Ryhor Astapienia: Try pryčyny, čamu treba zvolnić ministra Karpienku

Być ministram adukacyi siońnia ŭ Biełarusi — heta praklataja praca. Biełaruskaja adukacyja ŭ hłybokim kryzisie, a puł finansaŭ dla vyrašeńnia vielizarnaj kolkaści prablemaŭ dosyć maleńki. 

Ale heta nie źmianiaje taho faktu, što apošnija dva z pałovaj hady Ministerstvam adukacyi kiruje nieadpaviedny čałaviek. Voś try asnoŭnyja padstavy, kab źmianić siońniašniaha ministra adukacyi na kahości bolš vartaha. 

Karpienka paspryjaŭ dyskredytacyi centralizavanaha testavańnia

Centralizavanaje testavańnie, pa sutnaści, było adnym z najbolšych dasiahnieńniaŭ biełaruskaj sistemy adukacyi. Z usimi svajmi niedachopami jano stała adekvatnym indykataram padrychtoŭki školnikaŭ i źmienšyła karupcyju pry pastupleńni va ŭniviersitety. 

Ale pry ministru Karpienku CT pieratvaryłasia ŭ simvał nieadekvatnaści. 

Naprykład, možna nabrać 51 bał pa fizicy ci 34 bały pa kitajskaj movie, prosta zaznačajučy pad liniejku adzin varyjant adkazu, albo 44 bały pa bijałohii, vypadkova vystaŭlajučy adkazy. Takich prykładaŭ šmat, i vidavočna, što sistema acenki viedaŭ złamanaja. Zroblena heta ź jasnaj metaj — pavialičyć adznaki abituryjentaŭ i takim čynam prychavać kryzis biełaruskaj adukacyi. 

Dahetul Ministerstva adukacyi i Respublikanski instytut kantrolu viedaŭ, jaki ładzić CT, nie prydumali ničoha lepšaha, jak skazać, što nasamreč va ŭsim vinavaty repietytary, jakija chočuć sapsavać vobraz biełaruskaj sistemy navučańnia.

Karpienka nie vyrašyŭ prablem biełaruskaj adukacyi

Składana naviešvać usie hrachi biełaruskaj adukacyi na ministra, jaki na pasadzie dva z pałovaj hady, tamu važniej kazać pra ahulny kirunak: pry Karpienku Biełaruś ruchałasia ŭ bok vyrašeńnia prablem u adukacyi ci ich pahłybleńnia? Chutčej, usio ž da apošniaha. 

Za čas na pasadzie Ihar Karpienka nie zrabiŭ nivodnaha kroku, jaki b šturchnuŭ biełaruskuju adukacyju napierad. Zamiest hetaha Ministerstva adukacyi razburała himnazii; nizkaapłatnaja praca piedahohaŭ dahetul uklučaje ŭ siabie «funkcyi baćkoŭ, nastaŭnikaŭ, vychavacielaŭ, pažarnaha i milicyjaniera» — i, adpaviedna, nastaŭniki sa škoł źbiahajuć; novyja padručniki pisalisia biez publičnaha abmierkavańnia navat siarod admysłoŭcaŭ; u BRSM dahetul zapisvajuć prymusova; biełaruskamoŭnyja školniki nadalej dyskryminujucca. Na ŭzroŭni ŭniviersitetaŭ usie raniejšyja prablemy zastalisia, pazicyi našych univiersitetaŭ u mižnarodnych rejtynhach nie rastuć, a Biełaruś nie pakazała prahresu ŭ Bałonskim pracesie. Pry hetym jakaść biełaruskaj adukacyi ŭ paraŭnańni ź inšymi krainami rehijona raści nie budzie, jak pakazvaje ekśpiertnaje apytańnie Centra novych idej. 

Pa sutnaści, retrahrad Karpienka zasunuŭ biełaruskuju adukacyju ŭ kansiervavuju blašanku — hetak, kaniešnie, jamu lahčej, ale nie biełaruskaj adukacyi.

A mahčyma, što Karpienka ničoha nikudy nie zasoŭvaŭ. Moža, jamu hetaja ŭžo zakrytaja blašanka dastałasia ad papiarednika, a tamu ad jašče raniejšaha papiarednika. Ale ŭ lubym razie dziejańni Ihara Karpienki jamu honaru nie robiać. 

Karpienka pierabłytaŭ Kamunistyčnuju partyju i Ministerstva adukacyi

Treciaja pryčyna, čamu Biełarusi patrebny novy ministr adukacyi, u tym, što siońniašni pieratvaryŭ ministerstva ŭ adhalinavańnie Kamunistyčnaj partyi Biełarusi, jakuju jon raniej uznačalvaŭ. Naprykład, niadaŭna pasadu kiraŭnika Hałoŭnaha infarmacyjna-analityčnaha centra Minadukacyi zaniaŭ adnapartyjec Ihara Karpienki (a raniej hetaj pracy pazbaviŭsia prahresiŭny adukatar Pavieł Lis).

Ale błytanina pamiž KPB i Minadukacyi bačna nie tolki ŭ najmie supracoŭnikaŭ, ale i ŭ publičnaj rytorycy. Sam Karpienka ŭznačalvaŭ arhkamitet pa śviatkavańni 100-hodździa kamsamoła, a pres-słužba Ministerstva adukacyi śćviardžaje, što ŭ savieckija časy intelektuałaŭ rasstralali tak šmat, bo jany napisali vieličeznuju kolkaść danosaŭ. 

Pakul Karpienka sa svajoj kamandaj zajmajucca nieadukacyjnymi spravami, jany nie supraćpastavilisia adnosna novaha zakona ab nabory ŭ vojska, jaki stanie vialikaj pieraškodaj u adukacyi mnohich maładych ludziej. 

Apdejt: papiaredniaja viersija hetaha artykułu źmiaščała infarmacyju, što pazicyja Minadukacyi adnosna novaha zakonu ab nabory ŭ vojska zastajecca nieviadomaj. U praktycy, jak zaŭvažyŭ u kamientach Dźmitry Ivanavič, Ministerstva adukacyi ŭzhadniła zakon biez pravak.

Dziela abjektyŭnaści treba addać naležnaje ministru za niekalki rečaŭ, jakija źmianilisia ŭ lepšy bok za apošnija dva z pałovaj hady. U pryvatnaści, Ministerstva adukacyi stała ŭ razy bolš adkrytym: reahuje na publičnyja słovy adukataraŭ i stvaryła pry sabie Kansultacyjnuju radu. Heta ŭsio ž vymahaje peŭnaj śmiełaści, ale heta nie źmianiaje taho fakta, što Biełarusi było b kudy lepš, kali b Ministerstvam adukacyi kiravaŭ niechta bolš kampietentny. 

• 1
• 0
• 0
• 0
• 0
• 0