Chto staić za stvareńniem prarasijskaj partyi «Sajuz»? Raźbirajem pa piersanalijach

18 kastryčnika ŭ Minsku adbyłosia pasiadžeńnie arhkamiteta palityčnaj partyi «Sajuz», jakaja vystupaje za bolš ščylnuju biełaruska-rasijskuju intehracyju. Ciapier «Sajuz» aktyŭna pijarać na dziaržaŭnym telebačańni, tamu niama sumnievu, što arhanizacyju zarehistrujuć.

Pavialičyć

Pra staršyniu arhkamiteta Siarhieja Łušča «NN» nieadnarazova pisała, a ŭ hetaj publikacyi my hlaniem na siabraŭ prezidyuma «Sajuza». Što heta sa ludzi i jakim čynam jany trapili ŭ kamandu Łušča.

Čytajcie taksama. Hałoŭny prarasijski palityk Biełarusi Siarhiej Łušč: byŭ «vałchvom» pahanskaj siekty, žonka nie ściarpieła siabroŭ-nieanacystaŭ

Mikałaj Siarhiejeŭ

Pavialičyć

Hod tamu hety čałaviek, jaki pazicyjanuje siabie jak «palitołah, pradstaŭnik Instytuta krain SND u Biełarusi» atrymaŭ z ruk Uładzimira Pucina miedal Puškina. «Hetaja ŭznaharoda vielmi važnaja dla Biełarusi, bo ŭ nas ruskaja mova i litaratura nie čužyja», — kazaŭ Siarhiejeŭ na ŭručeńni.

Taksama Siarhiejeŭ uznačalvaje hramadskuju arhanizacyju «Ruś», jakaja dziejničaje pad kryłom «Rassupracoŭnictva». Mienavita namahańniami Siarhiejeva letaś u Minsku prachodziła viečaryna pamiaci bajevika «DNR» Alaksandra Zacharčanki. Metaj «Rusi» źjaŭlajecca «zachavańnie, vyvučeńnie i prapahanda ruskaj kultury i movy».

Tyja, chto sačyŭ za palityčnym žyćciom z pačatku 90-ch, napeŭna, zhadajuć Siarhiejeva jak adnaho z sustaršyń čarnasocienskaj, antysiemickaj arhanizacyi «Słavianski sabor «Biełaja Ruś». Hetaja arhanizacyja taksama pretendavała na roli prarasijskaj partyi ŭ Biełarusi, ale rastvaryłasia ŭ historyi.

Siarhiejeŭ zapomniŭsia jašče tym, što prapanavaŭ u sajuznaj dziaržavie Biełarusi i Rasii addać Minsku Smalenskuju, Branskuju i Pskoŭskuju vobłaści. Heta vyklikała abureńnie šmat u kaho z paplečnikaŭ.

Andrej Tapaz

Pavialičyć

Heta vajskovy staršyna (praparščyk), jon pastajanna nosić formu. Tapaz źjaŭlajecca zasnavalnikam i kiraŭnikom moładzievaha hramadskaha abjadnańnia «Minski vajskova-patryjatyčny pošukavy centr «Ajčyna». Sam Tapaz kaža, što jahonaja zadača «zrabić z chłopčykaŭ mužčyn».

Dziejničaje hetaja čaroŭnaja arhanizacyja pry Hienštabie Ministerstva abarony, a siarod tych, z kim jana supracoŭničaje, — čarnasocienskija, kazackija, pravasłaŭnyja arhanizacyi. Uletku arhanizacyja Tapaza arhanizoŭvaje łahiery, dzie dziaciej vučać karystacca zbrojaj, chadzić u karavuł.

Tapaz byŭ siarod biełaruskich kazakoŭ, jakija pryjechali ŭ Lublin na pachavańnie danskich kazakoŭ, što zahinuli ŭ hetym polskim horadzie ŭ 1920 hodzie. Varta adznačyć, što taja «delehacyja» stajała z čorna-žoŭta-biełym rasijskim impierskim ściaham.

Hleb Vołkaŭ

Pavialičyć

Vołkaŭ — minčuk, skončyŭ Akademiju fizičnaha vychavańnia.

Kali Leŭ Kryštapovič uznačalvaŭ Infarmacyjna-analityčny centr pry Administracyi prezidenta, uziaŭ Vołkava da siabie pracavać viadučym śpiecyjalistam. Potym jon pierajšoŭ na pracu ŭ Akademiju kiravańnia.

Doŭhi čas Vołkaŭ byŭ siabram ŁDP, aktyŭničaŭ, navat źjaŭlaŭsia kiraŭnikom pres-słužby partyi. U 2012 bałatavaŭsia ad «hajdukievičcaŭ» u parłamient, ale prahnazavana mandat atrymała kandydatka ad ułady Žuraŭskaja.

Vołkaŭ vystupaje jak analityk u mižnarodnych pytańniaŭ, jon niamała piša ŭ «Biełaruskuju dumku» ab «destruktyŭnym patencyjale hłabalnych ŚMI», a taksama militaryźmie ZŠA.

Vystupaŭ u jakaści ekśpierta na antybiełaruskim partale «Rehnum», dzie ŭpeŭniena śćviardžaŭ, što suvierenitet našaj krainy — «źjava časovaja».

Uładzimir Hruździeŭ

Pavialičyć

Adrazu skažam, što da siaścior Hruździevych hety čałaviek nijakaha dačynieńnia nie maje. Heta sakratar praŭleńnia Biełaruskaha słavianskaha kamiteta, taho samaha, jaki ŭznačalvaje Siarhiej Kaścian (darečy, jon u pracy «Sajuza» ŭdziełu nie biare).

U svaich profilach u sacsietkach adznačaje, što maje miedali «100 hadoŭ słavianskamu ruchu na ziemlach Biełarusi», «1100 hadoŭ mirnaj damovy kniazia Aleha Vieščaha ź Vizantyjaj».

Hruździevu 32 hady, jon rodam z Mazyra. Šmat hadoŭ adpracavaŭ na Microsoft, ciapier praciahvaje pracavać u śfiery IT.

Kaža, što da słavianskich idej pryjšoŭ paśla naviedvańnia Kijeva i pachodu ŭ Kijeva-Piačorskuju łaŭru. «Ja tady zrazumieŭ, što my źjaŭlajemsia častkaj tryadzinaha ruskaha narodu, dałučyŭsia da Biełaruskaha słavianskaha kamiteta», — skazaŭ Hruździeŭ.

Na minułych vybarach hałasavaŭ «suprać usich». Kaža, što nivodzin z kandydataŭ nie adpaviadaŭ jahonym pohladam. Łukašenku Hruździeŭ krytykuje za toje, što jon pastaviŭ krainu ŭ ciapierašniaje stanovišča «šmatviektarnaj palitykaj».

«Šmatviektarnaść nie pavinna iści ŭ škodu nacyjanalnym intaresam. Naprykład, čamu my tak i nie pryznali niezaležnaść Paŭdniovaj Asiecii i Abchazii», — narakaje Hruździeŭ.

Dźmitryj Siemčanka

Čałaviek-zahadka. Pra jaho isnavańnie ničoha nie viedajuć pošukavyja sistemy. Niama jaho siarod karystalnikaŭ sacyjalnych sietak. Isnuje niadaŭniaja publikacyja niejkaha Dźmitryja Siemčanki na adnym prarasijskim homielskim sajcie, dzie jon krytykuje Miečysłava Hryba.

My spytali ŭ Mikałaja Siarhiejeva, chto taki Siemčanka, ale jon ščyra adkazaŭ, što takoha čałavieka nie viedaje i nibyta jaho nie było na schodzie arhkamiteta pa stvareńni «Sajuza». Uładzimir Hruździeŭ taksama adznačyŭ, što dla jaho heta zahadka. Siarhiej Łušč admoviŭsia razmaŭlać z «NN».

Były viadučy ANT, udzielnik prezidenckaha puła Dźmitryj Siemčanka, jaki syšoŭ z telekanała paśla vybaraŭ, śćviardžaje, što nie maje nijakaha dačynieńnia da «Sajuza».

• 0
• 0
• 0
• 0
• 0
• 0