Adukacyja ŭ kredyt. Jakija kredyty na navučańnie prapanujuć banki
Mnohija VNU sioleta padniali płatu za navučańnie, u siarednim pryrost skłaŭ kala 10%. Paśla padaražańnia košt navučańnia na niekatorych śpiecyjalnaściach składaje 4-5 tysiač rubleŭ u hod. «Naša Niva» pahladzieła, na jakich umovach biełaruskija banki dajuć kredyty na adukacyju.
Ilhotnaje kredytavańnie
Aproč ilhotnych kredytaŭ na budaŭnictva i nabyćcio aŭtamabilej marki Geely, u Biełarusbanka isnuje lhotnaje kredytavańnie na apłatu navučańnia. Pa takim taryfie kredytujuć tolki tych, chto atrymlivaje pieršuju vyšejšuju adukacyju i źbirajecca vučycca na dzionnym adździaleńni.
Kab atrymać ilhotny kredyt, vaš siaredniemiesiačny dachod na kožnaha z členaŭ siamji musić być mienšym za 1150 rubloŭ. Dla raźliku biaruć danyja za apošnija 12 miesiacaŭ. Naprykład, kali mama i tata studenta atrymlivajuć siaredniestatystyčnuju biełaruskuju zarpłatu (1626,5 rubla brudnymi zhodna z aficyjnaj statystykaj), to ich siamiejny biudžet budzie składać kala 2800 rubloŭ (suma za vylikam padatkaŭ). Padzialiŭšy hetuju ličbu na traich, my atrymajem pa 933 rubli na kožnaha člena siamji. A kali ŭ takoj siamji jość jašče i druhoje dzicia, to dachod na kožnaha jašče mienšy.
Pamier kredytu moža dasiahać da 70% ad koštu navučańnia. Staŭka płavajučaja, jana składaje 50% ad staŭki refinansavańnia. Na biahučy momant heta 6% hadavych.
Padčas navučańnia daviadziecca płacić tolki pa pracentach. Pahašeńnie asnoŭnaj sumy adbyvajecca paśla skančeńnia vučoby, termin pahašeńnia — 5 hod. Padrabiaźniej aznajomicca z umovami lhotnaha kredytavańnia, možna tut.
Što rabić, kali vy nie lhotnik?
Kali vašy zarobki nie dazvalajuć atrymać kredyt na lhotnych umovach, to vam zastajecca dasiažny kredyt pad 19,9% hadavych. U adroźnieńnie ad ilhotnaha, taki kredyt moža pakryvać nie da 70%, a ŭsie 100% ad koštu navučańnia. Maksimalny termin — da 75 miesiacaŭ. Štomiesiačnaja suma vypłat składaje 200 rubloŭ. Apłata musić być uniesiena nie paźniej za 20 čysło kožnaha miesiaca. Kredyty na takich umovach prapanuje Bielinviestbank.
Jašče adzin bank, jaki daje kredyty dla apłaty navučańnia, — Biełahraprambank. Jon prapanuje kredyt «Studencki» pad 23-24% hadavych.
Čytajcie taksama:
Jakija ŭniviersitety padniali ceny na navučańnie i kolki ciapier buduć płacić studenty?
BDU padniaŭ płatu za navučańnie. Na jurfaku i mižnarodnym pravie jana składzie 5 tysiač rubloŭ
Bajpoł nazvaŭ imiony mahčymych zabojcaŭ Andreja Zielcara. I zajaviŭ, što siłavika «Nirvanu» zastreliŭ svoj ža6
Kamientary