Łukašenka: Miedcentr u Ždanovičach nie tolki dla čynoŭnikaŭ, tam mohuć lačycca i prostyja ludzi. Za hrošy

U kliničnym miedycynskim centry, jaki dabudoŭvajecca ŭ vioscy Ždanovičy Minskaha rajona, pavinny absłuhoŭvacca jak dziaržsłužačyja, tak i zvyčajnyja hramadzianie. Hetaha Alaksandr Łukašenka zapatrabavaŭ siońnia na naradzie pa pytańniach miedycynskaha absłuhoŭvańnia ŭ hetaj ustanovie achovy zdaroŭja.

Kiraŭnik dziaržavy adznačyŭ, što ŭ hramadstvie horača abmiarkoŭvajecca budaŭnictva pad Minskam kliničnaha miedycynskaha centra. «Ja padkreślivaju: pa absłuhoŭvańni našaha nasielnictva, nie tolki, jak pišuć abo razvažajuć, čynoŭnikaŭ ci dziaržaŭnych słužačych, choć nie biez hetaha», — źviarnuŭ uvahu Alaksandr Łukašenka.

Jon raspavioŭ, jak prymałasia rašeńnie ab budaŭnictvie hetaj ustanovy achovy zdaroŭja. «Jak mnie paviedamili jašče raniejšyja kiraŭniki Minskaha harvykankama, płanavałasia ŭ Minsku budaŭnictva vielizarnaj balnicy z-za niedachopu płoščaŭ. Košt hetaj balnicy vahaŭsia ad 300 da 500 młn jeŭra ŭ zaležnaści ad abstalavańnia. Viadoma, takich hrošaj u dziaržavie siońnia niama. Tańniej jana abyścisia i nie mahła, tamu što chleŭ budavać siońnia nie tolki ŭ Minsku, ale i ŭ inšym horadzie nieprymalna. Skupy płacić dvojčy», — kanstatavaŭ jon.

Jon zaŭvažyŭ, što absłuhoŭvacca ŭ novym kliničnym miedcentry hramadzianie zmohuć taksama na płatnaj asnovie.

«Kali ciabie nie zadavalniaje absłuhoŭvańnie ŭ niejkaj minskaj balnicy, ty možaš pryjści, zapłacić hrošy (bo nie pa miescy budzieš absłuhoŭvacca) i absłužycca tut. Što ŭ nas mała bahatych ludziej, jakija siońnia hatovy zapłacić hrošy i pravieści niejkija daśledavańni, kab vyznačyć dakładny dyjahnaz?» — zadaŭ rytaryčnaje pytańnie kiraŭnik dziaržavy.

Alaksandr Łukašenka jašče raz padkreśliŭ, što nijakich schavanych krokaŭ pry budaŭnictvie ŭstanovy achovy zdaroŭja nie było. «Heta było majo rašeńnie, i ja pra jaho nie škaduju. My zekanomili vielizarnyja hrošy. Tyja, chto kažuć, što heta maja balnica — dziakuj bohu, kab ja i dalej tak lačyŭsia, jak lačusia da hetaha času.

Ja pa balnicach nie chadziŭ i nie chažu», — zajaviŭ jon.

Što tyčycca absłuhoŭvańnia ŭ miedcentry dziaržaŭnych słužačych, kiraŭnik krainy nahadaŭ, što siońnia asobnyja palikliniki jość i ŭ siłavych struktur. Hetyja ŭstanovy zachavalisia jašče z savieckich časoŭ.

«Heta dobryja centry, dziejničajuć sapraŭdy pa takim ža pryncypie: tudy možna pryjści i lačycca, kali ŭ ciabie jość niejkija sumnieńni ŭ balnicy, da jakoj ty prymacavany. Jašče raz padkreślivaju: heta praktyka ŭsich dziaržaŭ śvietu, — skazaŭ kiraŭnik dziaržavy. — i navat nie ŭ hetym sprava.

Skažu prosta: ja hatovy z usich vas pył ździmać, a nie tolki lačyć, aby vy tolki efiektyŭna pracavali dla dziaržavy. Jašče takuju balnicu pabudujem — tolki pracujcie sumlenna, adkryta i pryncypova, kab dziaržava kvitnieła».

Pavodle słoŭ Alaksandra Łukašenki, takija miedycynskija centry, jakija buduć pieradavać samyja sučasnyja technałohii ŭ inšyja balnicy i kliniki, płanujecca adkryć u kožnaj vobłaści. «Budziem zaprašać tudy, kali svaich nie chapaje, daktaroŭ, samych pierśpiektyŭnych i samych talenavitych, jakija b navučyli našych lačyć toje, što my nie ŭmiejem. Dy i da nas buduć pryjazdžać vučycca, užo heta robiać», — dadaŭ kiraŭnik dziaržavy.

Jon pacikaviŭsia, jakaja hatoŭnaść miedycynskaha centra ŭ Ždanovičach, jak u im buduć akazvacca pasłuhi dla nasielnictva, u tym liku dla asob, jakija majuć zasłuhi pierad dziaržavaj. «My damaŭlalisia, što ŭ hetym hodzie my pavinny skončyć abjekt i zdać jaho. Ja chacieŭ by pryjechać i pahladzieć na hetuju balnicu, jak jana budzie vyhladać», — adznačyŭ Alaksandr Łukašenka.

Pavialičyć

***

Na telehram-kanał «Našaj Nivy» možna padpisacca tut.

• 0
• 0
• 0
• 0
• 0
• 0