У якіх рэстаранах адпачывалі мінчукі ў 1980-х — шмат настальгічных ФОТА
Паказваем, як выглядалі сталічныя кафэ ў апошняе дзесяцігоддзе існавання СССР, і распавядаем, якія далікатэсы там можна было пакаштаваць.
![](http://nnexpictures.fra1.digitaloceanspaces.com/img/w732d4webp1/photos/z_2024_01/photo_2024-01-26151734-9nl7s.jpeg.webp)
Здымкі ўзяты з сувенірных картак «Кафэ, рэстараны, бары горада Мінска», якія служылі своесаблівай рэкламай для гасцей сталіцы. Акрамя адрасу і фотаздымкаў, для кожнай установы прыводзіўся пералік фірмовых страў, расклад працы і нумар тэлефона для даведак.
Найбольшая колькасць картак была прысвечана кафэ і рэстаранам з варыяцыямі на тэму беларускай кухні.
![](http://nnexpictures.fra1.digitaloceanspaces.com/img/w732d4webp1/photos/z_2024_01/photo_2024-01-25153338-sng2e.jpeg.webp)
![](http://nnexpictures.fra1.digitaloceanspaces.com/img/w732d4webp1/photos/z_2024_01/photo_2024-01-25153340-gontm.jpeg.webp)
Кафэ «Бульбяная» размяшчалася на Ленінскім праспекце, 53 (сёння праспект Незалежнасці, каля плошчы Якуба Коласа). Над ўваходам вісеў прыкметны знак — чыгунок на ланцугу.
Тут прапаноўвалі некалькі дзясяткаў фірмовых і нацыянальных страваў з любімай беларусамі бульбай: «Смажаніна» — бульба з ялавічынай, свінінай і цыбуляй, запечаная на патэльні; «Пражаніна» — бульба са свінінай, грыбамі гароднінай і чарнаслівам, якая падавалася пад вінным соусам; салат «Смачны» — мяса, гародніна, цыбуля і грыбы ў кошыку са смажанай хрусткай бульбы, а таксам «Булён з бульбешнікамі», «Поліўка беларуская», «Бульба ў мундзірах з агурком», асарці «Беларускі букет», салаты «Сялянскі» і «Востры».
Сёння на месцы «Бульбяной» працуе Stolle.
![](http://nnexpictures.fra1.digitaloceanspaces.com/img/w732d4webp1/photos/z_2024_01/photo_2024-01-25154045-uqr46.jpeg.webp)
Кафэ «Нёман» працавала па Ленінскім праспекце, 22, насупраць бістро «Хвілінка». У кафэ можна было не толькі смачна паснедаць, але і паслухаць стэрэамузыку. У меню былі разнастайныя закускі, другія стравы, у тым ліку мяса па-беларуску, кураня табака. У «Хвілінцы» частавалі булёнам з грэнкамі, шашлыкамі, бутэрбродамі і блінчыкамі.
![](http://nnexpictures.fra1.digitaloceanspaces.com/img/w732d4webp1/photos/z_2024_01/photo_2024-01-25154200-958h9.jpeg.webp)
У рэстаране «Лета» круглы год гатавалі салаты з гародніны, фірмовыя зразы і біточкі, фаршыраваныя гароднінай і цыбуляй, напой з яблычнага соку. Па вечарах у рэстаране граў аркестр. «Лета» размяшчалася побач з паркам імя Горкага, па вуліцы Першамайскай, 18. Сёння на яго месцы працуе рэстаран «Камяніца».
![](http://nnexpictures.fra1.digitaloceanspaces.com/img/w732d4webp1/photos/z_2024_01/photo_2024-01-25154345-aqmh4.jpeg.webp)
Знакаміты рэстаран «Журавінка» размяшчаўся ва ўласным будынку па вуліцы Янкі Купалы, 25, пабудаваны ў 1968 годзе па праекце архітэктараў Аксаны Ткачук і Нуты Шпігельмана. Галоўным упрыгажэннем самай вялікай залы на 300 месцаў стала вясёлкавае пано, на якім была адлюстравана беларускае вяселле.
Тытульную ягаду журавіну кулінары шырока выкарыстоўвалі ў самых розных стравах, нават у арыгінальнай фірмовай катлеце. Таксама меўся напой «Журавінка», які мусіў бадзёрыць і здымаць стому.
У 2000 годзе будынак быў да непазнавальнасці рэканструяваны, «Журавінка» ператварылася ў казіно.
![](http://nnexpictures.fra1.digitaloceanspaces.com/img/w732d4webp1/photos/z_2024_01/photo_2024-01-25174940-m1a64.jpeg.webp)
Шэраг беларускіх рэстарацый размяшчаліся ў свежарэканструяваным Траецкім прадмесці.
Пачнем з карчмы «Старавіленскай». Тут у невялікім бары з назвай «Астатні грош» быў вялікі выбар напояў і кактэйляў, можна было заказаць келіх пунша і грога, канапэ «Сустрэча», бутэрброды «Старадаўні» і «Асобы». Вузкая драўляная лесвіца вяла ў вінную залу «Уцеха» з дубовай мэбляй і даматканымі палавіцамі. Да стала падавалі салаты «Траецкі» і «Траецкая горка», блінны пірог, напой «Старавіленскі». Пад застоллі была адведзеная 14-мясцовая зала «Пагулянка», а ў кавярні падавалі каву па-ўсходняму.
Карчма «Траецкая» мела залу на 60 месцаў, аформленую ў нацыянальным стылі. Тут падавалі страганіну «Смачны кусочак», студзень «Дрыгва», салат «Палескі», капусту «Пятроўскую».
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25174228-k6gye.jpeg.webp)
Назва рэстарана «На ростанях», які размяшчаўся на плошчы Якуба Коласа (Ленінскі праспект, 47), адсылала да трылогіі класіка. Унутры зала была абстаўлена ў нацыянальным стылі разьбяной мэбляй, габеленамі на сценах, свяцільнямі з каванага жалеза і нёманскага шкла. Атмасферу стваралі напеўныя беларускія мелодыі.
Сярод страў галоўнае месца займалі бліны, мачанка з блінамі, стравы з бульбы ды збіцень. Фірменныя стравы — салат, поліўка, катлета і напой — насілі тую ж назву, што і рэстаран.
Сёння на месцы рэстарана крама «Электрасіла».
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25175158-tifbi.jpeg.webp)
Залы рэстарана «Свіцязь» па Ленінскім праспекце, 90 былі аформлены ў трох водных колерах — зялёным, залацістым і блакітным. «Зялёная зала» (грыль-бар) на першым паверсе прапаноўвала свежае піва і духмяныя шашлыкі. Невялікая «Аранжавая зала», дзе ладзіліся дыскатэкі, адрознівалася аддзелкай няяркага залаціста-тэракотавага колеру. Побач была банкетная зала з летняй верандай.
Самая вялікая «Блакітная зала» размяшчалася на трэцім паверсе і магла прыняць адразу 160 чалавек.
У рэстаране падавалі рулет са свініны, пячонку, запечаную па-гомельску, поліўку «Свіцязь», амлет па-сялянску і добра падсмажаныя дранікі.
Сёння ў будынку рэстарана размяшчаецца мацоўня і іншыя ўстановы.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25154510-k5tsq.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25154511-cuu9s.jpeg.webp)
Рэстаран «Папараць-кветка» размяшчаўся ў даваенным будынку фабрыкі-кухні па вуліцы Свярдлова, 2. У вялікай абедзенай зале магло змясціцца 270 чалавек, а ў банкетнай ладзіліся сямейныя святы, адзначаліся вяселлі і юбілеі. Некаторыя фірмовыя стравы насілі тую ж назву, што і рэстаран.
Пасля апошняй рэканструкцыі тут размясцілася некалькі ўстаноў, сярод якіх CoffeeMouse.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25154801-ul2rb.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25154802-mzngw.jpeg.webp)
У кафэ «Вясна» па Ленінскім праспекце, 18 заўсёды гучала эстрадная музыка. У фанатэцы стэрэа-бара «Задыяк» былі найноўшыя запісы савецкіх і замежных выканаўцаў. У меню ж стравы беларускай кухні: катлета па-сялянску, мачанка з блінамі, дранікі, яйка, фаршыраванае грыбамі. У суседнім кафетэрыі можна было заказаць каву, пірожнае і пышную булачку.
Сёння на месцы кафэ рэстаран «Шыкары».
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25155205-kp0up.jpeg.webp)
Стравы іншых краін таксамі былі прадстаўлены ў многіх сталічных рэстаранах.
На бульвары Шаўчэнкі, 26 размяшчаўся рэстаран, чыя назва яднала беларусаў і ўкраінцаў — «Дняпро». Тут можна было пакаштаваць украінскую кухню: варэнікі, боршч, катлеты па-палтаўску, галушкі.
Сёння ў гэтым доме толькі крамы мэблі.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25155853-j0nxa.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25155901-mpwg4.jpeg.webp)
У прэстыжным «Патсдаме» на вуліцы Леніна, 2, як сцвярджаюць карткі, працавалі найлепшыя кулінары ГДР. Рэстаран быў названы ў гонар горада-пабраціма Мінска і спецыялізаваўся на нямецкай кухні, тут падавалі бульбяны суп з сасіскамі, салаты «Далікатэсны» і «Берлінскі», штэк «Патсдам», «Сан-Сусі», у які ўваходзілі смажаная свініна, ялавічына, курыцы, бульба і грыбы. У бары меўся вялікі выбар кактэйляў, прахалодных напояў ды сокаў. Сёння на месцы былога «Патсдама» пафаснае Grand Cafe.
Дарэчы, у самім Патсдаме працаваў рэстаран «Мінск», які пару гадоў таму быў капітальна рэканструяваны.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25160233-tcy5g.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25160234-ohkv8.jpeg.webp)
Літоўскую кухню можна было пакаштаваць у рэстаране «Вільнюс» па вуліцы Каліноўскага, 155. Двухузроўневая зала на 180 месцаў была аформлена ў нацыянальным стылі з выкарыстаннем драўляных столяў, дэкаратыўных рашотак і сучаснай на той момант мэблі. Тут можна было заказаць закуску «Вільнюс», салаты «Нярыс» і «Дзіджуліс». У кактэйль-бары з кактэйлем можна было паслухаць стэрэамузыку і паглядзець перадачу па каляровым тэлевізары.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25160410-8pjhm.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25160414-1xzlm.jpeg.webp)
Меўся ў Мінску і рэстаран рускай кухні — «Арбат». Тут частавалі закускай «Рускай», напоем «Маскоўскім», капустай і баршчом, падавалі далікатную вяндліну і «румяна-жоўты» амлет з сырам, каўбаскі па-арбацку і рыбу, запечаную з яйкам. Рэстаран працягвае існаваць пад старой назвай па праспекце Незалежнасці, 143/1 на Усходзе.
У беларускай сталіцы існаваў і шэраг кафэ, у якія можна было прыводзіць дзяцей.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25160601-3vekm.jpeg.webp)
«Казачны замак» па Ленінскім праспекце, 83 меў незвычайную цікавостку. Тут меўся механічны крумкач з казкі Ганса Хрысціяна Андэрсена «Снежная каралева», які вітаў гасцей, а таксама забаўляў іх казкамі. Менавіта па матывах «Снежнай каралевы» былі аформлены інтэр'еры кафэ, яго мастацкія роспісы і разьба па дрэве. Пад рост наведвальнікаў рэгулявалася вышыня лаў.
Кафэ захавалася да нашага часу.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25160652-es7oj.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25160656-n3t8v.jpeg.webp)
Кафэ «Пунсовенькая кветачка» было аформлена па матывах аднайменнай казкі. Гасцей сустракалі тры сястрыцы-афіцыянткі Насценька, Гардзея і Красава. Дзецям прапаноўвалася жэле «Заморскае» і «Цуд-востраў», пірожнае «Чарадзейны пярсцёнак», напой «Цудатворных». А яшчэ тут выстаўляліся дзіцячыя малюнкі і вырабы. Сёння па адрасе праспект Пушкіна, 52 толькі «Капеечка» ды аптэка.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25161123-lx2e9.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25161121-ek57u.jpeg.webp)
Апошняе дзіцячае кафэ «Дубравушка» размяшчалася па Рэспубліканскай вуліцы, 26 (сёння Раманаўская Слабада). Тут падавалі закускі «Зялёны агурочак» і «Заечая капуста», свініна адварная «Хрушка», булёны «Заечыя вушкі» і «Пеўнік — залаты грабеньчык».
Не менш папулярнымі за іншыя былі рэстараны пры мінскіх гасцініцах. Амаль усе яны ў тым ці іншым выглядзе захаваліся да нашага часу.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25161307-z6p8f.jpeg.webp)
Рэстаран гасцініцы «Юбілейнай». Фота з сувенірных картак
Рэстаран пры гасцініцы «Юбілейнай» па праспекце Машэрава, 29 (сёння праспект Пераможцаў) гатаваў стравы беларускай, французскай, польскай і англійскай кухняў. Тут можна было пакаштаваць рулет са свініны, катлету «Юбілейную», філе на ражне, шніцаль па-міністэрску, жульен з мяса з грыбамі, біфштэкс па-англійску, філе з соусам «Мадэра». Увечары ў рэстаране граў эстрадны аркестр, а ў кафэ-бары — камерны квартэт.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25161439-vj2om.jpeg.webp)
У рэстаране гасцініцы «Спадарожнік» па вуліцы Брылеўскай, 2 ганарыліся сваімі аднайменнымі фірмовымі катлетамі і каўбаскамі. Таксама прапаноўвалі вялікі выбар закусак, салатаў, напояў і сокаў.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25222056-qh72t.jpeg.webp)
Вялікі рэстаран уваходзіў і ў комплекс гасцініцы «Турыст» па Партызанскім праспекце, 81. На першым паверсе размяшчаліся банкетная і асноўная зала, разлічаная на 220 месцаў. На другім — кактэйль-бар на 50 месцаў. Асаблівае месца ў меню займалі нацыянальныя стравы: яйка, фаршыраванае грыбамі, булён з калдунамі, катлеты па-сялянску, бульбяныя піражкі, фаршыраваныя яйкам. Падавалі таксама фірмовы рулет, катлеты «Турыст» і «Святочная». У рэстарана была свая летняя тэраса з каляровымі парасонамі, дзе прапаноўвалі шашлыкі, піва, ахаладжальныя напоі.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25161735-lwe4w.jpeg.webp)
Рэстаран старога Мінскага аэрапорта прапаноўваў руляду з птушкі, салат «Беларускі», катлеты па-аэрафлоцку, напой «У палёт».
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25161901-baib4.jpeg.webp)
Беларуская і еўрапейская кухні былі шырока прадстаўлены ў рэстаране гасцініцы «Планета» па праспекце Машэрава, 31 (сёння праспект Пераможцаў). У аздабленні інтэр'ераў былі выкарыстаны кераміка і мазаічнае пано, якія вобразна адлюстроўвалі гісторыю, культуру і побыт беларускага народа. Рэстаран меў адразу тры залы — на 30, 50 і 100 месцаў. У двух барах прапаноўвалі кактэйлі і сокі, у летнім кафе, на даху гасцініцы, — марозіва і ахаладжальныя напоі. Вакальна-інструментальны ансамбль выконваў песні савецкіх і замежных кампазітараў.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25162003-bbi90.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25162001-43z6m.jpeg.webp)
У кафэ «Яечным» па вуліцы Рэспубліканскай, 26 (сёння Раманаўская Слабада) па ўласных рэцэптах гатавалі далікатэсныя закускі і гарачыя стравы з яек і птушкі: фірмовы салат «Фантазія», амлет, запечаны з творагам, яйкі заліўныя і яечныя ромбікі. Для іх прыгатавання проста ў абедзеннай зале быў устаноўлены грыль-апарат.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25162135-4353b.jpeg.webp)
У кафэ «Уют» для наведвальнікаў былі створаны зручныя кабіны, драпіраваныя сцены былі ўпрыгожаны карцінамі, на столях нізка віселі арыгінальныя люстры, гучала музыка. Адсвяткаваць свой юбілей у такой утульнасці можна было па Камсамольскай вуліцы, 7.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25162309-rc3rj.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25162307-ogwma.jpeg.webp)
Побач з Оперным тэатрам па вуліцы Горкага, 6 (сёння вуліца Максіма Багдановіча) можна было паснедаць у кафэ з неарыгінальнай назвай «Тэатральнае». У вестыбюлі кафэ заўсёды вісела афіша з рэпертуарам тэатра. Тут часта бывалі не толькі аматары опернага і балетнага мастацтва, але таксама і артысты, ладзіліся творчыя сустрэчы. Інтэр'ер упрыгожвалі мастацкія свяцільні і карціны, якія адлюстроўвалі развіццё тэатра. У меню заўсёды былі фірмовыя блінчыкі «Прэм'ера», ялавічына па-тэатральнаму, дэсерт «Муза» і кава па-тэатральнаму.
На месцы «Тэатральнага» сёння працуе рэстаран кітайскай кухні «Міс Лі».
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25162451-tpma7.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25162452-e9hs6.jpeg.webp)
У «Зялёным лузе» па вуліцы Карбышава, 13 ладзіліся сустрэчы з дзеячамі беларускага кіно і тэатра, папулярнымі артыстамі эстрады, напрыклад, «Песнярамі», вядомымі паэтамі. У вольныя вечары была канцэртная праграма. Наведвальнікі маглі заказаць фірмовую катлету «Лугавую», салаты «Пікантны» і «Сюрпрыз», напітак «Залаты колас».
Сёння будынак рэстарана займае «Беларусбанк».
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25162834-yf00p.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25162835-67rbs.jpeg.webp)
Бар шампанскіх вінаў з прыгожай беларускай назвай «Каханая» знаходзіўся па вуліцы Кірава, 11. Сваёй папулярнасцю бар карыстаўся дзякуючы інтэр'ерам, для афармлення якіх былі выкарыстаны рознакаляровыя вітражы, чаканка па медзі, люстэркі ды хрусталь.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-251630241-7ookd.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25163024-gwpj9.jpeg.webp)
Ззяючыя хваёвыя галіны на вывесцы сустракалі наведвальнікаў рэстарана з паэтычнай назвай «Сосны». Інтэр'ер быў аформлены дрэвам, а блюды адлюстроўвалі ягоную своеасаблівасць. Напрыклад, нагадвалі хваёвую шышку катлеты «Сосны», прыгатаваныя з адбіўной свініны і начыненыя сырам, сметанковым маслам і рубленым часныком. Таксама падавалі мяса «Юбілейнае» з ялавічнай выразкі, запечанае з цыбуляй і цёртым сырам. Рэстаран размяшчаўся па Партызанскім праспекце, 70А.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25163208-soj1u.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25163209-d3qad.jpeg.webp)
Яшчэ адна беларускамоўная вывеска — кафэ «Паляўнічы». Тут гучалі запісаныя на магнітафонную стужку пошчакі салаўя і жаўрука, івалгі і стрыжа, клёкат жураўлёў, таямнічнае вухканне савы, далёкі голас зязюлі ды посвіст кнігаўкі. Своеасаблівасць кафэ падкрэсліваў інтэр'ер: тры невялікія ўтульныя залы — усяго на 52 наведвальнікі, злучаныя між сабой аркамі. Сцены з чырвонай цэглы ўпрыгожвалі скуры, ласіныя рогі. У меню былі закускі «Дуплет» і «Паляўнічая», фірмовыя стравы «Трафей паляўнічага» і «Паляўнічыя каўбаскі», прыгатаваныя з мяса лася і дзіка, марозіва «Лясная казка» і «Раніца». Кафэ размяшчалася ў цэнтры горада па Ленінскім праспекце, 46.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25163840-55wgb.jpeg.webp)
Бар каньячных і шампанскіх вінаў працаваў па Ленінскім праспекце, 75. Тут можна было заказаць жульен і ялавічыну з грыбамі і цыбуляй, курыцу, запечаную ў смятанным соусе. На дэсерт — марозіва «Краса» з лікёрам і шакаладам, з кактэйляў — «Калібры» або «Іскрысты».
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25163940-98ybq.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25163942-r690f.jpeg.webp)
Інтэр'ер кафэ «Брыганціна» нагадваў карабель: круглыя вокны-ілюмінатары, штурвал, сеткі на сценах, свяцільні-паплавы. У гэтым спецыялізаваным рыбным кафэ можна было пакаштаваць зразы «Капітанскія» і «Данскія», салат «Марскі», далікатэсныя асарці. Размяшчалася «Брыганціна» па Ленінскім праспекце, 42.
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25164131-lqas5.jpeg.webp)
![](http://d3kcf2pe5t7rrb.cloudfront.net/img/w732d4webp1/photos/z_2024_01/photo_2024-01-25164130-eflgr.jpeg.webp)
Нарэшце, у маладзёжным кафэ «Мерыдыян» па вуліцы Прытыцкага, 56 можна было смачна паесці пад выступленне вакальна-інструментальнага ансамблю, азнаёміцца з праграмай дыскаклуба.
«Наша Нiва» — бастыён беларушчыны
ПАДТРЫМАЦЬ
Каментары