Navošta Pucinu chirurh-ankołah? Vyjšła rasśledavańnie pra zdaroŭje prezidenta Rasii
Kreml ź pieršaha pucinskaha terminu pačaŭ chavać infarmacyju pra zdaroŭje tady jašče maładoha prezidenta — navat kali toj zvaliŭsia z kania, paškodziŭšy śpinu. Ciapier situacyja jašče bolš tumannaja. Vydańnie «Prajekt» vypuściła rasśledavańnie pra zdaroŭje prezidenta krainy ź jadziernaj zbrojaj.
7 kastryčnika hetaha hoda prezident Pucin pavinien adśviatkavać 70-hodździe. Iosif Stalin da hetaha ŭzrostu ŭžo pieražyŭ dva insulty, Leanid Brežnieŭ nastolki straciŭ pracazdolnaść, što realnaja ŭłada pierajšła da jaho atačeńnia, Juryj Andropaŭ da hetaj daty naohuł nie dažyŭ, a Barys Jelcyn da 70 syšoŭ u adstaŭku hłyboka niezdarovym čałaviekam. Zdaroŭje Pucina ža, pa słovach jaho pres-sakratara Dźmitryja Piaskova, «vydatnaje».
Miarkujučy pa televizijnaj karcincy, prezidenta Rasii i praŭda nie paraŭnać z papiarednikami ‒ jon zajmajecca sportam, hulaje pa tajzie i chvareje maksimum na prastudu. Kali vieryć hetym telesiužetam, Pucinu nie budzie składana kiravać Rasiejaj da 2036 hoda, jak heta dazvalaje papraŭlenaja im Kanstytucyja. Ale ci tak heta?
«Prajekt» prychodzić da vysnovy, što nie.
Pucin, pavodle vydańnia, zakłapočany prablemaj stareńnia i navat nie curajecca nietradycyjnaj miedycyny. Naprykład, jon prymaje vanny z kryvioj ad abrezanych ŭ varvarskaj pracedury rahoŭ ałtajskich marałaŭ. Efiekt ad hetaj vanny navukova nie dakazany, jana maje śpiecyfičny vyhlad i pach. Zoaabaroncy paraŭnoŭvajuć adčuvańni žyvioł z katavańniem — vyryvańniem paznohciaŭ ŭ čałavieka. Ale Pucinu padabajecca.
Akramia nietradycyjnaj, Pucin karystajecca ŭsim naboram miedycyny navukovaj.
Kožnuju pajezdku jaho supravadžaje ceły puł lekaraŭ. Raniej Pucin sam naviedvaŭ miedycynskuju ŭstanovu. Ciapier ža lekary prylatajuć da jaho.
Da 2019 hoda Pucina pastajanna supravadžaje ŭ siarednim užo dzieviać lekaraŭ.
13 lutaha 2019 hoda rasijski lidar prymaje ŭ Sočy Alaksandra Łukašenku. Dla demanstracyi ŭłasnaha zdaroŭja dva niaźmiennyja kiraŭniki adpravilisia katacca na hornych łyžach na hazpramaŭskim kurorcie «Łaura». U tyja ž dni ŭ haścinicy pobač, vyśvietliŭ «Prajekt», pražyvajuć dva prezidenckija reanimatołahi, nieŭrołah, dermatavienierołah, dva łory i chirurh.
Analizujučy skład štatu daktaroŭ, «Prajekt» prychodzić da vysnovy ab prablemach u Pucina sa ščytapadobnaj załozaj.
Jaho zaŭsiody supravadžajuć łory. Łor, siarod inšaha, moža pieršym vyjavić prablemy sa ščytapadobnaj załozaj, u tym liku ankałahičnyja. Tady padklučajucca chirurh i ankołah.
Adzin z samych važnych dla Pucina śpiecyjalistaŭ, Sielivanaŭ, — chirurh, jaki jak minimum da niadaŭniaha času śpiecyjalizavaŭsia na ankałohii. Tema jaho dysiertacyi ‒ «asablivaści dyjahnostyki i chirurhičnaha lačeńnia chvorych na rak ščytapadobnaj załozy pažyłoha i starečaha ŭzrostu».
«Cikavaść da prablemy raku ščytapadobnaj załozy ŭ chvorych pažyłoha i starečaha ŭzrostu vyklikanaja ciažkaściu rańniaj dyjahnostyki», — havorycca ŭ aŭtarefieracie jaho pracy.
Jašče adzin lekar — łor Ščahłoŭ — taksama chirurh. Hety čałaviek nastolki nieadstupna chodzić za Pucinym, što padčas publičnych mierapryjemstvaŭ traplaje na sumiesnyja fatahrafii z kiraŭnikom dziaržavy.
Śviedčańniem važnaści Ščahłova možna ličyć i toj fakt, što ŭ minułym hodzie jaho baćku, Mikałaja Ščahłova, taksama chirurha, zrabili deputatam Dziarždumy ad «Adzinaj Rasii».
U miedycynskich kołach sapraŭdy havorać ab prablemach u Pucina sa zdaroŭjem, piša «Prajekt».
Uvieś vierasień 2021 hoda Pucin nie źjaŭlaŭsia na publicy. Ci rabili jamu tady niejkuju miedycynskuju manipulacyju — nieviadoma, ale paśla hetaha jon staŭ razmaŭlać ź ludźmi na vielmi vialikaj adlehłaści — pa roznyja baki vielizarnych stałoŭ.
«Heta ŭsio zusim niapravilnaja infarmacyja. Tut usio nie adpaviadaje rečaisnaści», — daŭ kamientaryj «Prajektu» pres-sakratar Dźmitryj Piaskoŭ.
Adnak sapraŭdnaje staŭleńnie Pucina da zdaroŭja zaŭvažnaje navat dla addanaha jamu elektaratu. Epidemiju kavidu Pucin pravioŭ tak, jak nie pravodziŭ, napeŭna, ni adzin kiraŭnik dziaržavy ŭ śviecie — bolšaść sustreč prezident Rasii vioŭ pa videasuviazi, a niešmatlikich naviedvalnikaŭ dapuskaŭ da siabie tolki paśla dvuchtydniovaha karancinu i zdačy kału.
«Prajekt» pryvodzić cikavy prykład. Vialikuju pres-kanfierencyju Pucina ŭ 2020 hodzie vyrašyli pravieści ŭ niezvyčajnym farmacie. Pucin, Piaskoŭ i vybranyja žurnalisty pavinny byli siadzieć u adnym nievialikim pamiaškańni, a astatniaja ludskaja masa — u vialikaj zale, adkul reparciory i zadavali pytańni pry dapamozie videatranślacyi.
Usich, chto pavinien byŭ siadzieć u adnym pamiaškańni z Pucinym, uklučajučy prezidenckaha pres-sakratara, adpravili na dvuchtydniovy karancin, a paśla jaho zakančeńnia jašče prymusili zdać test na SOVID.
Test Piaskova (paśla izalacyi) pakazaŭ stanoŭčy vynik, i da prezidenta jaho nie dapuścili. Ale biez prablem pasadzili ŭ ahulnuju zału, dzie tady było bolš za 700 čałaviek.
Kamientary