Mierkavańnie: Nikoli jašče ŭ Biełarusi nie było takoha zručnaha momantu, kab pieraaryjentavacca na Zachad, jak ciapier

Situacyju admysłova dla Intex-press patłumačyŭ Łukaš Jasina, polski analityk, šef ŭschodniejeŭrapiejskaha adździeła internet-časopisa Kultura Liberalna, adziny, chto na polskich prezidenckich vybarach sprahnazavaŭ i parazu dziejučaha prezidenta Kamaroŭskaha, kali jaho rejtynh byŭ jašče bolš za 70%.

Na dumku Łukaša, źmiena polskaha kiraŭnictva nijak nie adabjecca na adnosinach pamiž Polščaj i Biełaruśsiu.

Zrešty, pa jaho słovach, dla šmat kaho z zachodnich palitykaŭ Biełaruś patrebna tolki jak bufier pamiž Polščaj i Rasijaj.

– Vajna va Ukrainie źmianiła staŭleńnie Jeŭropy da šmat jakich prablem, – kaža polski ekśpiert. – Samaje važnaje dla ES ciapier – stabilnaść, a hałoŭnaja prablema – Pucin. Tamu ŭsie, chto choć niejak mohuć supraćstajać jamu, buduć padtrymanyja. Chacia, zrazumieła, nichto z zachodnich palitykaŭ adkryta nie padtrymaje Łukašenku da kastryčnika.

Ciapier Jeŭropie lepš mieć stasunki z prezidentam Biełarusi Łukašenkam, čym ź niejkim hubiernataram Paŭdniova-Zachodniaha kraju Rasii, ličyć Jasina.

Sproby niešta źmianić na Biełarusi mohuć pryvieści da krymskaha scenaru, tamu padtrymka biełaruskaj apazicyi budzie źmianšacca. Mahčyma, zastanucca tolki niejkija prajekty pa navučańni ŭ Jeŭropie biełaruskaj moładzi, jakaja ŭ budučyni, atrymaŭšy dobruju adukacyju, budzie zajmacca palitykaj i ekanomikaj u Biełarusi.

– Na moj pohlad, Łukašenka ciapier padobny da Jaruzelskaha ŭ 1980-ch hadach, – tłumačyć analityk. – Kali toj ŭvioŭ vajenny stan, ad jaho adviarnuŭsia Zachad, pačalisia sankcyi. Adnak z 1985 hoda suviazi pačali adnaŭlacca, a ŭładu polski kamunistyčny režym zhubiŭ z-za kiepskaj ekanamičnaj situacyii, a nie palityčnaha cisku.

Tamu, na dumku Jasiny, nichto nie pryniasie biełarusam pieramienaŭ, pakul jany sami hetaha nie zachočuć.

Nichto b na Zachadzie nie padtrymaŭ Ukrainu, kali b jaje narod sam nie paŭstaŭ, pratestujučy suprać źmieny Janukovičam kirunku palityčnaha supracoŭnictva.

– Kali Łukašenka zrobić niekalki krokaŭ nasustrač ES, Jeŭropa padtrymaje jaho i nie budzie rušyć stvoranuju im sistemu. Zachodnim palitykam nie treba ciapier niestabilnaja Biełaruś. Tam razumiejuć, što navat kali Łukašenka zaŭtra sydzie, zastaniecca elita, jakuju stvaryŭ jon. Treba kazać praŭdu: sučasnuju Biełaruś zrabili nie Milinkievič ci Šuškievič, a zrabiŭ Łukašenka. Sistema budzie pracavać i paśla jaho.

Jeŭrapiejskija palityki ciapier ŭžo bajacca luboj źmieny ŭłady ŭ krainach – apošni vopyt Livii ci Ukrainy heta pakazaŭ, miarkuje Łukaš Jasina. Treba čakać, što Jeŭropa nieŭzabavie pakaža Łukašenku, što padtrymaje jaho, kali jon nie budzie abapiracca na Rasiju.

Nichto jaho ŭžo nie budzie źviarhać. Usio ciapier zaležyć ad biełaruskaha lidara – ci pojdzie jon na jeŭratransfarmacyju.

– Nam nie patrebnyja ruskija tanki ŭ Biełaviežskaj puščy, – tłumačyć polski ekśpiert. – Nichto nie viedaje, chto pryjdzie paśla «baćki» – prazachodni palityk ci pramaskoŭski staŭleńnik.

Tamu, na jaho dumku, dla Jeŭropy Łukašenka ciapier bolš vyhadny, bo jaho ŭžo viedajuć. Mahčyma, heta budzie padobna da supracy ES z režymami Alijeva ci Nazarbajeva.

– Ja b ciapier paraiŭ biełarusam źviartać bolš ŭvahi nie na palityku, a na ekanomiku, – kaža Jasina. – Krynica, jakaja žyviła Biełaruś, vyčerpvajecca. Vaš ŭrad miarkuje, što nafta iznoŭ padaražaje, a sankcyi z RF zdymuć. Ale heta małavierahodna ŭ bližejšyja hady. Vam patrebny reformy. Vy sami bačycie, što Łukašenka ŭžo ciapier sprabuje niejak źmianić situacyju, adnak ekanomika, a nie apazicyja prymušaje jaho hetym zajmacca.

Na dumku polskaha analityka, nikoli nie było takoha zručnaha momantu dla Biełarusi, kab pieraaryjentavacca na Zachad, jak ciapier.

– Kali Łukašenka pojdzie na zbližeńnie, dyk ZŠA i ES zrobiać dla vašaj krainy ŭsio, kab dapamahčy vyjści z ekanamičnaha kryzisu! Inakš Biełaruś prosta zaciahnie ŭ vichuru abvału ekanomiki Rasii.

• 0
• 0
• 0
• 0
• 0
• 0