Камала Харыс прыняла намінацыю і паабяцала быць прэзідэнтам для ўсіх амерыканцаў
У апошні дзень нацыянальнага з'езду Дэмакратычнай партыі ЗША ў Чыкага Камала Харыс афіцыйна прыняла намінацыю ў якасці кандыдата на пасаду прэзідэнта і выступіла з прамовай — пакуль што галоўнай за ўсю яе палітычную кар'еру, піша Бі-бі-сі.
Харыс заклікала амерыканцаў выкарыстоўваць будучыя выбары як «каштоўную магчымасць пераадолець горыч і намеціць шлях наперад», незалежна ад партыйных пераваг.
«Я ведаю, што сёння ўвечары нас глядзяць людзі з рознымі палітычнымі поглядамі. І я хачу, каб вы ведалі: я абяцаю быць прэзідэнтам для ўсіх амерыканцаў, — сказала яна. — Я буду прэзідэнтам, які аб'яднае нас вакол нашых самых высокіх памкненняў. Прэзідэнтам, які вядзе — і слухае», — сказала яна пад бурныя апладысменты.
Харыс таксама папярэдзіла аб небяспечных наступствах у выпадку вяртання ў Белы дом рэспубліканца Дональда Трампа.
«Мы ведаем, што будзе ўяўляць сабой другі прэзідэнцкі тэрмін Трампа. Усё гэта выкладзена ў дакуменце «Праект 2025». У многіх адносінах Дональд Трамп з'яўляецца несур'ёзным чалавекам. Аднак наступствы яго вяртання ў Белы дом надзвычай сур'ёзныя», — сказала віцэ-прэзідэнт ЗША.
Паводле яе слоў, Трамп імкнецца адкінуць краіну назад. «Але мы не вернемся ў мінулае», — паўтарыла яна некалькі разоў.
«Я люблю нашу краіну ўсім сэрцам. Куды б я ні пайшла і з кім бы ні сустрэлася, я бачу нацыю, якая гатовая рухацца наперад, гатовая да наступнага кроку і неверагоднага падарожжа, якое і называецца Амерыка», — сказала яна.
Выступ Харыс стаў кульмінацыяй з'езду, які праходзіў чатыры дні. За гэты час на ім выступілі цяперашні прэзідэнт Джо Байдэн, Біл і Хілары Клінтаны, Барак і Мішэль Абамы, былы спікер Палаты прадстаўнікоў Нэнсі Пэлосі, а таксама напарнік Харыс па прэзідэнцкай гонцы Цім Уолз.
Як і на аналагічным з'ездзе рэспубліканцаў у ліпені, зала была поўная зорных гасцей. Да тэлевядучай Опры Уінфры і рэпера Ліў Джона далучыліся музыкі Стыві Уандэр і Джон Леджэнд. Хадзілі чуткі, што на з'ездзе могуць з'явіцца Беёнсэ або Тэйлар Свіфт.
Харыс стала кандыдатам ад Дэмакратычнай партыі пасля таго, як прэзідэнт Джо Байдэн месяц таму выйшаў з перадвыбарнай гонкі пасля некалькіх тыдняў ціску з боку аднапартыйцаў.
Харыс шмат казала пра сваю асабістую гісторыю і кар'еру пракурора, а таксама коратка закранула міжнародныя тэмы, паабяцаўшы, што ў выпадку абрання будзе працягваць падтрымку Украіны.
«Я буду цвёрда стаяць на баку Украіны і нашых саюзнікаў у НАТА», — сказала яна.
Паводле яе слоў, пасля пачатку поўнамаштабнага ўварвання Расіі яна дапамагала «мабілізаваць глабальны адказ» для таго, каб Украіна змагла абараніцца ад расійскай агрэсіі.
У сваёй прамове Харыс выразна падсумавала ўсе ключавыя моманты, якія яе штаб хацеў закрануць — яе асабістую гісторыю, заклікі да адзінства, мэты эканамічнай і сацыяльнай палітыкі, арыентаваныя на сярэдні клас, і крытыку Дональда Трампа.
Аднак для тых, хто сачыў за яе кампаніяй на працягу апошніх некалькіх тыдняў, у яе прамове было мала новага. «Гэта быў проста новы спосаб ахапіць самую вялікую амерыканскую аўдыторыю, перад якой яна калі-небудзь выступала», — піша карэспандэнт Бі-бі-сі.
Палітычныя з'езды дзвюх асноўных партый, якія праводзяцца кожныя чатыры гады перад прэзідэнцкімі выбарамі, бяруць свой пачатак у 1830-х гадах, калі група дэлегатаў-дэмакратаў, якія падтрымлівалі прэзідэнта Эндру Джэксана, сабралася, каб вылучыць яго на другі тэрмін.
Агулам цяперашняе мерапрыемства дэмакратаў у Чыкага наведала каля 50 тысяч чалавек.
Прэзідэнцкія выбары ў ЗША пройдуць 5 лістапада.
«Падлік галасоў як сатанісцкі рытуал». Былы член камісіі расказаў, як у Беларусі фальсіфікуюць выбары8
Каментары