Indyjskaje kino, rasijskija ahitki, ale jość i redkija załacinki. Jakaja situacyja ciapier u kinateatrach
Paśla pačatku vajny va Ukrainie halivudskija studyi-mejdžary syšli z rasijskaha i biełaruskaha rynku, što mocna ŭdaryła pa kinaprakacie. Razvažajem, da čaho heta ŭ pierśpiektyvie pryviadzie. I hladzim, što ciapier kruciać na vialikich ekranach.
«Naš rynak siońnia taksičny dla zamiežnych kinastudyj»
Biełaruski kinaprakat łahistyčna ciesna zaviazany na rasijski, i lubyja prablemy tam aŭtamatyčna adbivajucca na nas. Universal, Sony Pictures, Warner Bros., Walt Disney i Paramount admovilisia ad prakatu svaich filmaŭ u Rasii, tamu i my ŭžo nie ŭbačyli na vialikim ekranie novaha «Betmana», «Morbiusa», «Doktara Strendža» z suśvietu Sony/Marvel i stužki «Fantastyčnyja pačvary. Tajamnicy Dambłdara» z «potaryjany».
Adnak navat kali my b pačali raźvivać svoj kinarynak samastojna, jak zrabiła toje Ukraina paśla 2014 hoda, usio adno paźbiehnuć takoha losu było b niemahčyma, razvažaje kinaahladalnik Taras Tarnalicki.
«My taksama ŭ vajnie i na baku ahresara, tamu nas by tut ničoha nie ŭratavała. Siońnia naš rynak ličycca taksičnym dla zamiežnych kinastudyj», — tłumačyć jon.
«Kali ŭletku niekatoryja z kinateatraŭ nie začyniacca, budzie dobra»
U Biełarusi adsutničaje centralizavanaja sistema, jakaja b dazvalała abjektyŭna kazać pra pakazčyki zboraŭ u kinateatrach pa ŭsioj krainie — danyja vielmi chaatyčnyja. Ale rasijski dośvied, zhodna z danymi «Biuletenia kinaprakatčyka» ci zajavaj Asacyjacyi ŭładalnikaŭ kinateatraŭ, padkazvaje, što havorka moža iści pra stratu 70-80% prybytku — mienavita stolki zvyčajna prynosiła halivudskaje, bujnabiudžetnaje kino.
Paćviardžajuć na ananimnych umovach heta i ŭ adnoj ź biełaruskich kampanij, jakaja zajmajecca prakatam aŭtarskaha kino ŭ Biełarusi:
«My bačym, što naviedvalnaść kinateatraŭ skaraciłasia ŭ piać, a niedzie i bolš razoŭ», — udakładniajuć prakatčyki.
Nazvać aficyjnyja ličby źnižeńnia kolkaści naviednikaŭ z pačatkam vajny ŭ «Kinavideaprakacie» i Silver Screen «Našaj Nivie» admovilisia.
Taras Tarnalicki ličyć, što biełaruskija kinateatry moža čakać sumny los:
«Kali ŭletku niekatoryja ź ich nie začyniacca, to budzie dobra. Asabliva heta tyčycca pryvatnych ustanovaŭ, u jakich niama padtrymki z boku dziaržavy.
Dziaržaŭnyja ž, jak i ŭsia dziaržaŭnaja pramysłovaść, u nas datujucca ź biudžetu. Jany ŭ pieršuju čarhu vykonvajuć peŭnuju sacyjalnuju misiju: tam možna demanstravać filmy nie tolki zabaŭlalnaha charaktaru, ale i ahitacyjnyja, adukacyjnyja — toje, što zdymajuć na studyi «Biełaruśfilm», što spuskaje źvierchu Ministerstva kultury».
Kab zarablać dadatkovyja hrošy, u kinateatrach rajonnych i abłasnych haradoŭ ładziać viasielli, śviaty. Zrešty, takim ža šlacham zaraz bolš intensiŭna pajšli i pryvatniki. Tak, u Falcon Club nie tak daŭno prajšła cyrymonija premii «Televiaršynia», dzie ŭšanoŭvali hałoŭnych prapahandystaŭ krainy. A ŭ Silver Screen čytali lekcyi śpikiery kanfierencyi Digital Day Belarus 2022. U budučyni ž tam płanujuć demanstravać kibierspartyŭnyja tranślacyi na vialikim ekranie.
Časam u kino źjaŭlajecca pravieranaja artyleryja — kultavyja dla svajho času stužki: naprykład, «Brat» i «Brat-2» ci «Palot nad hniazdom ziaziuli».
«Nichto nie viedaje, jakim šlacham iści, kab vyžyć, usie sprabujuć jaho namacać. Toj ža Silver Screen vyrašyŭ zaraz pačać demanstravać indyjski kantent zamiest halivudskaha (u krasaviku sietka kinateatraŭ Silver Screen / Mooon stała dystrybutaram indyjskaha kino, z 12 maja ŭ VOKA CINEMA idzie indyjskaja stužka «Viazień». — «NN»)», — kamientuje kinažurnalist.
«Rasijskaja infaprastora budzie pašyracca»
Ale pakul u biełaruskich kinateatrach stała jašče bolš rasijskaha kino, jakoha i tak tam zaŭsiody było ź liškam.
Z top-3 stužak staličnaha «Kinavideaprakatu» — dźvie rasijskaj kinavytvorčaści: «Moj papa — pravadyr» ź Dźmitryjem Nahijevym u hałoŭnaj roli i «Artek. Vialikaja vandroŭka» ź Michaiłam Hałuścianam.
Na pieršym miescy — film polskaj vytvorčaści z pravakacyjnaj nazvaj «Eskortnicy».
Zamykajuć piaciorku lepšych mulciki «Kaaci. Lehienda džunhlaŭ» (Mieksika, ZŠA) i «Krutyja jajki-2» (Mieksika).
Adnu z apošnich amierykanskich stužak «Ančarted: Na mapach nie značycca» z Tomam Chołandam kruciać u nas ažno ź lutaha (prakat startavaŭ jašče da vajny). I jana dahetul stabilna ŭ topie, što, kaniečnie, taksama śviedčyć pra kryzis.
«Usio heta niebiaśpiečna: Biełaruś i tak znachodzicca ŭ rasijskaj infaprastory, ich infapoli, a ciapier jano pašyryć miežy. Tym bolš, kali ŭ Biełarusi pakazvajuć kino z Rasii, to ŭ asnoŭnym, ci zabaŭlalnaje, ci niejkaje ahitacyjnaje, jak «Svaja vajna» pra rasijskich vajskoŭcaŭ ci «Amanat» — histaryčnaja stužka, vielmi impierskaja pa sutnaści.
Čamuści sapraŭdy cikavy kantent, zrobleny ŭ Rasii, byŭ źniaty z prakatu (i ci vierniecca — niezrazumieła). Ja pra «Kapitan Vołkanohaŭ bieh» pra represii 30-ch hadoŭ ci «Nuuča» pra Jakuciju — antykałanijalnuju reč».
«Idzie razbureńnie kultury kinaprahladu»
Kab ubačyć suśvietnyja navinki, biełarusam u horšym vypadku zastajecca pampavać torenty i piracić ci płacić aficyjnym pravaŭładalnikam u anłajn-kinateatrach.
«Heta razburaje kulturu kinaprahladu, jakaja składvałasia dziesiacihodździami. Ludzi pryzvyčailisia chadzić razam na vialikija, vidoviščnyja stužki. Ich adsutnaść u kino nie daje ludziam dadatkova abjadnoŭvacca i stvaraje hlebu, patrebnuju aŭtarytarnym režymam, tamu što jany pracujuć jakraz na raźjadnańnie. Dla ich heta dobra, ale dla biznesu i narmalnaha isnavańnia hramadstva — kaniečnie, nie», — reziumuje Taras Tarnalicki.
Što hodnaha možna pahladzieć zaraz u kino?
Biełarusy nie ŭbačać u bližejšaj budučyni novy «Śviet Jurskaha pieryjadu», druhi «Top Han» z Tomam Kruzam, «Tor: Kachańnie i hrom» i inšyja filmy, ale varyjanty, kab pahladzieć kino na vialikim ekranie majucca.
U aktualnaj afišy kinaahladalnik raić źviarnuć uvahu na nastupnyja rečy:
- Mieładrama «Chirasima — maja luboŭ» — retra-film Alena Renie, kłasiku kino 60-ch.
- Kamiedyju-fentezi «Usio, paŭsiul i adrazu», zroblenuju niezaležnaj amierykanskaj studyjaj A24, pra multysuśviet hieraini Evelin.
- Kamiedyju «Sardečna zaprašajem u siamju». Stužka zdymałasia ŭ Minsku biełaruskim režysioram Uładzimiram Zinkievičam z udziełam biełaruskich akcioraŭ.
Čytajcie taksama:
Što pahladzieć. «Źmiej u Eseksie» — kachańnie, tajny i viktaryjanski nastroj ad Kłer Dejns
Vyniki pieršaj biełaruskaj kinapremii. Pahladzicie, na jakija nacyjanalnyja filmy źviarnuć uvahu
Łukašenka choča, kab kiraŭniki rajvykankamaŭ pryznačali i dyrektaraŭ pryvatnych struktur26
Kamientary