pa technicy biaśpieki RNPC, u publikacyi nazvali «handlarom futrami» i apublikavali adpaviednyja zdymki. U dopisie adznačyli, što zatrymany dvojčy na hod «jeździŭ na Maldzivy» i maje «asabniaki» i aŭtamabil Tesla za 115 tysiač dalaraŭ.
Za kamientaryi ŭ telehram-čacie, pakinutyja jašče ŭ 2020 hodzie, zatrymany biełaruskamoŭny hamialčuk Jahor Račkoŭski. Viadoma, što raniej jon pracavaŭ ekanamistam na pradpryjemstvie «Małočnyja pradukty». Miarkujučy pa dopisie na praŭładnym TH-kanale, 39-hadovaha mužčynu taksama vinavaciać u «raspalvańni varožaści» ŭ dačynieńni da milicyjantaŭ i abrazie pradstaŭnikoŭ ułady.
Taksama raniej paviedamlałasia pra zatrymańnie žurnalista Jaŭhiena Mierkisa. Jamu vystavili abvinavačańnie pavodle kryminalnaha artykuła 361-4, jaki praduhledžvaje źniavoleńnie ad 2 da 6 hadoŭ.
A 16 vieraśnia znoŭ zatrymali pravaabaroncu z Mazyra Uładzimira Cielepuna. Jaho vyklikali ŭ miascovy RUUS, ale adtul jon nie vyjšaŭ. Viadoma, što pravaabaroncu vyklikali dla «padpisańnia vypraŭlenych administracyjnych pratakołaŭ».
Kamientary