Pa materyjałach śledstva, incydent zdaryŭsia jašče 1 maja 2016 hoda.

U hety dzień troje žycharoŭ Žabinki na taksi adpravilisia ŭ Brest. Siarod ich byli 38-hadovy abvinavačany, jaho siabar i 48-hadovy paciarpieły. Apošni jakraz pradaŭ svoj załaty łancužok, tak što trochi hrošaj u kampanii było.

Pa prybyćci ŭ abłasny centr da kampanii dałučyŭsia jašče adzin małady čałaviek.

«Zatym u adnym z dvaroŭ horada padśledny nabyŭ nie mienš za čatyry šprycy. U kožnym ź ich źmiaščałasia nie mienš za 2 mł rečyva, u skład jakoha ŭvachodzili asabliva niebiaśpiečnyja narkatyčnyja srodki — marfin, kadein i tebain. Paśla hetaha ŭ padjeździe jon sam zrabiŭ sabie injekcyju i viarnuŭsia da mašyny, dzie jaho čakali znajomyja», — raspaviała Maryna Drańkova, aficyjny pradstaŭnik Śledčaha kamiteta pa Bresckaj vobłaści.

Fota - Śledčy kamitet

Fota - Śledčy kamitet

Zatym mužčyny pajechali da haražnaha kaapieratyva «Muchaviecki». Tam abvinavačvany zbyŭ svaim siabram pa adnym šprycy.

«Taksama jon zrabiŭ injekcyju paciarpiełamu, jaki znachodziŭsia ŭ transpartnym srodku, tak jak u taho była parušanaja kaardynacyja ruchaŭ», — paviedamlajuć śledčyja.

U hetym momant kiroŭca vychodziŭ z mašyny, a kali viarnuŭsia, to ŭbačyŭ, što pasažyru drenna. Pra heta jon skazaŭ astatnim, paśla čaho mužčyny pieranieśli svajho znajomaha z sałona na ziamlu. Taksist adrazu ž pajechaŭ ź miesca zdareńnia, a klijenty raźbiehlisia.

«Nieŭzabavie paciarpiełaha znajšli vypadkovyja minaki, jakija patelefanavali ŭ chutkuju dapamohu i orhany ŭnutranych spraŭ. Paśla prybyćcia miedycynskija rabotniki kanstatavali śmierć mužčyny. Pavodle vysnovaŭ ekśpiertnaha zaklučeńnia, jana nastupiła ad vostraha kambinavanaha atručvańnia marfinam, kadeinam, kłazapinam i etyłavym śpirtam», — adznačajuć śledčyja.

U vyniku 38-hadovamu žycharu Žabinki pradjaŭlenaje abvinavačvańnie ŭ niezakonnym abarocie narkatyčnych srodkaŭ, jaki paciahnuŭ pa nieaściarožnaści śmierć čałavieka. Abvinavačany nidzie nie pracavaŭ, raniej nieadnarazova pryciahvaŭsia da kryminalnaj adkaznaści. Ciapier jon pad vartaj.

Mužčyna spačatku admaŭlaŭsia pryznavać svoj udzieł u historyi, patłumačyŭšy, što narkotyki nabyŭ zahinuły i zrabiŭ śmiarotnuju injekcyju sam sabie.

«Adnak dadzienyja dovady śledčymi byli abvierhnutyja, — paviedamlajuć u SK. — Materyjały kryminalnaj spravy vyvučany prakuroram i nakiravanyja ŭ sud dla razhladu».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?