Na pazačarhovych parłamienckich vybarach u Bałharyi lidziruje pravacentrysckaja kaalicyja HIERB-SDS z 26,5% hałasoŭ vybarščykaŭ, vynikaje sa źviestak CVK paśla apracoŭki amal usich biuleteniaŭ.
Śledam za HIERB-SDS («Hramadzianie za jeŭrapiejskaje raźvićcio Bałharyi» i «Sajuz demakratyčnych sił») raźmiaščajecca centryscki błok partyj PP-DB («Praciahvajem pieramieny» i «Demakratyčnaja Bałharyja»): u jaho 14,4% hałasoŭ. Treciaje miesca zajmaje pravapapulisckaja prarasijskaja partyja «Adradžeńnie» z 13,5% hałasoŭ. Usiaho ŭ Nacyjanalny schod Bałharyi na dadzieny momant prachodziać dzieviać partyj i abjadnańniaŭ, paviedamlaje Rasijskaja słužba Radyjo Svaboda.
Pazačarhovyja vybary ŭ parłamient praviali ŭ Bałharyi paśla taho, jak pa vynikach minułych vybaraŭ, jakija adbylisia ŭ červieni, trojčy nie ŭdałosia sfarmavać urad. Tady pieramožcam taksama byŭ HIERB-SDS.
Pieradvybarnyja apytańni pakazvali pieramohu pravacentrysckaj kaalicyi i ŭpeŭnienaje traplańnie ŭ parłamient siami partyj: vielmi pravyja tradycyjna ŭ apytańniach nabirali mienš, čym na samich vybarach.
Dla farmiravańnia ŭrada pieramožcu pryjdziecca damaŭlacca ź inšymi partyjami. «Pieramoha HIERB-SDS vidavočnaja. I my ŭziali na siabie abaviazacielstva sfarmavać urad»,-zajaviŭ lider HIERB Bojka Barysaŭ, jakoha płanujuć vyłučyć na pasadu premjer-ministra. Jon adznačyŭ, što bačyć patencyjalnymi partniorami ŭsich, akramia «Adradžeńnia» pa «čysta ideałahičnych» mierkavańniach.
Partyja «Praciahvajem pieramieny» raniej zajaŭlała, što nie pahodzicca z kandydaturaj Barysava na premjerskuju pasadu praz karupcyjnyja skandały ŭ minułym.
U Bałharyi nie ŭdajecca sfarmavać stabilny ŭrad z taho času, jak u 2021 hodzie ŭ vyniku bujnych antykarupcyjnych pratestaŭ spyniŭ isnavańnie kabiniet na čale z Bojka Barysavym. Ciapierašnija parłamienckija vybary stali siomymi za try hady.
Paśla červieńskich vybaraŭ palitykam trojčy nie ŭdavałasia sfarmavać kaalicyjny ŭrad. Jaŭka na tych vybarach stała tady rekordna nizkaj: udzielničali tolki 34% vybarščykaŭ. Na ciapierašnich vybarach jaŭka moža apynucca jašče nižejšaj.
Kamientary