Žychary Słucka vykazalisia suprać pierajmienavańnia Kamsamolskaj u vulicu Słuckich paŭstancaŭ

28 lutaha ŭ aktavaj zale himnazii №1 horada Słucka prajšła sustreča pradstaŭnikoŭ ułady z žycharami vulicy Kamsamolskaja. Na paradku dnia stajała pierajmienavańnie vulicy Kamsamolskaj u vulicu Słuckich paŭstancaŭ, inicyjavanaje siabram apazicyjnaj partyi BNF i aktyvistam ruchu «Za Svabodu» Vitalom Amialkovičam, piša SlutskGorod.

Padstavaj dla druhoj sustrečy staŭ čarhovy zvarot aktyvistaŭ u Słucki rajvykankam i rajonny Saviet deputataŭ ab pierajmienavańni vulicy Kamsamolskaj u vulicu Słuckich paŭstancaŭ. U aktavaj zale himnazii sabrałasia kala 150 čałaviek. Vioŭ mierapryjemstva staršynia Słuckaha rajonnaha Savieta deputataŭ Viktar Ražaniec, u zale prysutničała namieśnica staršyni Słuckaha rajvykankama pa ideałahičnaj rabocie Łarysa Dabravolskaja. Z boku aktyvistaŭ moŭčki naziraŭ za tym, što adbyvajecca, staršynia ruchu «Za Svabodu» Juraś Hubarevič.

Pavialičyć

Miascovyja žychary z samaha pačatku sustrečy zaŭziata vykazvali svaju niezadavolenaść inicyjatyvaj pierajmienavańnia vulicy. Viktar Ražaniec zaklikaŭ prysutnych da paradku i paviedamiŭ, što z 592 čałaviek, jakija padpisali pietycyju za pierajmienavańnie vulicy, žycharoŭ Słucka naličvajecca ŭsiaho kala 15 čałaviek. «Z usich słuckich ni adnaho žychara vulicy Kamsamolskaj tut [u pietycyi] niama», — dadaŭ staršynia rajonnaha Savieta deputataŭ.

Viktar Ražaniec adznačyŭ, što, miarkujučy pa minułym schodzie, ludziej chvaluje nie stolki materyjalny aśpiekt pierajmienavańnia vulicy i ŭsie vydatki, źviazanyja ź pieraafarmleńniem dakumientaŭ, kolki maralny ci ideałahičny. Mnohija z prysutnych pahadzilisia z hetymi słovami.

Pavialičyć

Inicyjatar sustrečy Vital Amialkovič sprabavaŭ rastłumačyć prysutnym, čamu dla pierajmienavańnia była abranaja mienavita vulica Kamsamolskaja, adnak miascovyja žychary nie žadali ničoha čuć, čaściakom vykrykvajučy svaju niazhodu słovami «Pakładzicie mikrafon», «Prybrać jaho adsiul», «Siadź na miesca», i hetak dalej. «Na žal, ja nie ŭpeŭnieny, što vy ŭsie pradstaŭlajecie mienavita hetuju vulicu», — skazaŭ aktyvist, čym vyklikaŭ burnaje abureńnie tych, chto sabraŭsia.

Adkazvajučy na pytańnie prysutnych pra košt pieraafarmleńnia ŭsich dakumientaŭ, Vital Amialkovič skazaŭ: «Ja sutykaŭsia ŭ žyćci ź situacyjami, kali ŭ ludziej u pašparcie byli adrasy nie isnujučych vulic, […] i nijakich prablem u ludziej nie było. Nie treba hnać ludziej pieraafarmlać dakumienty, voś i ŭsio rašeńnie». Adkaz aktyvista vyklikaŭ čarhovy škvał abureńnia ŭ zale.

Da sceny vyjšła žančyna, jakuju ŭdzielniki sustrečy słuchali ŭvažliva i niekalki razoŭ apładziravali. Jana skazała: «Ja hanarusia hetym kavałačkam našaj słuckaj ziamli, našym horadam, našaj historyjaj, našaj vulicaj. Junactva majo i dziacinstva źviazanyja z kamsamołam, ja hanarusia tym časam, pavažaju svaju historyju, svaju vulicu. Tut vyraśli maje dzieci, tut žyvuć maje ŭnuki. I mnie zdajecca, što nichto nie maje prava naviazvać nam svaje idei».

Adzin z prysutnych prapanavaŭ prahałasavać: praktyčna ŭsie ŭdzielniki sustrečy padniali ruki suprać pierajmienavańnia vulicy. Za pierajmienavańnie prahałasavali čatyry čałavieki.

Miascovyja žychary taksama vykazali svajo mierkavańnie paśla sustrečy:

• 0
• 0
• 0
• 0
• 0
• 0