Pasoł Biełarusi ŭ Rasii prahnazuje, što hranica pamiž Biełaruśsiu i Rasijaj, zakrytaja rasijskim bokam u sakaviku z-za pandemii COVID-19, budzie znoŭ adkryta ŭ kancy lipienia — pačatku žniŭnia. Ab hetym dypłamat skazaŭ siońnia, adkazvajučy na pytańnie karespandenta BiełTA.
«Analizujučy situacyju kožny dzień, suadnosiny kolkaści tych, chto zachvareŭ i chto vyzdaravieŭ, baču vydatnuju dynamiku niepasredna pa Maskvie, dzie zachvarełych u sutki 600-700 čałaviek, a tych, chto papraviŭsia, — 2-3 tys., — adznačyŭ Uładzimir Siamaška. — I pa Rasii kolkaść tych, chto vyzdaraŭlivaje, štosutačna bolšaja, čym tych, chto zachvareŭ. Pa Biełarusi takaja ž situacyja. Dumaju, što hranica niedzie da kanca lipienia — pačatku žniŭnia pavinna być adkryta».
Pasoł adznačyŭ, što rasijski bok užo ŭvioŭ niekatoryja pasłableńni pa pierasiačeńni hranicy. Jon nahadaŭ, što z samaha pačatku dla bieśpierabojnaha zabieśpiačeńnia tavarami pieršaj nieabchodnaści nie ŭvodziłasia zabarona na pierasiačeńnie hranicy pamiž Biełaruśsiu i Rasijaj dla hruzavoha transpartu. A niadaŭna ŭrad Rasii pryniaŭ rasparadžeńnie, jakoje dazvalaje pieramiaščacca praź biełaruska-rasijskuju hranicu vachtavikam. U pryvatnaści, pavodle słoŭ pasła, hetaj mahčymaściu ŭžo skarystalisia śpiecyjalisty pradpryjemstva «Biełarusnafta».
«I naadvarot, na budaŭnictvie BiełAES idzie pastajannaja ratacyja kadraŭ, i my znachodzim sposaby dla taho, kab jany prachodzili karancin i traplali na stancyju», — paviedamiŭ Uładzimir Siamaška.
Jon dadaŭ, što dahetul pasolstva vymušana zajmacca pierapraŭkaj u Biełaruś hramadzian, jakija prybyvajuć u rasijskija aeraporty z trecich krain vyvaznymi rejsami. Hetych hramadzian biełaruskaja dypmisija na ŭłasnych aŭtamabilach dastaŭlaje z maskoŭskich aeraportaŭ da rasijska-biełaruskaj hranicy. U pryvatnaści, siońnia dypmisija akazvaje dapamohu ŭ dastaŭcy na radzimu vaśmi biełaruskim hramadzianam.
Čały: Čym daŭžej Łukašenka marudzić z vybarami, tym bolš arhumientaŭ, kab jamu nie iści15
Kamientary