«Жаночая аўдыторыя змахне скупую слязу». У Тэатры юнага гледача, якім кіруе Вера Палякова-Макей, упершыню паставілі спектакль 18+
У Беларускім дзяржаўным акадэмічным тэатры юнага гледача (ТЮГ) адбылася прэм'ера камедыі «36 і 6» у пастаноўцы Аляксандра Несцерава па п'есе Яны Старадуб-Афанасьевай. Галоўную ролю сыграла Вера Палякова-Макей, пішуць Мінск-Навіны.
— Гэта не толькі першы досвед узаемадзеяння з ТЮГам, але і мой першы прыезд у Беларусь. Я закахаўся ў Мінск, мне тут вельмі добра, — прызнаўся маскоўскі рэжысёр-пастаноўшчык А.Несцераў. — Лічу, што выцягнуў шчаслівы білет, бо Вера Палякова-Макей створана для галоўнай ролі (дырэктара ЗАГСа).
Дырэктарка тэатра, заслужаная артыстка Беларусі Вера Палякова-Макей адзначыла, што за два мінулыя гады гэта першая прэм'ера камедыі, пастаўленая ў ТЮГу, і першы спектакль катэгорыі 18+.
— Мы расцем разам з нашым гледачом. Бачым патрэбу ў такіх спектаклях. У фінале, спадзяюся, асабліва жаночая аўдыторыя змахне скупую слязу. Для мяне вельмі прыемна, што камедыя падымае праблемы мам і дзяцей, — распавяла В.Палякова-Макей. — Я гадую двух сыноў і разумею пачуцці сваёй гераіні, калі ты павінна аддаць дзіця, якое ты гадавала, іншай, у дадзеным выпадку добрай жанчыне. Наш спектакль добры, шчыры, сапраўдны. Кожны з чатырох персанажаў на сцэне заслугоўвае любові гледачоў, увагі, спагады.
Стваральнікі спектакля ўпэўненыя, што 36 і 6 — гэта больш чым нармальная тэмпература цела, гэта — градус кахання. А ЗАГС — месца, дзе не толькі праходзяць вяселлі, але і выдаюцца пасведчанні аб смерці. Там нібы становіцца прыкметнай мяжа паміж жыццём і смерцю.
Па сюжэце мама, дырэктар ЗАГСа, гадуе ідэальнага сына, які, як яна думае, не п'е, не паліць, не мацюкаецца. Жанчына агароджвае яго ад «нехарошых» нявест. Але аднойчы яе свет перакульваецца з ног на галаву. Да яе прыходзіць 41-гадовая жанчына, якая заключыла ў Англіі шлюб сама з сабой, а цяпер хоча аформіць развод, каб выйсці замуж за каханага мужчыну. Нечакана высвятляецца, што дырэктарка ЗАГСа і ёсць маці яе каханага, якая зусім не гарыць жаданнем бачыць у доме такую нявестку і аддаваць каханага і адзінага сына ва ўзросце 36 гадоў і 6 месяцаў іншай жанчыне.
Спектакль ідзе ў суправаджэнні музыкантаў Прэзідэнцкага аркестра (музычны кіраўнік аркестра — Віталь Кульбакоў). Гледачы пачулі музыку Моцарта, Мендэльсона, Бакерыні, П'яцолы.
У Беларускай праваслаўнай царкве абнавілі цэннік? Вось якія будуць рэкамендаваныя тарыфы7
Каментары