Pamior papiarednik Jarmošynaj, jaki moh nie zarehistravać Łukašenku kandydatam u prezidenty ŭ 1994 hodzie

Na 75-m hodzie žyćcia pamior były kiraŭnik Centrvybarkama Biełarusi i namieśnik kiraŭnika Administracyi prezidenta Alaksandr Abramovič. Pra heta ŭ fejsbuku paviedamiŭ zahadčyk kafiedry teoryi i historyi dziaržavy i prava Siarhiej Kalinin.

Pavialičyć

Alaksandr Abramovič naradziŭsia ŭ 1944 hodzie ŭ vioscy Zabałaćcie Niaśvižskaha rajona. Skončyŭ jurydyčny fakultet BDU. U 1991-1992 byŭ členam Kamiteta Kanstytucyjnaha nahladu SSSR.

Ad 1992 da 1996 uznačalvaŭ Centralnuju vybarčuju kamisiju. Potym byŭ namieśnikam kiraŭnika Administracyi prezidenta (1996—2004).

Deputat Viarchoŭnaha Savieta ad Apazicyi BNF (1990—1996) Siarhiej Navumčyk tak zhadvaje niabožčyka: «Abramovič jak staršynia CVK u 1992 hodzie, kali BNF sabraŭ bolš za 440 tysiač podpisaŭ za refierendum ab rospusku Viarchoŭnaha Savietu i novych vybarach, zaniaŭ prystojnuju i pryncypovuju pazicyju. Jon zajaviŭ na siesii, što Front vykanaŭ patrabavańni zakona i sprava honaru deputataŭ — pryznačyć datu refierendumu. Na žal, hetaha nie adbyłosia — suprać byli i Šuškievič, i staršynia zakanadaŭčaj kamisii, i parłamienckaja bolšaść».

Navumčyk zhadvaje, što Abramovič moh być tym čałaviekam, jaki b paviarnuŭ historyju Biełarusi ŭ inšy kirunak. «Na pieršych prezidenckich vybarach (i pa sutnaści adzinych) jon zarehistravaŭ kandydatam Łukašenku, chacia moh by hetaha i nie rabić — u Łukašenki byli niapravilna ukazanyja miesca pracy i žycharstva ŭ padpisnych listach, da taho ž u jaho nie było pry sabie dakumientaŭ («Skrali vorahi», — zajaviŭ jon na pasiadžeńni CVK).

U noč padliku hałasoŭ na pieršych prezidenckich vybarach ja byŭ u kabiniecie Abramoviča jak davieranaja asoba Paźniaka, i my bačyli, jak Łukašenka nabiraje hałasy. Jon pieramoh u pieršym tury, niedzie 54-56% (i heta supadała z padlikami naziralnikaŭ ad BNF), ale potym rezka pamianiałasia infarmacyja ź niekatorych rehijonaŭ na karyść Kiebiča i stała zrazumieła, što budzie druhi tur», — raskazvaje Siarhiej Navumčyk.

Publicyst Alaksandr Fiaduta tak uspaminaje pra spadara Abramoviča: «Heta čałaviek, jaki pravioŭ adzinyja svabodnyja vybary prezidenta ŭ Biełarusi, ale padčas pracy ŭ Administracyi zrabiŭ usio, kab svabodnych vybaraŭ bolej nie było».

«U Administracyi prezidenta jon kuryravaŭ zakanadaŭčy błok. Usie dakumienty pa refierendumie 1996 hoda rychtavali Alaksandr Abramovič, Ryhor Vasilevič i Alaksandr Maryskin. Pieršaha ŭžo niama ŭ žyvych, spadziajusia, dvoje druhich raskažuć, jak usio heta adbyvałasia. Kali ja ź im kantaktavaŭ u 1994 hodzie, to adčuvałasia, što heta vielmi adukavany, hramatny juryst. U jaho pa stanie na 1994 hod była svaja pazicyja, jon nie daŭ sfalsifikavać vybary, chacia byŭ cisk ad peŭnaha kandydata, nie budziem nazyvać jahonaje proźvišča. Mnie zdajecca, što Alaksandr Michajłavič byŭ trochu pakryŭdžany na tuju ŭładu, jon viarnuŭsia z Maskvy, dzie pracavaŭ u Kamitecie Kanstytucyjnaha nahladu, jon moh raźličvać na pasadu staršyni Kanstytucyjnaha suda, ale nie atrymaŭ jaje.

Ale ŭ 1996 hodzie za Abramoviča było soramna. Napiaredadni refierenduma ja sutyknuŭsia ź im u Domie ŭrada. «Alaksandr Michajłavič, niaŭžo vy nie razumiejecie, što adbyvajecca», — spytaŭsia ja. U toj momant ja ŭbačyŭ u jahonych vačach blask, taki blask byvaje ŭ drapiežnika pierad tym, jak upalavać achviaru. Jon byŭ absalutna ŭpeŭnieny, što refierendum byŭ užo vyjhrany. Było adnačasova i soramna, i strašna», — adznačaje Alaksandr Fiaduta.

Raźvitańnie z Alaksandram Abramovičam projdzie 4 śniežnia ŭ KZ «Minsk» ad 11 da 13 hadziny.

• 0
• 0
• 0
• 0
• 0
• 0