Ciažka admaŭlać papularnaść takoha praduktu, jak syr. Adnak nie kožny syr niasie karyść vašamu arhanizmu.
Viadoma, što ŭ syrach chapaje važnych rečyvaŭ nakštałt białku, kalcyju, vitaminaŭ i klučavych aminakisłot. Pryčym białok z syru moža stać dobraj alternatyvaj miasnomu białku, bo jon taksama maje žyviolnaje pachodžańnie. Ale pry hetym syr — duža kałaryjnaja ježa, što moža źmiaščać šmat tłušču i soli, piša CNN.
Jaki ž syr vybrać?
Adkaz zaležyć ad taho, što kankretna treba vašamu arhanizmu, ale voś niekalki padkazak.
Dyjetołahi, jakich apytali amierykanskija žurnalisty, zhadžajucca, što rykota — lidar siarod karysnych dla zdaroŭja syroŭ. Jana źmiaščaje šmat białku z małočnaj syrovatki, jaki lohka zasvojvajecca arhanizmam. Akramia hetaha, rykota źmiaščaje šmat karysnych aminakisłot. To-bok taki syr padydzie i tym, chto choča naraścić muskuły i pavialičyć svaju siłu, i tym, chto choča pazbavicca ad lišniaha tłušču i vahi.
Ćviordyja syry, takija jak parmiezan, piekaryna ci haŭda, taksama mohuć stać dobrym vybaram, kali nie ŭžyvać ich zašmat. Jany źmiaščajuć mienš vady i bolš kalcyju, majuć bolš ščylnuju strukturu, tamu i źjaŭlajucca davoli sytnymi.
Adnak pa pryčynie takoj struktury ćviordyja syry taksama mohuć źmiaščać bolš soli, čym miakkija. Tamu ludziam, jakija pakutujuć na hipiertaniju abo vymušanyja pa inšych pryčynach kantralavać užyvańnie soli, lepiej vybrać bolš miakkija syry.
Tym ža, chto choča pazbavicca ad lišniaj vahi, treba šukać syry, dzie mała tłušču i šmat białku. Pradukty z vysokaj dolaj białku dazvalajuć bolš doŭha zastavacca sytym i pry hetym spryjajuć rostu muskułaŭ. Dla hetaj mety padychodzić, naprykład, rykota, a taksama šviejcarskija syry (naprykład, emiental, hrujer, tylzitar) i syr čedar — adnak u ich vypadku lepiej addać pieravahu varyjantam z panižanaj kolkaściu tłušču.
Niekatoryja syry mohuć stać dobraj krynicaj karysnych bakteryj-prabijotykaŭ. Siarod ich syr fieta, syr z kazinaha małaka i syr, vyrableny z syroha ci niepasteryzavanaha małaka.
Jakoha syra lepiej paźbiahać
Dyjetołahi rajać nie ŭžyvać syry, što vyrablalisia zanadta składanym čynam, u tym liku narezanyja na kavałki jašče na fabrycy ci tyja, što navat nie treba zachoŭvać u chaładzilniku. Syry ŭ bankach, płaŭleny syr i navat śmietankovy syr źmiaščajuć minimum białku, ale pry hetym vielmi šmat tłušču i soli.
Lepiej razhladać syr jak harnir ci elemient pryjomu ježy, a nie jak jaho hałoŭnuju častku. Kab atrymać dobruju i karysnuju stravu, varta dadać da syru niešta jašče — sadavinu ci celnaziernievy pradukt. Naprykład, na śniadanak možna źjeści rykotu, aŭsianku i frukty, a paśla abiedu — paru kavałkaŭ šviejcarskaha syru, sadavinu ci celnaziernievaje piačeńnie.
Kamientary