17 krasavika źjaviłasia statystyka chvorych na COVID-19 u Dokšyckim rajonie — pieršy raz za apošnija 9 dzion ułady dali svaju acenku maštabu epidemii. Praz tydzień paśla pieršaj pajezdki ŭ Dokšycy «Svaboda» sabrała infarmacyju ad miascovych žycharoŭ pra toje, što tam źmianiłasia za hety čas.
Kolki ciapier chvorych na COVID-19 u Dokšycach?
Pavodle Michaiła Višniavieckaha, načalnika hałoŭnaha ŭpraŭleńnia achovy zdaroŭja Viciebskaha abłvykankamu, u Dokšyckim rajonie paćvierdžanyja 72 pacyjenty z karanavirusam. Pra heta napisała BiełTA.
Na minułym tydni kolkaść infikavanych karanavirusam była viadomaja tolki pryblizna. Zahadčyca palikliniki ŭ Dokšycach 8 krasavika kazała hazecie «Rodnyja vytoki», što vypadki karanavirusu ŭ Dokšycach «možna pieraličyć pa palcach».
Pradstaŭniki jakich ustanovaŭ zachvareli na karanavirus ci pneŭmaniju
Pra maštab epidemii taksama možna mierkavać pa tym, u kolkich dziaržaŭnych ustanovach vyjavili chvorych na COVID-19 i pneŭmaniju.
Ad svajakoŭ i kalehaŭ nam viadomyja prynamsi nastupnyja arhanizacyi, dzie jość špitalizavanyja supracoŭniki z paćvierdžanym karanavirusam albo pneŭmanijaj:
- adździeł adukacyi Dokšyckaha rajvykankamu;
- rajonnaje ŭpraŭleńnie ŭnutranych spraŭ;
- pradpryjemstva žyllova-kamunalnaj haspadarki «Dokšycy-kamunalnik»;
- centar hihijeny i epidemijalohii;
- Biełtelekam;
- Ryma-katalicki kaścioł;
- centralny rajonny špital.
9 čałaviek pamierli ad pneŭmanii za dva tydni
Za dva minułyja tydni ŭ Dokšycach pamierli prynamsi dzieviać čałaviek, u kaho była pneŭmanija. Try ź ich — na hetym tydni. Hetuju infarmacyju redakcyi paćvierdzili svajaki i znajomyja hetych ludziej. Adnak niajasna, ci ŭ kahości ź ich zafiksavali karanavirus.
Pacyjentka špitala: «U nas tut lazaret, medyki pracujuć, jak na vajnie»
Pra toje, jak ciapier pracuje rajonny špital, u interviju rajonnaj hazecie raskazaŭ staršynia rajvykankamu. Pavodle Aleha Kavalonka, centralnuju rajonnuju lakarniu časova pieraprafilavali. Chirurhiju, dziciačaje i radzilnaje adździaleńni, hinekalohiju pieraviali ŭ lakarniu susiedniaha horadu — Hłybokaha.
Bolš emacyjna pra sytuacyju ŭ špitali «Svabodzie» raskazała adna z pacyjentak, ź jakoj my razmaŭlali praz telefon. Jak i bolšaść pacyjentaŭ, žančyna lažała ŭ lakarni z zapaleńniem lohkich.
«U nas ža tut lazaret, i jany [medyki] pracujuć, jak na vajnie, — dzień i noč. Apiakujucca nad nami. Voś chto hieroi», — skazała spadarynia Valancina.
Nam nie ŭdałosia źviazacca ź nivodnym medykam z Dokšyckaha rajonu. Ich svajaki raskazvajuć, što daktary i medsiostry padpisali dakument, pavodle jakoha im zabaraniajecca paviedamlać lubuju infarmacyju pra stan rečaŭ u špitali.
Masavyja mierapryjemstvy zabaranili, pryvatnyja kramy začynilisia
Aficyjna karantyn u Biełarusi nia ŭvodzili, isnuje tolki rekamendacyja paźbiahać masavych mierapryjemstvaŭ. Ale ŭ Dokšyckim rajonie masavyja mierapryjemstvy ŭvohule zabaronienyja. Pra heta skazaŭ Aleh Kavalonak u interviju rajonnaj hazecie. Taksama ŭ horadzie zakryli rynki, łaźni i vodna-azdaraŭlenčy centar. Adzinokim starym dastaŭlajuć tavary pieršaj nieabchodnaści sacyjalnyja rabotniki i valantery BRSM i Čyrvonaha Kryža. Kambinat bytavoha absłuhoŭvańnia i škoły horadu šyjuć maski.
Adrazu niekalki pryvatnych kramaŭ i stancyj techabsłuhoŭvańnia časova zakrylisia. Heta źviazana i z epidemijaj, i z tym, što źmienšyłasia aktyŭnaść ludziej. Chto maje mahčymaść, starajecca ŭvohule nie vychodzić z domu. U toj ža čas dziaržaŭnyja arhanizacyi i pradpryjemstvy pracujuć, jak i raniej — tut niama karantynu.
Kamientary