Biełaruskija transpartniki raźličvajuć uzbahacicca na fonie jeŭrapiejskich sankcyj suprać pieravozčykaŭ, i heta mahčyma. Tłumačym niuansy
Na dniach ES uvioŭ sankcyi suprać łahistyčnych kampanij ź biełaruskaj i rasijskaj prapiskaj — fury na biełaruskich (rasijskich) numarach bolš nie mohuć vazić hruzy z (u) ES. Pieršaja reakcyja — adčuvańnie katastrofy. Ale nie ŭsio tak prosta. U biełaruskich pieravozčykaŭ jość šaniec adkryć kłandajk.
U rasparadžeńnie «Našaj Nivy» trapiŭ list z prapanovami Biełaruskaj asacyjacyi ekśpiedytaraŭ i pieravozčykaŭ. Jon uklučaje punkty, jakija dazvalajuć zrazumieć, čaho ad uładaŭ chočuć pieravozčyki, jakija apynulisia ŭ ciažkaj situacyi.
«Kali analizavać hety dakumient, to možna zrabić vysnovu, što prapanujecca pasprabavać dobra zarabić na ŭsioj situacyi, — kaža «Našaj Nivie» adzin z udzielnikaŭ rynku. — Rynak pieravozak funkcyjanuje pa pryncypie parytetnych kvot, jakija adna kraina vydaje inšaj.
Naprykład, biełarusam vydavałasia 90 tysiač kvot na pieravozki ŭ Hiermaniju, adpaviedna, i biełarusy niemcam vydavali stolki ž. Jany stolki nie vykarystoŭvali, ale sprava nie ŭ hetym.
Na praktycy heta pryvodziła da taho, što mnohija ruskija z umoŭnaha Surhuta vieźli hruz u RB, tut pierahružalisia i vieźli dalej na biełaruskich numarach siłami našych pieravozčykaŭ, bo im brakavała ŭłasnych kvot.
Ciapier, u suviazi z sankcyjami na vyjezd, prapanujecca zvarotnaja schiema — dazvolić ujezd jeŭrapiejcam na terytoryju na 50 kiłamietraŭ uhłyb biez kvot. A taksama nie dałučacca da lusterkavych zabaronnych sankcyj, jakija, imavierna, uviadzie Rasija.
Na praktycy heta aznačaje, što isnuje raźlik na toje, što mašyny na jeŭrapiejskich numarach buduć zajazdžać u RB, tut pierahružacca i vieźci hruz dalej, naprykład u Kazachstan, a razhružacca pa fakcie ŭ Rasii. Anałahična ŭ zvarotny bok — mašyny na jeŭrapiejskich numarach buduć zabirać hruzy sa składaŭ u Biełarusi i vieźci ich u ES».
U liście akcentujecca, što ŭviadzieńnie Biełaruśsiu kontrsankcyj zrobić takuju schiemu raboty niemahčymaj. Ale jana vielmi vyhadnaja.
«Prablema ŭ tym, što składaŭ u hłybiniu 50 kiłamietraŭ vielmi mała — tyja, što jość, zmohuć absłuhoŭvać maksimum 500 fur u sutki. Imavierna, «hłybinia» budzie pavialičana, — kaža naš surazmoŭca. — Niekali ŭ Biełarusi dziejničali taksama lhotnyja ŭmovy pa razmytnieńni tavaraŭ dla «svaich». Pad ciskam Rasii letam ich admianili, ale, nie vyklučaju, što niejki novy «ukaz №358» moža źjavicca znoŭ. Zrešty, mytnić tavary ŭ Biełarusi i nie vielmi abaviazkova — možna prosta pierakładvać ich z fury ŭ furu».
Razam z hetym užo stali viadomyja asobnyja punkty čarnavoha płana «kompleksnaj padtrymki ekanomiki» ad Saŭmina.
Vialikaja častka prapanovaŭ datyčnaja rynku pieravozak i maje na mecie toje ž, što i prapanovy BAME: admiena dazvołaŭ, admova ad transpartnaha kantrolu i hetak dalej.
Ahułam udzielniki rynku kanstatujuć trend na «pieraprodaž» biełaruskich fur jurydyčnym asobam u Kazachstanie.
Pakupniki tavaraŭ ź Jeŭropy ŭ svaju čarhu adznačajuć, što mahčymaść pastavak ź ES pa-raniejšamu isnuje, prosta stała kaštavać bolš hrošaj, bo jeŭrapiejskija pieravozčyki pracujuć pa inšych taryfach.
Fury biełaruskich pieravozčykaŭ, jakija pracavali ŭ bok Jeŭropy, častkova stajać biez spravy.
«U nas z 50 mašyn 30 na stajancy, pry hetym ŭsie ŭ lizinhu, situacyja ciažkaja», — kažuć udzielniki rynku i ličać, što schiema ź pieravalvańniem hruzaŭ ź Jeŭropy na terytoryi Biełarusi mahła b stać dla ich niejkim vyjściem.
«Uvieś biznes prosta stanie». Što aznačajuć novyja sankcyi dla biełaruskich pieravozčykaŭ
Ci stała praściej zapisacca na polskuju vizu paśla ŭviadzieńnia fotavieryfikacyi? Dośvied čytačoŭ5
Kamientary