«Bolš nam takich siabroŭ — i vorahaŭ užo nie treba». Što pra intervju Łukašenki Sałaŭjovu piša rasijskaja presa?
Niekalki dzion tamu vyjšła intervju Łukašenki maścitamu rasijskamu prapahandystu Uładzimiru Sałaŭjovu. Rasijskija ŚMI adreahavali na takuju miedyjnuju aktyŭnaść Łukašenki — sabrali dla vas samyja cikavyja publikacyi rasijskaj presy na hetuju temu.
«Pryznańnie Kryma — adzin z apošnich kozyraŭ Alaksandra Łukašenki»
Ahladalnik vydańnia «Kommiersant» Dźmitryj Dryzie piša, što Minsku vielmi patrebnyja hrošy. U hetym i pryčyna apošnich zajaŭ Łukašenki pra pryznańnie Kryma, Paŭdniovaj Asiecii i Abchazii.
Akramia taho, źjaviłasia infarmacyja, što Biełaruś moža adpravić u Siryju dźvieście svaich vajskoŭcaŭ.
«Z čym źviazanaja ŭsia hetaja aktyŭnaść, zrazumieła: 27 lutaha ŭ Biełarusi refierendum pa novaj Kanstytucyi, i paśla hetaj važnaj padziei krainie treba z čymści iści ŭ novaje śvietłaje zaŭtra.
A iści niama z čym, tamu što respublika pad sankcyjami, i, bolš za toje, joj pierakryli hałoŭnuju krynicu valutnych pastupleńniaŭ — tranzit kalijnych uhnajeńniaŭ. I kali ničoha nie raspačać, to pierśpiektyvy biazradasnyja.
Źviartacca niama da kaho. Adzinaje, što prahučała z Zachadu ŭ dačynieńni da Minska, — heta papiaredžańnie prycišyć vajskovuju aktyŭnaść, inakš novaja porcyja abmiežavańniaŭ budzie ŭ chutkim časie. I što rabić Łukašenku, akramia jak iści da starejšaha brata? Ale apošni, jak my bačym, nie moža dać usiaho, što patrabujecca. A treba šmat», — piša rasijski žurnalist.
Dryzie piša, što atrymać ad takoha Łukašenka zmoža nie šmat, tamu jon puściŭ u chod svoj apošni kozyr — pryznańnie Kryma.
«Pakul my bačym, što załaty doždž na Łukašenku nie pralivajecca. Pryčym zdajecca, što ŭ Maskvie nie buduć piarečyć, kali jon u vyniku niejak źmienić svajo ampłua. Imavierna, jašče i tamu bujnych sum nie praduhledžana. Heta nie dziŭna: vuń jakaja ciapier abstanoŭka, samim spatrebicca. Dy i prajekt, skažam ščyra, vielmi prablematyčny. Jak by tam ni było, ad Alaksandra Łukašenki varta čakać novych aktyŭnaściaŭ», — piša ahladalnik.
«Łukašenku nie zastałosia vybaru»
«Moskovskaja hazieta» źviartaje ŭvahu na toje, što Łukašenka niečakana padklučyŭsia da temy eskałacyi vakoł Ukrainy. U intervju Sałaŭjovu jon zajaviŭ, što ŭ vypadku abvastreńnia vajny na Danbasie biełaruskaje vojska budzie dziejničać razam z rasijskim.
Taksama Łukašenka dadaŭ, što ŭ vypadku pierasiačeńnia Ukrainaj niejkich «čyrvonych linij» jon dapuskaje naniasieńnie pa joj rakietnaha ŭdaru i zadziejničańnie lubych inšych srodkaŭ, jakija jość u najaŭnaści ŭ Rasii i Biełarusi. A taksama pryhraziŭ spynić pastaŭki elektryčnaści va Ukrainu
«Navošta dla supraćstajańnia, pakul tolki infarmacyjnaha, spatrebiłasia pryciahvać Alaksandra Łukašenku? Mety, jakija ŭ hetaj «vajnie niervaŭ» stavić Maskva, nieadnarazova ahučvalisia, — piša žurnalist haziety. — Heta, pa-pieršaje, admova kali-niebudź prymać Ukrainu ŭ NATA i adviadzieńnie sił aljansu na pazicyi 1997 hoda, a pa-druhoje — vykanańnie Kijevam minskich pahadnieńniaŭ, padpisanych va ŭžo dalokim 2015-m, kali sieparatysty na Danbasie poŭnym chodam viali nastupalnyja bai.
Na rašeńni NATA zajavy ź Minsku, naturalna, nie paŭpłyvajuć. U Biełarusi nie toj hieapalityčny maštab, kab stać važkim arhumientam dla NATA ŭ pytańniach pašyreńnia abo miesca dysłakacyi vojskaŭ arhanizacyi. A voś na dziejańni ŭkrainskich uładaŭ biełaruski faktar moh by akazać uździejańnie. Na heta, mahčyma, spadziajucca ŭ Maskvie».
U Łukašenki vybaru ŭžo nie zastałosia, ličyć «Moskovskaja hazieta».
«Paśla razryvu usialakich adnosinaŭ ź Jeŭrasajuzam i ZŠA jamu davodzicca iści na mnohaje dziela padtrymańnia siabroŭstva z Maskvoj. Pryjšłosia ŭciahnucca i ŭ hetuju hulniu, jakaja asabista jamu naŭrad ci abiacaje niejkuju vyhadu», — adznačaje vydańnie.
«Pabolš nam takich siabroŭ — i vorahaŭ užo nie treba»
A voś jak pra sustreču Sałaŭjova i Łukašenki piša «Moskovskij komsomolec»:
«Ciapier Łukašenka naš najlepšy siabar. Tak, pabolš nam takich siabroŭ — i vorahaŭ nie treba. Tolki voś bolš siabroŭ u nas niama.
Hety chvost daŭno ŭžo navučyŭsia vilać sabakam, jak nichto inšy. Z takoj sialanskaj chitrynkaj jon zaŭsiody źvierchu. Sam siabie abraŭ prezidentam, tolki jaho i bačyli. Apošni dyktatar Jeŭropy — hanarovaje zvańnie. I nie siabar, i nie vorah, a jak? Razam z Kadyravym jon naš piachotnik, naša chutkaja budučynia», — piša žurnalist.
Jon adznačaje, što Sałaŭjoŭ nie spytaŭ u Łukašenki ni pra palityčnyja zabojstvy, ni pra ŭzurpacyju ŭłady.
«Ale heta ładna, čort by ź im. A pra 458 hramadzian Rasii, kinutych Łukašenkam u turmy, možna było spytać?» — aburajecca žurnalist.
«Ukraina nie patrebnaja nikomu, akramia Rasii»
Prapahandysckaje vydańnie Life.ru začapiłasia za słovy Łukašenki pra toje, što ŭ skład Sajuznaj dziaržavy moža ŭvajści i Ukraina, hadoŭ praz 15. Rasijskaje ŚMI adnaznačna padtrymlivaje takija mroi biełaruskaha palityka.
«Ciapier heta zdajecca varjactvam, ale kali razabracca, to atrymlivajecca, što Ukraina nie patrebnaja nikomu, akramia Rasii, — piša vydańnie. — Treba być realistami i razumieć, što ni NATA, ni ES nie čakajuć Ukrainu. Jana patrebnaja im tolki jak instrumient cisku na Rasiju. Rana ci pozna narod Ukrainy pavinien ŭśviadomić, što dla jaje roskvitu nieabchodny sajuz z Rasijaj. Jaskravym prykładam tut źjaŭlajecca haz. Niemahčyma dla rostu dabrabytu nasielnictva i raźvićcia pramysłovaści, a dakładniej jaje reštkaŭ, kuplać rasijski haz nie naŭprost, a ŭ pasiarednikaŭ u Jeŭropie»,
Prapanavać rasijskim spažyŭcam Ukraina ciapier amal ničoha nie moža, ličyć vydańnie.
«Adnak u vypadku adnaŭleńnia narmalnych adnosin razburanyja ekanamičnyja suviazi mohuć być adnoŭlenyja, — adznačaje Life.ru. — Mahutnaści i patencyjał zachavanych pradpryjemstvaŭ paŭdniovaha ŭschodu pojdzie na karyść usim. Rasija moža nabyvać rakietnyja ruchaviki va Ukrainy. Tak užo było da 2014 hoda.
Prosty ž čałaviek atrymaje mahčymaść kuplać pradukty charčavańnia i paŭsiadzionnyja tavary. Status Ukrainy jak usiesajuznaj žytnicy nichto nie admianiaŭ, i im treba pravilna karystacca. Kali pahladzieć na vulicy rasijskich haradoŭ, usiudy možna ŭbačyć kramy ź biełaruskimi tavarami. Pa słovach Łukašenki, praz 15 hadoŭ rasijskija palicy mohuć zapoŭnić ukrainskija tavary».
«Słovy Łukašenki pra Boha-biełarusa — pahanskija idei»
Taksama ŭ rasijskich ŚMI adreahavali na słovy Łukašenki pra toje, što Boh źjaŭlajecca biełarusam.
Śćviardžeńni ab nacyjanalnaści Boha źviazanyja z pahanstvam. Pra heta ŭ intervju Lenta.ru raskazaŭ śviatar RPC i psichołah Andrej Łorhus.
«Bolšaść chryścijan i Rasii, i Biełarusi, i Ukrainy nie staviać pytańnie ab nacyjanalnaj prynaležnaści Boha, nie pryniata pra heta razvažać. U Boha nie moža być nijakaj nacyjanalnaści, nie moža być navat tak pastaŭlenaje pytańnie. Kali kazać pra asobu syna Božaha Isusa Chrysta, viadoma, jon byŭ ź jaŭrejskaha naroda, u hetym nichto nie sumniavajecca», — skazaŭ śviatar.
A voś śviatar Ivanava-Uźniasienskaj jeparchii RPC ijeramanach Makaryj skazaŭ Life.ru:
«Takija vyrazy treba ŭsprymać u kantekście. Heta było vystupleńnie našaha šanoŭnaha biełaruskaha lidara, jakomu vostraje słoŭca ŭłaścivaje. I takoha kštałtu vyrazy mianie jak śviatara nijak nie pałochajuć», — adznačyŭ surazmoŭca rasijskaha vydańnia.
Ijeramanach Makaryj padkreśliŭ, što Boh adzin, ale kožnaj nacyi jon blizki, jon «zbaŭca ŭsich ludziej — i nacyjanalnyja miežy nie pavinny być hetaj pieraškodaj».
Čytajcie taksama:
Alaksandr Łukašenka paabiacaŭ try-čatyry dni vajny ŭ vypadku sutyknieńnia z Ukrainaj
Łukašenka skazaŭ Sałaŭjovu, što Pucin abiacaŭ jamu zvańnie pałkoŭnika, ale nie prysvoiŭ
Byłaja deputatka Maryja Vasilevič sabrałasia zamuž FOTA3
Kamientary