Bellingcat: Piśmieńnika Dźmitryja Bykava ŭ 2019 hodzie atrucili. Tyja ž ludzi, što paźniej Navalnaha

U krasaviku 2019 hoda Dźmitryju Bykavu cudam udałosia vyžyć paśla atručvańnia padčas pajezdki pa rehijonach Rasii.

Jak i ŭ vypadku z Navalnym i Kara-Murzoj, siarod hrupy zabojcaŭ byli chimiki z NDI-2 i supracoŭniki z Druhoj słužby FSB, śćviardžajecca ŭ rasśledavańni hrupy Bellingcat.

Za Bykavym pačali sačyć za hod da atručvańnia. Pieršy dakumientalny dokaz hetamu datujecca 20 maja 2018 hoda, kali ŭranku Bykaŭ vylecieŭ z Maskvy ŭ Ufu, dzie jon musiŭ čytać lekcyju dzieciam i ich baćkam. Razam ź piśmieńnikam adnym rejsam vylecieli Uładzimir Paniajeŭ i Valer Sucharaŭ — rasśledavacieli vyjavili ich suviaź z Druhoj słužbaj FSB.

U hetym ža miesiacy žonka Dźmitryja Bykava Kaciaryna Kievchišvili ŭpieršyniu zaŭvažyła ŭ domie nasuprać čałavieka ź binoklem. Spačatku jany nie nadavali hetamu značeńnia, ale letam pačali zaŭvažać, što čałaviek hladzić niepasredna ŭ ich bok.

Nastupnaja pajezdka Bykava była 17 listapada 2018 hoda, i ŭsio tyja ž Paniajeŭ i Sucharaŭ lacieli ź piśmieńnikam u Rastoŭ.

U krasaviku 2019 hoda Bykaŭ znoŭ pajechaŭ u Rastoŭ, kab pračytać paru lekcyj. Za dzień da hetaj pajezdki ŭ Kaciaryny Kievchišvili ŭnočy pačali ŭzłomvać usie miesiendžary. 5 krasavika Paniajeŭ i Sucharaŭ taksama nabyli kvitki ŭ Rastoŭ, kudy płanavaŭ lacieć Bykaŭ.

Dalej Bykaŭ źbiraŭsia jechać na praviadzieńnie ahulnaj dyktoŭki ŭ Navasibirsk, kudy časta zaprašajuć viadomych ludziej začytvać teksty. Bykavu było niazručna lacieć u Navasibirsk 13 krasavika, ale arhanizatary byli nastojlivymi i navat prapanoŭvali apłacić kvitki ŭ biznes-kłasie, zhadvaje žonka piśmieńnika.

Mienavita arhanizatary vybrali dla Bykava hatel Domina. Tudy ž płanavaŭ zasialicca Navalny ŭ žniŭni 2020 hoda.

Kali 13 krasavika ŭranku Dźmitryj Bykaŭ i Kaciaryna Kievchišvili zasialilisia ŭ hatel, chimik Ivan Vosipaŭ i Paniajeŭ užo byli ŭ horadzie. Jany jašče z sakavika viedali, što Bykaŭ płanuje pajezdku ŭ Navasibirsk i budzie žyć ŭ hateli Domina. Pakul Dźmitryj i Kaciaryna byli na dyktoŭcy, numar byŭ pustym, pra što zahadzia viedali supracoŭniki FSB.

Karespandent The Insider naviedaŭ hatel i pierakanaŭsia, što na ŭsich pavierchach stajać kamiery videanazirańnia i jość achoŭniki. Składana ŭjavić, što ŭ numar mahli trapić biez supracoŭnictva ź piersanałam hatela, adnak kiraŭnictva Domina admoviłasia ad kamientaroŭ dla The Insider.

Na nastupny dzień Dźmitryj Bykaŭ adčuvaŭ siabie dobra. Vidać, jon nadziavaŭ nie toje adzieńnie, na jakim była atruta. 16 krasavika ŭ aeraporcie piśmieńniku stała drenna. U samalocie jaho pačała vanitavać, piśmieńnik ledź nie hublaŭ prytomnaść. Paśla pasadki samalota va Ufie Bykaŭ nie moh iści, u jaho parušyłasia maŭleńnie. Piśmieńnik śćviardžaje, što jaho simptomy byli padobnyja da simptomaŭ Navalnaha paśla atručvańnia.

Adnak supadali nie tolki simptomy, ale i pavodziny ŭłady, jakaja imknułasia nie dapuścić pieravozki Bykava ŭ Maskvu. Dźmitryj Murataŭ, hałoŭny redaktar «Novaj haziety», paviedamiŭ, što hazieta apłaciła Bykavu samalot z dvuma reanimatołahami na borcie, jaki musiŭ pieravieźci piśmieńnika ŭ Maskvu. Samalot vylecieŭ z Krasnajarska, i kali da Ufy zastavałasia lacieć hadzinu, ź Ministerstva achovy zdaroŭja pastupiła kamanda raźviarnuć samalot u Maskvu. Adnak Muratavu ŭdałosia damovicca, kab samalot usio ž taki dalacieŭ da Ufy.

Daktary nie pryjšli da adnaznačnaha dyjahnazu Dźmitryja Bykava. Ale ŭ piśmieńnika było šmat adnolkavych simptomaŭ z Navalnym, a taksama padobnyja łabaratornyja źmieny pa hlikiemičnym profili. Daktary tak i nie vyznačyli pryčynu jaho komy i lačyli Bykava simptamatyčna.

Kali Dźmitryj pryjšoŭ u prytomnaść, to na śpinie zaŭvažyŭ plamu malinavaha koleru. Śpiecyjalisty, da jakich źviartaŭsia The Insider, śćviardžajuć, što «Navičok» u tych rastvorach, u jakich jaho zvyčajna vykarystoŭvajuć, nie pavinien vyklikać razdražnieńnia skury. Ale, kali ŭ rastvor dadali skurna-naryŭny ahient, to heta mahło stać pryčynaj plamy.

Z ulikam simptomaŭ i taho, kolki času prajšło pamiž kantaktam z atrutaj, prajaŭleńniem simptomaŭ i vyzdaraŭleńniem, naprošvajecca vysnova, što Dźmitryja Bykava sprabavali atrucić fosfaraarhaničnymi rečyvami niervova-paralityčnaha dziejańnia (da jakich adnosicca i «Navičok»).

Bellingcat śćviardžaje, što vypadak z paetam i litaraturaznaŭcam Bykavam — čarhovy dokaz taho, što ŭłady Rasii vykarystoŭvajuć chimičnyja rečyvy dla baraćby z palityčnymi apanientami.

• 0
• 0
• 0
• 0
• 0
• 0
• 0
• 0