Biełaruś — kraina nie vielmi bahataja na karysnyja vykapni, ale jana znachodzicca ŭ centry Jeŭropy i maje supolnyja miežy adrazu z tryma krainami ES. Vyhladaje, što apošnim časam ułady ŭsio čaściej razhladajuć miežy i ŭsio, što ź imi źviazana, mienavita jak nievyčarpalnyja śvidraviny dla papaŭnieńnia biudžetu. «Naša Niva» vyvučyła, jakija pabory isnujuć dla pieravozčykaŭ i padarožnikaŭ, i pasprabavała padličyć, kolki hrošaj dziaržava zarablaje za košt svaich miežaŭ.
Z čaho ŭsio pačałosia?
Jašče 30 žniŭnia 2021 hoda nabyła moc pastanova Savieta ministraŭ, u adpaviednaści ź jakoj hruzavyja aŭtamabili, jakija ŭvoziać tavary ź Litvy ŭ Biełaruś, pavinny abstaloŭvacca elektronnymi navihacyjnymi płombami.
Pry kancy leta 2021 hoda za abaviazkovaje vykarystańnie takoha devajsu treba było zapłacić 5 bazavych vieličyń (145 rubloŭ, ci kala 60$ pa tahačasnym kursie).
Paźniej, z 9 śniežnia 2021 hoda, hetaje patrabavańnie raspaŭsiudzili i na hruzavy transpart, jaki idzie ŭ Biełaruś z boku Polščy. U dadatak da hetaha, ułady pavysili košt płomby z 5 da 10 bazavych vieličyń. Z rostam bazavaj vieličyni ad 1 studzienia 2022 hoda cana elektronnaj płomby padniałasia da 320 rubloŭ.
Ad 1 maja biahučaha hoda da Litvy i Polščy dadali Łatviju, paśla čaho amal kožny hruzavik, jaki ŭjazdžaje ŭ Biełaruś z boku ES, musić płacić 320 rubloŭ (kala 120 dalaraŭ pa biahučym kursie) za vykarystańnie navihacyjnaj płomby.
Navihacyjnyja płomby
Kab padličyć, kolki prykładna hrošaj dziaržava maje ad navihacyjnych płombaŭ, treba pahladzieć na prapusknuju zdolnaść pamiežnych punktaŭ. Ź jaje vynikaje, što za sutki Biełaruś zdolnaja prapuścić praz svaje miežy ź ES 3300 hruzavikoŭ (z ulikam taho, što dahetul zastajucca zakrytymi «Bruzhi»).
Ale treba razumieć, što prapusknaja zdolnaść i faktyčnaja kolkaść transpartu, jakaja pierasiakaje miažu, — heta roznaje, tym bolš, što biełaruski bok rehularna skardzicca na toje, što jeŭrapiejskija krainy nie vykonvajuć damoŭlenaści pa abjomach aformlenaha transpartu.
Tak, naprykład, Dziaržapahrankamitet rapartavaŭ, što za 7 lipienia praź litoŭskija i polskija punkty propusku ŭ krainy Jeŭrasajuza prajšło ŭsiaho 51% i 35% fur ad normy adpaviedna. Łatvijskija kantrolnyja słužby prapuścili na svaju terytoryju 60%.
Niekalkimi dniami raniej jon śćviardžaŭ, što Litva i Polšča za sutki prapuścili ŭ ES mienš za 40% fur ad normy.
Sychodziačy z hetych ličbaŭ, dla padliku ahulnaj kolkaści hruzavikoŭ možna brać 40 adsotkaŭ ad prapusknoj zdolnaść punktaŭ propusku.
Vynikaje, što za 24 hadziny praź miežy Biełarusi i ES prajazdžaje kala 1300 hruzavikoŭ. Značyć, za sutki tolki ad ustaloŭki navihacyjnych płombaŭ Biełaruś atrymlivaje 156 tysiač dalaraŭ. Ci kala 4,68 miljona dalaraŭ u miesiac.
Zbor za vyjezd za miažu
Navihacyjnyja płomby — tolki častka ad taho, što dziaržava zarablaje na miažy.
Za vyjezd ź Biełarusi taksama treba płacić, ale nie pa 10 bazavych, jak u vypadkach z płombami, a tolki adnu (32 rubli, ci kala 12$).
Padatak za pierasiačeńnie miažy apłačvajuć tyja, chto jedzie na transparcie masaj da piaci ton. Kraina rehistracyi i hramadzianstva nie majuć značeńnia.
Padličyć, kolki dakładna ludziej spłačvaje pošlinu za vyjezd ź Biełarusi, składana — jaje musiać płacić jak lehkaviki, tak i častka aŭtobusaŭ i hruzavikoŭ, i nie pa ŭsich vidach transpartu jość statystyka. Prapusknaja zdolnaść punktaŭ propusku, jakija ciapier funkcyjanujuć na miažy ź ES, składaje 5010 lehkavych aŭto ŭ sutki. Faktyčnaja kolkaść mašyn moža być inšaj. Zhodna z adnoj ź lipieńskich spravazdač Dziaržpahrankamiteta, litoŭski bok prapuskaŭ aŭto na 50% ad damoŭlenaściej, a polski — na 40%.
Kali abapiracca na hetyja danyja, vynikaje, što za sutki miežy Biełarusi i ES pierasiakajuć nie mienš za 2000 lehkavikoŭ. U pieraliku na hetu kolkaść sabranaja pošlina ahułam składaje kala 24 tysiač dalaraŭ za sutki. A kali dadać da hetaha śpisu maršrutki i małatanažnyja hruzaviki, to hetaja ličba moža dasiahać i 30 tysiač za sutki.
Elektronnyja čerhi
Nastupnaja krynica dachodaŭ — broń čarhi. Servis pa braniravańni času dasiažny na siami punktach propusku z krainami ES, jon karystajecca popytam. Košt pasłuhi — 1 bazavaja vieličynia (32 rubli).
Kali brać dla raźliku tolki try najbolš zahružanyja pamiežnyja punkty propusku ź siami (Brest, Bierastavica, Kamienny Łoh), to na braniravańni miescaŭ štodnia dziaržava zarablaje nie mienš za 10 tysiač dalaraŭ.
Vynikaje, što navat pa ścipłych padlikach za sutki biudžet krainy atrymlivaje kala 40 tysiač dalaraŭ na miascovych sborach za piaresiačeńnie miažy i prodažy broni. Za miesiac suma pierasiahaje adznaku ŭ 1,2 miljona dalaraŭ.
Takim čynam, paśla adkryćcia miežaŭ dla ruchu pasažyrskaha transpartu Biełaruś štomiesiac atrymlivaje amal 6 miljonaŭ dalaraŭ (dakładniej — 5,88 miljona) tolki na tym, što abaviazvaje pieravozčykaŭ vykarystoŭvać navihacyjnyja płomby, spahaniaje zbor za vyjezd za miažu i pradaje broń u čarzie.
Paliva pa śpiecyjalnaj canie
Ale i heta nie ŭsio. Z 19 maja na AZS blizu punktaŭ propusku i łahistyčnych centraŭ padniali ceny na dyzielnaje paliva da 3,58 rubla za litr. Paralelna zabaranili kiroŭcam fur z zamiežnaj rehistracyjaj zapraŭlacca na inšych AZS, dzie litr DP kaštuje 2,46 rubla.
«Naša Niva» — bastyjon biełaruščyny
PADTRYMAĆČytajcie taksama:
Ad unitazaŭ da aŭtazapčastak. Jakija tavary zavoziacca ŭ Biełaruś pa šerych schiemach i kolki na hetym zarablajuć pasiaredniki
Hrodna staić na vušach paśla pryznańnia papularnaha haradskoha sajta «ekstremisckim». Ale na hetym nie skončyłasia11
Kamientary