Sustreča arhkamiteta pa praviadzieńni śviatkavańnia stahodździa niezaležnaści BNR praciahvałasia try hadziny. Kala 30 palitykaŭ i hramadskich dziejačaŭ vyrašali, što rabić ź niefarmalnaj prapanovaj Minharvykankama.
Nahadajem, ułady nibyta zhodnyja na praviadzieńnie śviatočnaha kancerta na płoščy kala Opiernaha teatra, ale suprać šeścia.
«Radyjo Svaboda» viało žyvy efir z zachaplalnaha mierapryjemstva. Doŭhi čas ludzi, jakija cikaviacca biełaruskaj palitykaj, nie mahli pačuć takoje zaciataje abmierkavańnie.
Ryhor Kastusioŭ i Alaksiej Janukievič schilalisia da taho, što pahadzicca z kancertam — nie drenny varyjant. Toj ža dumki prytrymlivalisia inicyjatyŭnyja maładziony — Pavieł Biełavus z «Art-Siadziby», błohier Eduard Palčys.
Supraćlehłaje mierkavańnie mieli Mikoła Statkievič i Viačasłaŭ Siŭčyk. Jany nastojvali, što biez šeścia Dnia Voli być nie moža.
Adzin ź cikavych momantaŭ abmierkavańnia — adkrytaje hałasavańnie za skład pieramoŭnaj hrupy. Statkievič, Viniarski i Siŭčyk vykazvali suprać Biełavusa. Palčys z Matolkam nie padtrymlivali Siŭčyka. A Łahviniec ustrymlivaŭsia padčas hałasavańnia za Hubareviča. Statkievič sprabavaŭ prasunuć u pieramoŭnuju hrupu svajho aktyvista Sparyša.
U vyniku byŭ dasiahnuty kampramis. Vyrašana sfarmiravać pieramoŭnuju hrupu (Jaŭhien Afnahiel, Pavieł Biełavus, Juraś Hubarevič, Ryhor Kastusioŭ, Uładzimir Niaklajeŭ, Pavieł Sieviaryniec, Viačasłaŭ Siŭčyk, Siarhiej Sparyš) i ŭpaŭnavažyć jaje na pieramovy ź Minharvykankamam. Apazicyja budzie ŭsio ž namahacca śviatočnaha šeścia i kancerta kala Opiernaha teatra. Jašče adno patrabavańnie — adsutnaść zaharodak na miescy praviadzieńnia mitynhu.
Pryvodzim samyja vohniennyja cytaty i dyjałohi.
* * *
Alaksiej Janukievič: Ja chaču zrazumieć kankretna vašu pazicyju. «Nijakich pieramovaŭ z uładami?»
Viačasłaŭ Siŭčyk: Hłupstva. Ja ŭsio žyćcio vioŭ pieramovy z uładami!
Alaksiej Janukievič: I ŭsio žyćcio jany vas kidali, jak vy raspaviadali! I sens było ich pravodzić?
* * *
Eduard Palčys: Vajciuškieviča nie budzie, jon užo ŭ Varšavie. 95%, što Volskaha nie budzie - u jaho [vystup] u fiłarmonii ŭ Biełastoku. Z kožnym dniom my minusujem jakoha-niebudź artysta.
Viačasłaŭ Siŭčyk: Eduard, a čamu ja jašče try miesiacy tamu viedaŭ, što Volski budzie ŭ Biełastoku, a vy nie viedali?
Eduard Palčys: My viali ź im pieramovy. Kali budzie dakładna viadoma, jon hatovy admianić.
* * *
Vacłaŭ Areška: Admovicca ad šeścia niemahčyma. Tady lepš užo ničoha nie rabić.
* * *
Anton Matolka: U nas niama aficyjnaha adkazu na hety zvarot. Ale ŭ nas jość publikacyi va ŭsich ŚMI, uklučajučy Tut.baj, dzie ŭ zahałoŭku skazana: «Minharvykankam prapanavaŭ apazicyi adznačyć stahodździe…» Heta našmat lepš za aficyjny adkaz, paviercie. Publičnaje paćvierdžańnie taho, što Minharvykankam hatovy iści na hety…
Mikoła Statkievič: A Łukašenka zajaviŭ, što hetyja vybary buduć samymi sumlennymi!
Anton Matolka: My zaraz kažam nie pra vybary, a kažam pra… [nie čuvać]
Mikoła Statkievič: A ja kažu pra padychody ŭłady.
* * *
Mikoła Statkievič: Jany [ułady] zmušanyja nami da kampramisu, jany pačali pieramovy, pakul niefarmalnyja. Ja chaču zrabić surjoznuju zaŭvahu ŭ boku Ryhora [Kastusiova]. Ryhor, ty nie mieŭ prava pajści tudy adzin! Ty lidar adnoj z apazicyjnych partyj, a niejkija čynoŭniki pastavili tabie ŭmovu: «Vy pavinny pryjści adzin». I ty pasłuchaŭsia. … Pajšli b utroch, plavać na ichnija ŭmovy! …
[Niechta]: Spadar Mikoła…
Mikoła Statkievič: Darujcie, ja zavieršu. I vy tut nie namieśnik staršyni arhkamiteta. My ŭsie prysutničajem na rabočaj hrupie, i tut ja staršynia, jaki daje słova…
Ryhor Kastusioŭ: Ty spakojna havary, nie treba tut.
Mikoła Statkievič:… Tamu nie pierapyniajcie mianie, kali łaska.
Alaksiej Janukievič: Nichto vas nie pierapyniaŭ.
Mikoła Statkievič: Tak, vy źbili z dumki… Ciapier ja praciahvaju.
* * *
Viačasłaŭ Siŭčyk [viarnuŭsia]: Kali vy dumajecie, što vy zaraz pojdziecie na pavadu va ŭłady, i ad hetaha atrymajecie kancert… — nie, tak nie budzie. Spačatku vy zabaronicie šeście, a paśla ŭłady sami zabaroniać śviatkavańnie. Tak i budzie.
* * *
Mikoła Statkievič: Dla mianie heta nie śviata… Nie tolki śviata… Dla mianie hałoŭnaje nie śviata. Dla mianie hałoŭnaje ŭ śviacie niezaležnaści — nie-za-le-žnaść. Ja razvažaju katehoryjami nie tymi, kab ludzi pajšli paplasali i muzyku pasłuchali, a kab my niešta zrabili dla ŭmacavańnia niezaležnaści. My kožny hod heta rabili. Dla mianie heta śviata baraćby za niezaležnaść. Šeście pavinna być! [časova sychodzić]
* * *
Eduard Palčys: Kali my nie damovimsia pra miesca praviadzieńnia kancertu da 5 sakavika, budziecie pravodzić i śpiavać vy sami. Nivodnaje kancertnaje ahienctva nie zmoža zrabić za taki karotki termin. Rychtujciesia śpiavać sami. Kali da 5 sakavika my nie vyrašym, budzie 2000 čałaviek, dva bardy i dva złamanyja miehafony. Voś što my atrymajem na stahodździe BNR.
* * *
Alaksiej Janukievič: Atrymać dazvoł na kancert užo na hetym tydni lepiej, čym za piać dzion [da 25 sakavika] z šeściem na 200 mietraŭ. U tym, kab prajści 200 mietraŭ, niama nijakaha zmahańnia za niezaležnaść. I vy, spadar Mikoła [Statkievič], mianie ŭ hetym nie pierakanajecie.
* * *
Viačasłaŭ Siŭčyk: Jość vyjście: prahałasavać za toje, što my tałdyčym, i spakojna daručyć ludziam, jakija buduć vieści pieramovy, što jany nie buduć da kanca idyjotami. [hučać apładysmienty]
Alaksiej Janukievič: Ja taksama paapładziruju, bo mnie padabajucca pryhožyja tosty. A heta tost, a nie prapanova.
* * *
Mikoła Statkievič: Arhkamitet začyniajem!
Alaksiej Janukievič: Ja suprać adpuskać kłakieraŭ [pakazvaje ŭ bok paplečnikaŭ Statkieviča], davajcie da kanca dapracujem.
Mikoła Statkievič: Kali łaska, paaściarožniej sa słovami. Bo ja viedajecie jakimi słovami pra vas kažu. Kłakieraŭ znajšli!
Alaksiej Janukievič: Skažycie.
Pavieł Sieviaryniec: Tut nie miesca, tut miesca dla jadnańnia.
Mikoła Statkievič: Hetyja ludzi [pakazvaje ŭ bok svaich paplečnikaŭ] vychodzili na niesankcyjanavanyja akcyi!
Alaksiej Janukievič: I što?
[Niechta z paplečnikaŭ Statkieviča]: Ja takoje ž prava hołasu maju, jak i ty!
Alaksiej Janukievič: My sa spadarom Ryhoram [Kastusiovym] pradstaŭlajem palityčnuju partyju — možna skazać, tysiačy, možna skazać, sotni. A vy kožny bolšy za partyju spadara Statkieviča.
Dzianis Mieljancoŭ i jaho reałpalityk: jon sapraŭdy pamianiaŭ pohlady ci prosta raniej maskiravaŭsia?47
Kamientary