Praz hod paśla zatrymańnia ŭ Minsku pačynajuć sudzić anarchistaŭ, jakich KDB unios u śpis terarystaŭ. Praces zakryli
15 listapada ŭ Minskim abłasnym sudzie pačynajecca praces pa spravie anarchistaŭ Ihara Alinieviča, Dźmitryja Duboŭskaha, Siarhieja Ramanava i Dźmitryja Razanoviča. Ich abvinavačvajuć u sieryja padpałaŭ — pa viersii śledstva, jany ździejśnili napady na aŭtastajanku prakuratury, budynki DAI i dziaržkamiteta ekśpiertyz. Spravu vioŭ KDB, jaki jašče da suda ŭnios proźviščy abvinačanych u śpis terarystaŭ. Spravu viadzie sudździa Viačasłaŭ Tulejka, viadomy i pa palityčnych pracesach, i pa spravach, dzie vynosiŭ śmiarotny prysud. Praces prachodzić u zakrytym režymie. U sudovuju zału puścili tolki blizkich rodnych — kala 15 čałaviek. Astatnich žadajučych patrapić na praces — nie puścili, niama miescaŭ, paviedamlajuć pravaabaroncy.
Samy viadomy fihurant spravy — anarchist Ihar Alinievič, jaki ŭžo byŭ za kratami. 11 hod tamu jaho zatrymali pa spravie ab napadzie na ambasadu Rasii ŭ Minsku, na terytoryju dypmisii kinuli niekalki kaktejlaŭ Mołatava, zhareła mašyna. Da taho ž, Alinieviča sudzili za akcyi z dymavoj šaškaj kala Hienštaba i ŭ niekalki ideałahična matyvavanyja padpały.
Jon atrymaŭ vosiem hadoŭ źniavoleńnia, pa hetaj ža spravie prachodziŭ Mikałaj Dziadok, jaki ŭ 2020 taksama staŭ palitviaźniem, niadaŭna jamu dali 5 hod kałonii.
Anarchisty minuły raz nie adbyli svoj termin da kanca — u 2015-m ich pamiłavali. Alinievič paśla vyzvaleńnia žyŭ za miažoj, ale letaś viarnuŭsia ŭ Biełaruś. Pa jaho ž słovach, choć i razumieŭ niebiaśpieku, ale nie moh zastavacca zboku ad palityčnych padziejaŭ u krainie.
U kastryčniku 2020-ha Alinieviča, jaho pryjaciela Dźmitryja Duboŭskaha i jašče dvuch anarchistaŭ — Siarhieja Ramanava i Dźmitryja Razanoviča — zatrymali niepadalok ad biełaruska-ŭkrainskaj miažy. Im pradjavili abvinavačańnie ŭ teraryźmie (č. 2 art. 289 KK), niezakonnym abarocie zbroi (č. 2, 3, 4 art. 295 KK) i niezakonnym pieramiaščeńni praź miažu zbroi (č. 1 art. 333-1 KK). Maksimalny termin pa hetych artykułach — da 20 hod źniavoleńnia.
Pa viersii śledstva, jakoje viało KDB, fihuranty nabyli za miažoj zbroju i patrony, a Razanovič — hranatu, i chacieli destabilizavać situacyju ŭ Biełarusi. U abvinavačvańni fihuruje padpał čatyroch aŭto na stajacy prakuratury Salihorska i pamiaškańnie miascovaha adździeła sudmiedekśpiertyz, padpał budynku DAI ŭ Mazyry.
Bolš za hod fihuranty spravy znachodzilisia pad vartaj. Pakolki KDB jašče da suda ŭnios ich proźviščy ŭ śpis terarystaŭ, jany byli abmiežavanyja ŭ pierapiscy z trecimi asobami, pa sutnaści, listy dachodzili tolki ad blizkich.
SK nazvaŭ imiony tych, chto skinuŭ vybuchoŭku na bazu AMAPa ŭ Minsku ŭ 2021 hodzie5
Kamientary